1 Samuel 11

Amharic Dawro DFBE (ጌሻ ማጻፋ) No Year

← Chapter 10 Jump to: Chapter 12 →

1እት አግናፐ ጉይያን፥ አሞና ጋድያ ካቲ ናኦስ ደንዲደ፥ ጋላኣደን ደእያ ያቤሻ ካታማ ዶዲደ ኡቴዳ። ያቤሻ አሳይ ኡባይ አ፥ “ኔን ኑናና ቃላ ጫቁዋ ዎ፤ ኑን ነዉ ሞደታና” ያጌዳ።

2ናኦስ፥ “ታን እትባ ኦናዉ ህንተንቱ ኤኖ ጎፐ፥ ህንተናና ቃላ ጫቁዋ ዎና፤ ሄዌነ፥ ታን ህንተንቶ ኡባዉ ኡሸቻ አይፍያ ዎጫደ ከሳና፤ ያታደ እስራኤልያ ኡባ ካዉሻና” ያጌዳ።

3ያቤሻ ጭማቱ ኡባይ ናኦሳ፥ “እስራኤልያ ቢታ ኡባዉ ኑን ኪታ የዳና ማላ፥ ላፑን ጋላሳ ታካሻርኪ፤ ኑና አሽያዌ ኦንነ ዮፐ፥ ኑን ነዉ ኩሽያ እማና” ያጌድኖ።

4ኪተቴዳዋንቱ ሳኦል ደኢያሳ ግብኣ ቢደ፥ ሀ የዉዋ አሳዉ ኦዴድኖ፤ አሳይ ኡባይ ባረ ቃላ ቂሲደ ዬኬዳ።

5ሄ ዎደ ሳኦል ባረ ቦራቱዋ ላጊደ ጎሻፐ ይያዌ፥ “አሳይ ዋኔዴ? አያዉ ዬኪ?” ያጊደ ኦቼዳ፤ ያቤሻ አሳይ ጌዳዋ አዉ ኦዴድኖ።

6ሀ ቃላ ሳኦል ስሴዳ ዎደ፥ ጾሳ አያናይ አ ቦላን ዎልቃን ዎዳ፤ ሳኦል ሀንቁዋ ፐንቴዳ።

7ሳኦል ዋ ቦራቱዋ አኪደ ሙጸሬደ፥ ኪተቴዳዋንቱን እስራኤልያ ቢታ ኡባዉ የዲደ፥ “ሳኦላነ ሳመላ ካሊደ፥ ከሰና ኦ ቦራቱነ ሀዋዳን ሙጸታና” ያጌዳ። ሄዋፐ ጉይያን፥ መና ጎዳ ዳጋማይ አሳ ቦላ ዎና፥ ኡንቱንቱ እት አሳዳን ከሴድኖ።

8ሳኦል በዜቃን ኡንቱንታ ሺሺደ ፓይዴዳ ዎደ፥ እስራኤልያ አሳይ ሄዙ ጼቱ ሻአ፤ ይሁዳ አሳይ ሀታሙ ሻአ።

9ኡንቱንቱ ኪተት ዬዳዋንታ ሀዋዳን ያጌድኖ፤ “ቢደ ያቤሻ ጋላኣደ አሳቶ፥ ‘ዎንት አዋ ካዉቶ ዎደ፥ ኑን ህንተንታ አሻና’ ያጊደ ኦድተ” ያጌድኖ። ኪተቴዳዋንቱ ቢደ፥ ያቤሻ አሳቶ ሄዋ ኦዴድኖ፤ ኡንቱንቱካ ሎይ ናሸቴድኖ።

10ያቤሻ አሳቱ አሞና አሳቶ፥ “ኑን ዎንት ህንተንቶ ኩሽያ እማና፤ ህንተንቱ ኑና ዶስያዋዳን ኦና ዳንዳዪታ” ያጌድኖ።

11ዎንተ ጋላስ ሳኦል ባረ አሳ ሄዙ ጩጉዋን ሻኬዳ፤ ኡንቱንቱ ሳአይ ዎንትያ ዎደ፥ አሞና አሳቱ ሺቄዳ ሳኣ ገሊደ፥ አዋይ ካዉታና ጋካናዉ አሞና አሳቱዋ ጎራኤድኖ፤ ጎራኤቱሳፐ አቴዳዋንቱ ላኡ አሳይ እትፐ ደኤናዳን ኡባይ ባረዉ ባረዉ ላለቴዳ።

12ሄዋፐ ጉይያን፥ እስራኤልያ አሳይ ሳመላ፥ “ሳኦል ኑ ቦላ ካተታኔ? ያጌዳ አሳቱ ኦኔ? ኡንቱንቱ ኦነንቶ ከስተ፤ ኑን ኡንቱንታ ዎና” ያጌዳ።

13ሽን ሳኦል ኡንቱንታ፥ “እት አሳይነ ሀቼ ሀይቀና፤ አያዉ ጎፐ፥ መና ጎዳይ እስራኤልያ አሼዳ ጋላሳይ ሀቻ” ያጊደ ዛሬዳ።

14ሄዋፐ ጉይያን፥ ሳመል አሳ፥ “ሃይተ፤ ገልጋላ ቦይተ፤ ያን ሳኦል ካትያ ግድያዋ ዛረደ ኤርሴቶ” ያጌዳ።

15ሄዋ ድራዉ፥ አሳቱ ኡባይ ገልጋላ ቢደ፥ ገልጋላን፥ መና ጎዳ ስንን ሳኦል ካትያ ግድያዋ ኤርሴድኖ። ያን ሳሮተ ያርሹዋ መና ጎዳ ስንን ያርሼድኖ፤ ሳኦልነ እስራኤልያ አሳይ ኡባይ ሄ ሳኣን ጾኑዋ ባላ ዎልቃማ ናሸቻን ቦንቼድኖ።

← Chapter 10 Jump to: Chapter 12 →