Psalms 119

Zande

← Chapter 118 Jump to: Chapter 120 →

1Aboro maku nga agu yo du gayo apai ziazia, nata rogo ga Yekova rugute!

2Aboro maku nga agu yo naka kuti gako adezirepai, ninagbata ko na kpotoyo yo dũ,

3nga agu yo amanga nga irairapai wa sa ya, ono i nata kina rogo gako apai.

4Mo arugu rani na gamo andika, ya ani nika kuti ni nzunzu.

5Ako, ka gimi apai nidu ni nyakasinyakasi he ya mi ka kuti gamo rugaapai!

6Si du zee amánga nga re ti ni ya, ho mi ka uda sangbaro ni dunduko.

7Mi afú atambuahe foro na ruru kpotore yo, ho mi ka ina pa gamo ruru asarangbanga ni.

8Mi abérã pa gamo rugaapai; Ako, ka mo mbú nga re wa sa ya!

9Waĩ ka paranga boro girisi gani pai? Ni makia pai kuti fugoro.

10Mi nagbata ro na kpotore yo dunduko; ako, ka mo ídi nga mi mere be sangbaro ya!

11Mi naiga ga pai ku kpotore yo, ya ka mi niingi nga pai kuti ro ya.

12Ako Yekova, i sámbua ro; mo rába re na gamo rugaapai!

13Mi nataka pande pa agu asarangbanga du ngbaro dunduko, ni ngbare.

14Mi nangi ngba gene gamo adezirepai, a wa mi nangi tipa ũkumuko dunduko.

15Mi abáka bangire tipa gamo andika, ki udi gamo apai.

16Gi ngbarago adú rogo gamo rugaapai; bangire agó nga ti ga pai te.

17Mo mángi pa ga moyambu kpaima, mi ki nye ni ungare, ki niberẽ pa ga pai.

18Mo zá bangire mi bi iiriwo apai rogo ga rugute.

19Mi nga nungunungu boro ku zegino; ka mo nióko nga sangbaro ti re ya!

20Mbisimore nafaa be nyemu gamo asarangbanga du kuti ni dedede.

21Mo ninaza airaenda du ni aboro motiwa, namefa be sangbaro;

22mo rógo gayo gbarasarimo ti re na payasi pa re, bambiko wa ka mi kuti gamo adezirepai.

23Ka awiri abazogo vura sunga nita bura re vurũ; ga moyambu abáka bangirini tipa kina gamo rugaapai.

24Gamo adezirepai du ni gi pa ngbarago, nga gimi abororondo a.

25Mbisimore nadika tihe kuti nvutu sende; mo úngasi re ku sangba ga pai yo!

26Ho mi ataki pande pa gimi apai ni, mo akaraga pai fere; mo rába re na gamo rugaapai!

27Mo rúgu re mi ini pa gamo andika, si du mi abáka bangire tipa gamo iiriwo mangaapai.

28Mbisimore nazirã be rõrõi berã; mo nyákasi re ku sangba ga pai yo!

29Mo dí pa zire ti re tuturu; ki fu kina ga rugute fere ni weneringiro!

30Mi sia pa yososopai, mi amoi gamo asarangbanga ku bara bangire.

31Ako Yekova, mi nazia tire kuti gamo adezirepai; ka mo nibá nga zee ku ri re ya!

32Mi aóra ngba gene sangbaro, ho mo ka kiisa gi rugatinapai ni!

33Ako Yekova, mo rába re na gamo rugaapai; si du mi aká kuti ni daho rago ka diga ni.

34Mo fú rugatinapai fere, si mi ka ka kuti ga rugute ti ni; ki berẽ pa ha na kpotore yo dunduko.

35Mo gási re ngba gene sangbaro; bambiko gi ngbarago du rogo ho.

36Mo rúgu kpotore yo tipa gamo adezirepai; sa mokiisa biriki te!

37Mo dí bangire ti ngera kuti pa wia; ki ungasi re rogo gamo apai.

38Mo nyákasi ga pai fu ga moyambu nagunde ti ro.

39Mo dí gi gbarasarimo tire nga gu mi nagunde be he; bambiko gamo asarangbanga du ni wene he.

40Mo ngére, mi nafaa be nyemu gamo andika; mo úngasi re wa du mo ni irarengo!

41Ako Yekova, mo ídi he ga weneringise ye fere, nga ga bata, ku sangba ga pai yo.

42Si du mi adú na pai ka karaga ha fu agu yo napayasi re, bambiko mi nakida kuti ga pai.

43Ka mo dí nga gu pai nga ga rengo ngbare wa sa ya, bambiko wa moi mi bangire kuti gamo asarangbanga.

44Mi naka aka kuti ga rugute nye anye kindi;

45mi atá wa boro ra ni rini, bambiko wa mi agbata gamo andika.

46Mi agúmba pa gamo adezirepai ku bara bangiri abakindo a, ka zee amánga nga re ya;

47bambiko mi bi pa gi ngbarago rogo sangbaro nga gu mi nakpi nyemu he.

48Mi natumba bere ku ari kuti sangbaro nga gu mi nakpi nyemu he; mi abáka bangire tipa gamo rugaapai.

49Mo tíngidi pa gu pai mo agumba ha fu ga moyambu, nga gu mi amoi bangire kuti ni mbiko ro.

50Gere nga gi pa wasa rogo gi gberãngbi ya ga pai aungasi re.

51Airaenda awia re awia gbe, ono mi asa nga tire ti ga rugute te.

52Ako Yekova, ho mi naberã pa gamo asarangbanga ni naadu bakuru mi ki bi wasa.

53Fafoi zinga azi re gbe, tipa gu gbegberẽ aboro nagindiga ga rugute.

54Gamo rugaapai adu ni pa gimi abia rogo bambu yo ngba gi nunguro.

55Ako Yekova, mi natingida pa rimoro yuru, ki ka kuti ga rugute.

56Gi adu fere re, bambiko mi aka kuti gamo andika.

57Yekova nga gi ũkumuko; mi aya mi aká kuti gamo apai.

58Mi nazungadi pa ga wene ngbanya na kpotore yo dunduko; mo ini pai fere ku sangba ga pai yo.

59Ho mi naberã pa gamo apai ni, mi naaria ndure sa gamo adezirepai;

60mi naipisa tire, mi aima nga te ka ka kuti sangbaro.

61Ka ga gbegberẽ aboro agire vura voda re vurũ, bangire ago nga tipa ga rugute te.

62Mi naguari bebere yuru ka fu tambuahe foro, tipa pa gamo ruru asarangbanga.

63Mi nga badia ngbanya na agu yo dunduko nagunde ti ro, nga agu yo naka kuti gamo andika.

64Ako Yekova, kpotosende hiki be ga weneringise; mo rába re na gamo rugaapai.

65Ako Yekova, mo amangi pai fu ga moyambu wenengaĩ, ku sangba ga pai yo.

66Mo rába re na wene sarangbanga na inahe, bambiko wa idi mi sangbaro.

67Mbata fu rungosi re mi amerẽ ku bani; ono awere mi naka kuti ga pai.

68Mo du ni wene ro, mo namanga wenepai; mo rába re na gamo rugaapai.

69Airaenda are azire kuti re; ono mi naka kuti gamo andika na kpotore yo dunduko

70kpotoyo yo du ni bakere he wa si na nzeme; ono gi ngbarago du rogo ga rugute.

71Si ni wenepai fere wa mi adu ni rungosirungosi re; mi wiriki gamo rugaapai be he.

72Gu rugute nakura ngbaro yo si ni wene he fere ki susi marã dahabu wa akutu na ga feda a.

73Bero afu re ki mbakadi re a; mo fú rugatinapai fere, mi wiriki sangbaro.

74Agu yo nagunde ti ro i abí re ki ngi angi, bambiko mi moi bangire ti ga pai.

75Ako Yekova, mi ini he ya gamo asarangbanga du ni ruru mo arungosi re na ga yososopai.

76Mi nazungadi ro, ga weneringise nidú ni gi pa wasa, ku sangba ga pai yo fu ga moyambu.

77Mo ídi he ga wene nunga ye fere, mi ki du ni ungare; bambiko ga rugute nga gi pa ngbarago.

78Zee zi airaenda azia, bambiko i amangi re ni biriki; ono mi ni tire abáka bangire tipa gamo andika.

79Agu yo ninagunde ti ro i sá tiyo kono du mi ni, ka ina gamo adezirepai.

80Ako, ka kpotore yo dú ziazia be gamo rugaapai, si du ka zee amanga nga re ti ni ya!

81He namaka mbisimore tipa ga bata; ono mi namaa bangire ti ga pai.

82Bangire nambu be sunguda pa ga kidohe; mi nasana he, “Mo angárãsa re ni gini rago?”

83Bambiko mi du wa mangu ime rogo ngime, ono bangire ago nga ti gamo rugaapai te.

84Arame ga moyambu adú waĩ? Mo asápa ngbanga agu yo narungosi re ni gini rago?

85Airaenda ageteke adue tipa re, nga agu yo amanga nga sangba ga rugute ya.

86Sangbaro dunduko du ni kina ku rengo; i narungosi re ni wia; mo únda re!

87I ambedi ka nyasa re zegino; ono mi ambu nga pa gamo andika te.

88Mo bátasi re ku sangba ga weneringise yo; si du mi ka ka kuti gamo adezirepai ti ni du ngbaro.

89Ako Yekova, ga pai dũ ni nyakasinyakasi he ku angbangbaturũ yo nye anye kindi.

90Ga yososopai du fu arika ngbatunga aboro dunduko; mo anyakasi kpotosende, si ki ru aru kindi.

91Si nye da ku areme mbiko mo naaringbisi he; bambiko ahe dunduko du ni ga gamo amoyambu.

92Ka si du wa ga rugute adu nga ni gi ngbarago te, ka mi aima kpi rago gi gberãngbi.

93Bangire ago nga ti gamo andika waragoagira te; bambiko mo aungasi re na ni.

94Mi nga gamo ni, mo bátasi re; bambiko mi nagbata gamo andika.

95Gbegberẽ aboro nasunguda re ka gbarasa re; ono mi naberã pa gamo adezirepai.

96Mi abi digida ziazia apai dunduko; ono sangbaro adu nga na ngbanda ha ti ni ya.

97Ako, nyemu ga rugute namanga re amanga ni rengo! Si nga gu mi nabaka bangire tipa ha na uru pitipiti.

98Sangbaro nasa re ni iratatamana susi avurare, bambiko si du na mi dedede.

99Mi du na rugatinapai susi gimi abayugupai dunduko, bambiko wa mi nabaka bangire tipa gamo adezirepai.

100Mi rugu tire na pai susi gbinza aboro, bambiko wa mi naka kuti gamo andika.

101Mi di ndure ti gene gbigbitapai dunduko, ya mi nibérẽ kina ga pai.

102Mi aguari nga pati gamo asarangbanga te, bambiko mo araba re.

103Na nziri gamo apai ngbare yo! Ii, si nzinziri susi nzeme anyege ngbare yo!

104Mi nidu na rugatinapai be gamo andika; si du sogo mi irairapai ti ni dunduko.

105Ga pai wa baro tipa ndure, nga imarago ngba gi gene.

106Mi azunga he, ki digisi pa ha, ya mi abérã pa gamo ruru asarangbanga.

107Mi du ni rungosirungosi re gbe; Ako Yekova, mo úngasi re ku sangba ga pai yo!

108Ako Yekova, mi nazungadi ro, mo ídi pa gimi agamunihe nga tambuahe, ki raba re na gamo asarangbanga.

109Mbisimore ngba pai dedede, ono bangire ata go nga ti ga rugute te.

110Gbegberẽ aboro are gbina tipa re, ono mi ainga nga ti gamo andika te.

111Gamo adezirepai du wa ũkumbo nye anye kindi; ii, si nga ga kpotore yo pa wasa.

112Mi naruga kpotore yo ka manga pa gamo rugaapai, nye anye kindi, ii, daho rago ka diga ni.

113Mi nasoga agu yo du na berã ue, ono mi nakpi nyemu ga rugute.

114Mo nga gi bagbuko nga gi vurakube; mi moi bangire ti ga pai.

115Oni gúari ti re, oni nga amangi gbigbitapai, mi ka kuti sangba gi Mbori.

116Mo sóngodi re ku sangba ga pai yo, mi nye ni ungare, ka zee mángi nga re mbiko gi maabangirise ya.

117Mo sóngodi re, mi sungu zezeredi, ki niberẽ pa gamo rugaapai dedede!

118Mo nagindiga agu yo dunduko naainga ti gamo rugaapai, ii, bambiko gayo birĩ nga kungba pai gbua.

119Mo nageda gbegberẽ aboro kpotosende no dunduko wa kina mirĩ marã; si du mi nakpi nyemu gamo adezirepai ti ni.

120Borore nakiga be gunde ro, mi nagunde be gamo asarangbanga.

121Mi amangi agu apai ru aru du ni rengo a; ka mo mbú nga re fu abarungosire ya.

122Mo du ku ba ga moyambu tipa wenepai; ka mo niídi nga airaenda rungosi re ya.

123Bangire nambu be sunguda pa ga bata, na tipa digisa pa ga ruru kidohe.

124Mo mángi pai fu ga moyambu ku sangba ga weneringise yo, ki raba re na gamo rugaapai.

125Mi nga ga moyambu; mo fú rugatinapai fere, ya mi ini gamo adezirepai!

126Yekova ragoho da mo mangi pai, bambiko i asa ga rugute ni kungba he.

127Si du rai nakpi nyemu sangbaro ki susi dahabu, ii, susi ziazia dahabu.

128Si du mi nauda gamo andika dunduko ya si ru aru tipa apai dunduko; mi ki sogo irairaapai dunduko.

129Gamo adezirepai du ni banaru pai; si du mbisimore naka kuti ni.

130Be r ma gamo apai ku kpoto yo si nafu imarago; si nafu rugatinapai fu azangainahe.

131Mi aka ngbare ha, ki niongo zorokozoroko, bambiko gomoro sangbaro namanga re.

132Mo ária tiro kono du mi ni, ki ini pai fere, a wa du sinoro fu agu yo nakpi nyemu rimoro.

133Mo rúgu ndure ku rogo ga pai, ka irairapai zógo nga re wa sa ya.

134Mo bátasi re be gu rungosi nga ga boro, si du mi ka ka kuti gamo andika ti ni.

135Mo ídi he kpakpuro hasi rago ku ri ga moyambu, ki raba re na gamo rugaapai.

136Bangire naga na aume wa ime wiriadi, bambiko aboro aka nga kuti ga rugute te.

137Ako Yekova, mo du ni ruru ro, gamo asarangbanga du ni ruru he.

138Mo aringbisi pa gamo adezirepai ni rurupai ni boro yososopai dunduko.

139Nyemuro narika re arika, bambiko bangiri agu yo nafuda re go ti gamo apai.

140Gu pai dũ ni ziazia ha gbe, si du ga moyambu nakpi nyemu he ti ni.

141Mi du ni umba boro ni payasipayasi re, ono bangire ago nga ti gamo andika te.

142Ga rurupai du ni nyenye rurupai, ga rugute nga rengo.

143Fudifudipai azi re na imisiripai, ono sangbaro du ni gi pa ngbarago.

144Gamo adezirepai du ni ruru he nye anye kindi; mo fú rugatinapai fere, mi ki nye ni ungare.

145Ako Yekova, mi nakpara foro na kpotore yo dunduko; mo káraga pai fere! Mi aká kuti gamo rugaapai.

146Mi nakpara foro, mo bátasi re, ya mi nibérẽ pa gamo adezirepai.

147Mi nazinga mbata fu ngbatutu, ki nikpari ku ari; mi namaa bangire ti gamo apai.

148Bangire du ni haha ha ti arago maarago yuru, ya mi nibákí bangire tipa ga pai.

149Mo gí fugore ku sangba ga weneringise yo; Ako Yekova, mo úngasi re ku sangba ga ruru asarangbanga yo.

150Agu yo napeka fuo gbegberẽpai i nambeda; i ki turũ ti ga rugute.

151Ako Yekova, ono mo du mbembedi, sangbaro dunduko nga kina ku rengo.

152Tipa gamo adezirepai mi aima ina pa ha bakuru yo, ya mo aringbisi pa ha nye anye kindi,

153Mo bi nga gi gberãngbi, ki batasi re, bambiko bangire ago nga ti ga rugute te.

154Mo du pati re na gi ngbanga, ki tumo re; mo úngasi re ku sangba ga pai yo!

155Bata du tuturũ ti gbegberẽ aboro, bambiko wa i agbata nga gamo rugaapai ya.

156Ako Yekova, gamo wene nunga du ni badungu he; mo úngasi re ku sangba ga ruru sarangbanga yo.

157Agu yo narungosi re i ni dungu yo na agu yo nafuda re a, ono mi aaria nga tire ti gamo adezirepai te.

158Mi abi airabiriki ki sogo yo, bambiko wa i aberã nga pa ga pai ya.

159Mo bérẽ nga pa waĩ mi nakpi nyemu gamo andika! Mo bánda ungare, ku sangba ga weneringise yo.

160Gamo apai nga kina ku rengo dunduko; gamo ruru asarangbanga dunduko nye anye kindi.

161Awiri abazogo narungosi re zanga ndupai, ono kpotore yo ru nagunde ti gamo apai.

162Mi nangi tipa ga pai wa gu ni nabi wene aĩtgbuahe.

163Mi sogo pa zire ki payasi he, ono mi nakpi nyemu kina ga rugute.

164Mi natambua ro bara saba na uru tipa gamo ruru asarangbanga.

165Bakere zereda du fu agu yo nakpi nyemu ga rugute; he adu nga ho sa ka kotosi yo te.

166Ako Yekova, mi namaa bangire tipa ga bata, ki nimangi sangbaro.

167Mbisimore naka kuti gamo adezirepai; mi nakpi nyemu he gbe.

168Mi naka kuti gamo andika na gamo adezirepai, bambiko gimi apai du ku bara bangiro dunduko.

169Ako Yekova, mo ídi he gi yambahe ye ku bara bangiro; mo fú rugatinapai fere ku sangba ga pai yo!

170Mo ídi he gi zungaditise ye ku bara bangiro; mo bátasi re ku sangba ga pai yo.

171Ngbare apéka pa tambuahe, bambiko mo ninaraba re na gamo rugaapai.

172Mirãre abi bia pa ga pai, bambiko sangbaro dunduko du ni ruru he.

173Mo mbákadi bero ka unda re, bambiko wa sia mi gamo andika.

174Ako Yekova, mi nafaa be nyemu ga bata, ga rugute nga gi pa ngbarago.

175Mo ídi he mbisimore dú ni ungaha mi ki tambua ro, gamo asarangbanga únda re.

176Mi amerẽ ku bani wa ingiingi kandoro; mo gbáta ga moyambu, bambiko bangire ago nga ti sangbaro te.

← Chapter 118 Jump to: Chapter 120 →