John 10

Amharic Dawro DFBE (ጌሻ ማጻፋ) No Year

← Chapter 9 Jump to: Chapter 11 →

1የሱስ፥ “ታን ህንተንቶ ቱሙዋ ኦዳይ፤ ዶርሳ ስኩዋ ፐንግያና ገለናን ሀራሳና ገልያ ኦንነ ካይሱዋነ ፓኑዋ።

2ሽን ፐንግያና ገልያዌ ዶርሳ ሄምያ አሳ።

3ፐንግያ ናግያዌ አዉ ፐንግያ ዶዬ፤ ዶርሳቱካ አ ኮሻ ስሳና፤ እ ባረ ዶርሳቱዋ ኡንቱንቱ ሱንን ሱንን ጼሲደ፥ ካረ ካለና።

4እ ባረዋንታ ካረ ከሴዳዋፐ ጉይያን፥ ኡንቱንቱፐ ስንና ሀመቴ፤ ኡንቱንቱካ አ ኮሻ ኤርያ ድራዉ፥ አ ካሊኖ።

5ሀራ ኡራ ኮሻ ኡንቱንቱ ኤረና ድራዉ፥ አፐ ባቃታናፐ አትን፥ አ ጌዱዋ ካልክኖ” ያጌዳ።

6የሱስ ኡንቱንቶ ሀ ሌምሱዋ ኦዴዳ፤ ሽን እ ኡንቱንቶ አይ ኦድንቶነካ ኡንቱንቱ አኬክበይክኖ።

7የሱስ ቃይካ ኡንቱንቶ፥ “ታን ህንተንቶ ቱሙዋ ኦዳይ፤ ታን ዶርሳቶ ገልያ ፐንግያ።

8ታፐ ካሰ ዬዳ ኡባይ ካይሱዋነ ፓኑዋ፤ ሽን ዶርሳቱ ኡንቱንቱ ግያዋ ስስበይክኖ።

9ፐንጊ ታና፤ ታናን ገልያ ኦንነ አታናዋ። እ ገላናነ ከሳና፤ ቃይ ሎኦ ማታይ ደእያ ሳካ ደማናዋ።

10ካይሱ ዉአናዉ፥ ዎናዉነ ይሳናዉ ይያዋፐ አትን፥ ሀራባዉ ዬና፤ ታን ኡንቱንቶ ደኡ ደአና ማላነ ኩሚደ ፓላሀና ማላ ያድ።

11“ታን ዶርሳ ሎይ ሄምያዋ፤ ዶርሳ ሎይ ሄምያዌ ሄ ዶርሳቱዋ ድራዉ ሀይቄ።

12ሚሻ አኪደ ሄምያ ኡራይ ዋልያ ይያ ዎደ በኢደ፥ ዶርሳቱዋ የግ ባሺደ ባቃቴ። አያዉ ጎፐ፥ ዶርሳቱ አዋንታ ግድክኖ፤ ቃይ እካ ዶርሳቱዋ ሄምያዋ ግደና። ሄዋ ድራዉ፥ ዶርሳቱዋ ኦይቄነ ላሌ።

13ሻሉዋ አኪደ ሄምያዌ ባረ ሻሎ ሄምያ ድራዉነ ዶርሳባይ አ ቆፈና ድራዉ፥ ዶርሳቱዋ አጊደ ባቃቴ።

14“ታን ዶርሳ ሎይ ሄምያዋ፤ ታ አቡ ታና ኤርያዋዳን፥ ታንካ ቃይ ታ አባ ኤራይ። ሄዋዳንካ፥ ታን ታ ዶርሳቱዋ ኤራይ፤ ታ ዶርሳቱካ ታና ኤሪኖ። ቃይ ታን ታ ዶርሳቱዋ ድራዉ፥ ሀይቃናዉ ኮያድ።

16ሀ ስኩዋን ባይና ሀራ ዶርሳቱካ ታዉ ደኢኖ። ታን ኡንቱንታካ አሀናዉ በሴ። ቃይ ኡንቱንቱ ታ ኮሻ ስሳና፤ እት ዉዲ ደአና፤ ሄምያዌካ እቱዋ ግዳናዋ።

17“ታን ታ ሸምፑዋ ዛራደ አካና ማላ፥ አደ እማናዉ ኮይያ ድራዉ፥ ታ አቡ ታና ሲቄ።

18ታን ዶሳደ ታ ሸምፑዋ አ እምያዋፐ አትን፥ ታፐ ኦንነ አከና። ታዉ ታ ሸምፑዋ አ እምያ ማታይ ደኤ፤ ቃይ ዛራደ አካናዉካ ማታይ ደኤ። ታን ሀ አዛዙዋ ታ አዉዋፐ አካድ” ያጌዳ።

19ሄ ሃሳያ ድራዉ፥ አይሁዳቱዋ ግዱዋን ቃይካ ሻኩ መቴዳ።

20ኡንቱንቱፐ ዳርያ ባጋይ፥ “አን ጻላሂ ደኤ! እ ጎዬ! አ ሃሳያ አያዉ ስሲቴ?” ያጌድኖ።

21ሀራቱ ቃይ “ጻላሂ ኦይቄዳ አሳይ ሀዋዳን ሃሳየና፤ ጻላሂ ቆቃ አሳ አይፍያ ጼልሳናዉ ዳንዳዪዬ?” ያጌድኖ።

22የሩሳላመን ጌሻ ጎልያ አንጅሴዳ ጋላሳ ሀሳይስያ ባላይ ጋኬዳ፤ ሳአይ ሄ ዎደ ባልጉዋ።

23የሱስ ጌሻ ጎልያን ሶሎሞና ባራንዳን፥ ያነ ሃነ ሀመቴ።

24አይሁዳቱ የሱሳ ማታን ዩይ አደ፥ “ኔን ኑና አዉደ ጋካናዉ ስሳደ ዎኒ? ኔን ክርስቶሳ ግዶፐ፥ ኑዉ ጌሻደ ኦዳ” ያጌድኖ።

25የሱስ ኡንቱንቶ ዛሪደ፥ “ታን ህንተንቶ ኦዳድ፤ ሽን ታና አማንክታ፤ ታን ታ አቡ ሱንን ኦያ ኪታይ ታባ ማርካቴ።

26ሽን ህንተንቱ ታ ዶርሳ ግደና ድራዉ አማንክታ።

27ታ ዶርሳቱ ታ ኮሻ ስሲኖ፤ ታን ኡንቱንታ ኤራይ፤ ኡንቱንቱካ ታና ካሊኖ።

28ታን ኡንቱንቶ መና ደኡዋ እማይ፤ ቃይ ኡንቱንቱ ኡባካ ሀይቂክኖ። ኦንነ ታ ኩሽያፐ ኡንቱንታ ዎ አካናዉ ዳንዳየና።

29ኡንቱንታ ታዉ እሜዳ ታ አቡ ኦፐነ አ፤ ኦንነ ታ አቡ ኩሽያፐ ኡንቱንታ ዎ አካናዉ ዳንዳየና።

30ታነ ታ አቡ እቱዋ” ያጌዳ።

31አይሁዳቱ የሱሳ ጫዳናዉ ቃይካ ሹቻ ደንድኖ።

32የሱስ ኡንቱንታ፥ “ታን ኦናዉ ታ አቡ ታዉ እሜዳ ዳሮ ሎኦ ኦሱዋ ህንተንታ በሳድ፤ ሄዋንቱፐ ሀቃዋንቱ ድራዉ፥ ታና ሹቻን ጫዳናዉ ኮዪቴ?” ያጌዳ።

33አይሁዳቱ ዛሪደ፥ “ኑን ኔና ሎኦ ኦሱዋ ድራዉ፥ ሹቻን ጫዳናዉ ኮዮኮ፤ ሽን ኔን ጾሳ ቦላ ቦርያ ቃላ ሃሳይያ ድራዉነ ቃይ አሳ ግዳደ ነ ሁጲያ ጾሳ ኦዳ ድራዉ፥ ጫዳናዉ ኮዬቶ!” ያጌድኖ።

34የሱስ ዛሪደ፥ “ህንተንቱ ህግያን ጾሳይ፥ ‘ህንተ ጾሳቱዋ’ ጌዳዌ ጻፈትቤኔ?

35ጾሳ ማጻፋቱዋ ላማናዉ ዳንዳየተና፤ ጾሳይ ባረ ቃላይ ዬዳ አሳቱ፥ ‘ጾሳቱዋ’ ጊደ ጼሴዳዋ ግዶፐ፥

36ታን፥ ‘ታን ጾሳ ናኣ’ ጌዳ ድራዉ፥ ታ አቡ አንጂደ፥ ሳኣ ኪቴዳ ታና፥ ‘ጾሳ ቦላ ቦርያ ቃላ ሃሳያ’ ያጊቴ?

37ታን ታ አቡ ኦያዋ ኦና ዮፐ፥ ታና አማኖፕተ።

38ሽን ታን ኦያዋ ግዶፐ፥ ሀራይ አቶ ህንተንቱ ታና አማናና ዮፐካ፥ ታ አቡ ታናን ደእያዋነ ታንካ ታ አቡን ደእያዋ ኤራናዳንነ አኬካናዳን፥ ታ ኦሱዋ አማንተ” ያጌዳ።

39ቃይካ ኡንቱንቱ አ ኦይቃናዉ ኮዬድኖ፤ ሽን እ ኡንቱንቱፐ ከስ አኪደ ቤዳ።

40ዮሃንስ ካሰ ጻማቅያሳ ዮርዳኖሳ ሻፋፐ ሄፍን የሱስ ፕኒደ፥ ያን ደኤዳ።

41ዳሮ አሳይ የሱሳኮ ዪደ፥ “ዮሃንስ ዎልቃማ ማላታ ኦቤና፤ ሽን እ ሀ ብታንያባ ሃሳዬዳባይ ኡባይ ቱማ” ያጌድኖ።

42ያን ዳሮ አሳይ የሱሳ አማኔዳ።

← Chapter 9 Jump to: Chapter 11 →