2 Thessalonians 3

Amharic Dawro DFBE (ጌሻ ማጻፋ) No Year

← Chapter 2 Jump to:

1ዉርሰን ኑናዳን ጾሳ ካልያዋንቶ፥ ጎዳ ቃላይ ህንተንቱ ግዶን፥ ኤለካ አካናዳንነ ቦንቼታናዳን፥ ኑዉ ጾሳ ዎስተ።

2ቃይ አሳይ ኡባይ አማነና ድራዉ፥ ጾሳይ ኑና ናጋራንቻ አሳቱዋፐነ ኢታ አሳቱዋፐ አሻና ማላ፥ ኑዉ ዎስተ።

3ሽን ጎዳይ አማንያዋ፤ እ ህንተና መንናነ ቃይ ኢታፐካ ናጋና።

4ኑን ህንተና አዛዝያዋ ህንተንቱ ሀእ ኦያዋነ ቃይ ስንፐካ ኦናዋ ጎዳይ ኑና ህንተዋን አማን።

5ጎዳይ ህንተንቱ ዎዛና ጾሳ ሲቁዋኮነ ክርስቶስ እምያ ዳንዳያኮ ካለ።

6ኑናዳን ጾሳ ካልያዋንቶ፥ ህንተንቱ ኑፐ አኬዳ ዎጋ ካለናን አዛላ ደኡዋ ደእያ እሻ ኡባፐ ህንተንቱ ሻከታናዳን፥ ኑ ጎዳ የሱስ ክርስቶሳ ሱንን ህንተና አዛዜቶ።

7አያዉ ጎፐ፥ ኑን ህንተናና ደእያ ዎደ አዛልቤና ድራዉ፥ ህንተንቱ ኑዋዳን ሀኒደ ደአናዉ በስያዋ ህንተንቱ ህንተንቱ ሁጲያን ኤሪታ።

8ኑን ህንተፐ ኦስነ ቶኩዋ ግደና ማላ፥ ቃማነ ጋላስ ዳቡሪደነ ጃሚደ ኦደ ደኤዳዋፐ አትን፥ ኦፐነ ቁማ ጮ ምቦኮ።

9ኑን ሄዋ ኦዳዌ ህንተንቱ ኑዋዳን ሀኒደ ደአናዳን፥ ኑን ህንተንቶ ሌምሱዋ ግዳናዳፐ አትን፥ ሄዋ ህንተና ኦቻናዉ ኑዉ ማታይ ይና ግደና።

10አያዉ ጎፐ፥ ኑን ሀራይ አቶ ህንተናና ደኢደካ፥ “ኦናዉ ኮየና ኡራይ ኦንነ ሞፖ” ያጊደ ህንተና አዛዜዶ።

11አያዉ ጎፐ፥ አሳ የዉዋን ገልያዋፐ አትን፥ አይነ ኦናዋንቱ፥ አዛላ ደኡዋ ደእያ አማሬዳ አሳቱ ህንተንቱ ግዶን ደእያዋ ኑን ስሴዶ።

12ኑን ሄዋንቱ ማላ አሳቱ ማራ ደኡዋ ደአናዳንነ ኦደ ቁማ ማናዳን፥ ጎዳ የሱስ ክርስቶሳ ሱንን አዛዜቶነ ዞሬቶ።

13ሽን ህንተንቱ ኑናዳን ጾሳ ካልያዋንቶ፥ ሎኦ ኦሱዋ ኦናዉ አዛሎፕተ።

14ቃይ ኑን ሀ ዳብዳቢያን ኪቴዳ ኪታዉ አዛዘተና ኡራይ ኦንነ ደኦፐ፥ ሄ ኡራ አኬክተ። እ ዬላታና ማላ፥ አፐ ሻከትተ።

15ሽን እሻዳን አ ሴርተፐ አትን፥ ሞርክያዳን ጼሎፕተ።

16ሳሮተ ጎዳይ ባረ ሁጲያን ህንተንቶ ኡባ ዎደነ ኡባ ባጋና ሳሮተ እሞ። ጎዳይ ህንተናና ኡባና ግዶ።

17ታን ጳዉሎስ፥ ሀ ሳሮታ ታ ኩሽያን ጻፋድ፤ ታ ዳብዳቢያ ኡባዉ ሀዌ ታ ፍርማ። ሀዌ ታን ጻፍያ ኦግያ።

18ኑ ጎዳ የሱስ ክርስቶሳ አ ኬካተይ ህንተናና ኡባና ግዶ።

← Chapter 2 Jump to: