Ruth 3

Zande

← Chapter 2 Jump to: Chapter 4 →

1Naomi na kumba ku Ruta ki ya fu ri, “Wire, ka mi gbáta nga baongoda foro te, mo ki sungu zezeredi?

2A nga Boaza nga gumerani te, nga gu ko mo adu na gako amoyambu nga ade? Mo ngére, ko nape zende he wa ga mapunga areme yuru bataka ha yo.

3Mo zúndu tiro, tie, ki mbedi nzeme, ki vodi tiro na ga wene aroko, mo ki ndu ku bataka zende ahe yo. Ono ka mo kúru nga ku bangiri gu kumba re ya, daho ko ka mbu ri riahe ni na mbira he a.

4Ono ho ko ka pi ni sande, mo ki kparia pa gu ba ko ka pi rogo ho; mo ki ndu koyo, ki tumba roko auru nduko, ki pi sande; ko agúmba gu pai foro nga gu mo ka manga.”

5Ri ki ya fu ri, “Gu pai gumba mo fere mi amánga ha kina wa dunduko.”

6Ri ki nimo ka ndu ku bataka ahe yo, ki mangi he dunduko a wa na kumbari agumba ha fu ri.

7Ho Boaza ari ariahe ni ki mbiri he, kpotoko yo ki du pusiapusia, ko ki ndu ka pi sande pati guguda zende ahe. Ri ki ye yee, ki tumba roko auru nduko, ki pi sande.

8Si ki ta du wa gere, bebere yuru, gu kumba re ko ki zigba azigba, ki aria tiko, oni ngére, de ki pi sande ku ba nduko yo!

9Ko ki ya, “Da nga mo?” Ri ki karaga ha ki ya, “Mi nga Ruta nga ga moyambu; mo gbáragi ga roko auru ga moyambu, bambiko mo nga gume kumbami.”

10Ko ki ya, “Wire, ga Yekova maku dú foro; mo yugu weneringiro awere ki susi gu naadu mbata, wa du he were wa mo apeka nga fuo aparanga ya, watadu rungorungo yo na kumukokumuko yo a ya.

11Si du, awere, wire, ka mo gúnde nga ya, mi amánga ha foro dunduko wa gumba mo ho, bambiko gu gimi aboro du bakporo no dunduko, i ini he ya mo nga wene ruru de.

12Kina rengo nga ha, ya mi nga gume kumbamo, ono wa vura du he wo vurũ, boro kina ho nga mbembedi gume ki susi re,

13Mo súngu ni gi yuru re, ho rago ka gira ni, ka ko mángi gu pai foro nga ga agume kumbamo nzunzu, si ki ngba; kina ko ka mangi pai foro nga ga agume kumbamo. Ono ka ko amánga nga gu pai foro nga ga agume kumbamo ya, kina re tigimi nikamanga gu pai foro tie, nga ga agume kumbamo, a wa du Yekova ni ungako. Mo pí sande ke, ki da ku wiso.”

14Ri ki pi sande ku ba nduko yo ki da ku wiso, ri ki guari tie tii ngba nvugboo rago; bambiko ko aya, “Ka boro íni nga ha ya de niye ku bataka ahe no ya.”

15Ko ki ya, “Mo yé na gu baukadi ukadi mo tiro na ni, ki zadi he.” Ri ki zadi he, ko ki fu ringbisiringbisi zende he wa ga mapunga fu ri sita ki tumba ha ku ri ri, ri ki ga ku bakporo yo.

16Ho ri ada ni ku na kumbari yo na kumbari ki ya fu ri, “Gini pai mangi foro, wire?” Ri ki gumba gu pai gu kumba re amangi fu ri dunduko.

17Ri ki ya, “Gi ringbisiringbisi zende he wa ga mapunga sita re ko nifu he fere, bambiko ko niya, ‘Ka mo gá nga ni ku bero koyo du na kumbamo ni ya.’ ”

18Ri ki ya, “Mo súngu zezeredi, wire, daho mo ka ina gu pai ni nikamanga, bambiko gi kumba re aóngoda nga te, daho ko ka digisa gi pai ni re areme.”

← Chapter 2 Jump to: Chapter 4 →