John 18

Amharic Dawro DFBE (ጌሻ ማጻፋ) No Year

← Chapter 17 Jump to: Chapter 19 →

1የሱስ ሄዋ ጊደ፥ ጾሳ ዎሴዳዋፐ ጉይያን፥ ባረና ካልያዋንቱና ቀድሮና ግያ ዛንጋራ ፕኔዳ። ሄ ሳኣን አትክልትያ ሳአይ ደኤ፤ የሱስነ የሱሳ ካልያዋንቱ ገሌድኖ።

2የሱሳ አ እሜዳ ይሁዳይ ሄ ሳኣ ኤሬዳ፤ አያዉ ጎፐ፥ የሱስ ኡባ ዎደ ባረና ካልያዋንቱና ሄዋን ሺቄ።

3ሄዋ ድራዉ፥ ካለያ ቄሳቱዋ ካፓቱነ ፓርሳዋቱ ይሁዳና ባናዳን እሜዳ ሮማ ዎታዳራቱነ ጌሻ ጎልያ ናግያዋንቱ ኩራዝያ፥ ያቢያነ ቶራ ኦይቂደ ሄ ሳኣ ቤድኖ።

4የሱስ ባረና ጋካናዉ ሀንያ ኡባባ ኤሪደ፥ ጋጻ ከሲደ፥ “ኦና ኮዪቴ?” ያጌዳ።

5ኡንቱንቱ ዛሪደ፥ “ናዝሬትያ የሱሳ ኮዬቶ” ያጌድኖ። የሱስ ዛሪደ፥ “ታን አ” ያጌዳ። የሱሳ አ እሜዳ ይሁዳይካ ሄዋን ኡንቱንቱና ኤቄዳ፤

6የሱስ፥ “ታን አ” ጌዳ ዎደ፥ ኡንቱንቱ ጉየኮ ሺቂደ፥ ሳኣን ኩንዴድኖ።

7የሱስ ቃይካ፥ “ኦና ኮዪቴ?” ያግ ኦችና ኡንቱንቱ፥ “ናዝሬትያ የሱሳ” ያጌድኖ።

8የሱስ ዛሪደ፥ “ታን አ ግድያዋ ህንተንቶ ኦዳድ፤ ስም ህንተንቱ ታና ኮይያዋ ግዶፐ፥ ሀዋንታ የድተ” ያጌዳ።

9እ፥ “ታ አቦ፥ ኔን ታዉ እሜዳዋንቱፐ ሀራይ አቶ፥ እቱዋካ ባይዛበይከ” ጌዳዌ ፖለታና ማላ፥ ሄዋ ጌዳ።

10ስሞን ጰጽሮሳዉ ማሻይ ደኤ፤ እ ሄ ማሻ ሾድነ ቄሳቱዋ ኡባቱዋ ካፑዋ ቆማ ኡሸቻ ሀይ ሾጪደ፥ ቃንጽ የጌዳ። ሄ ቆማ ሱንይ ማልኮሳ።

11የሱስ ጰጽሮሳ፥ “ነ ማሻ ሾኩዋን ዛራደ ዎ! ታ አቡ ታዉ እሜዳ መቱዋ ጹኣ ታን ኡሽክታ?” ያጌዳ።

12ሻላቃይ፥ ዳሮ ዎታዳራቱነ ቃይ ጌሻ ጎልያ ናግያዋንቱ የሱሳ ኦይቂደ ቃቼድኖ።

13ኮይሮ የሱሳ ሃናኮ አፌድኖ፤ ሃን ሄ ላይ ቄሳቱዋ ካፓቱዋ ግዴዳ ቃያፋ ቦሉዋ።

14“አሳ ኡባ ድራዉ፥ እት አሳይ ሀይቂንቶ ሎአ” ጊደ አይሁዳቱዋ ዞሬዳዌ ቃያፋ።

15ስሞን ጰጽሮስነ ሀራ እት ካልያዌ የሱሳ ካሊደ ቤድኖ። ሄ ሀራ ካልያዋ ቄሳቱዋ ካፑ ኤሬዳ፤ ሄዌ የሱሳና ቄሳቱዋ ካፑዋ ድርሳ ጋርሳ ገሌዳ።

16ሽን ጰጽሮሰ ካረና ድርሳ ፐንግያን ኤቄዳ። ቄሳቱዋ ኡባቱዋ ካፑ ኤርያ ሀራ ካልያዌ ካረ ከሲደ፥ ፐንግያ ናግያ ናትዉ ኦዲደ፥ ጰጽሮሳ ድርሳ ጋርሳ ገልሴዳ።

17ፐንግያ ናግያ ናታ ጰጽሮሳ፥ “ኔን ሀ ብታንያ ካልያዋንቱፐ እቱዋ ግድኪዬ?” ያጋዱ። እ፥ “ቱይት፥ ታን ግድከ” ያጌዳ።

18ሳአይ ሜግያ ድራዉ፥ አይላቱነ ጌሻ ጎልያ ናግያዋንቱ ታማ ኤጺደ፥ ቦንቄዳዋ ዩይ አ ኤቂደ ካሺኖ፤ ጰጽሮስካ ኡንቱንቱና ኤቂደ፥ ሄ ታማ ካሼ።

19ቄሳቱዋ ኡባቱዋ ካፑ፥ የሱሳ ካልያዋንቱባነ አ ትምርትያባ ኦቼዳ።

20የሱስ አዉ ዛሪደ፥ “ታን አሳ ኡባዉ ቆንጭያን ኦዳድ። ታን አይሁዳ ኡባይ ሺቅያ አይሁዳ ዎሳ ጎለንነ ጌሻ ጎልያን ኡባ ዎደ ታማርሳድ፤ ጌማን አይነ ሃሳያበይከ።

21ያትና፥ ኔን ታና አያዉ ኦቻይ? ታን ኦዴዳዋ ስሴዳ አሳ ኦቻ፤ ሄ አሳይ ታን ኦዴዳዋ ኤሬዳ” ያጌዳ።

22የሱስ ሄዋ ጌዳ ዎደ፥ ሄዋን ኤቄዳ ዎታዳራቱዋፐ እቱ የሱሳ ባቂደ፥ “ቄሳቱዋ ኡባቱዋ ካፑዋ ቦላ ሀዋዳን ዛራይ?” ያጌዳ።

23የሱስ ዛሪደ፥ “ታን ባላባ ሃሳዬዳዋ ግዶፐ፥ ሀዋን ደእያ አሳ ኡባዉ ኦዳ፤ ሽን ታን ቱሙዋ ሃሳዬዳዋ ግዶፐ፥ ታና አያዉ ባቃይ?” ያጌዳ።

24ሄዋ ድራዉ፥ ሃን፥ ቃሸት ኡቴዳ የሱሳ፥ ቄሳቱዋ ኡባቱዋ ካፑዋ፥ ቃያፋኮ የዴዳ።

25ጰጽሮስ ሄዋን ኤቂደ፥ ታማ ካሼ፤ ሀራንቱ አ፥ “ኔን ሀ ብታንያ ካልያዋንቱፐ እቱዋ ግድኪዬ?” ያጌዳ። ጰጽሮሰ፥ “ቱይት፤ ታን ግድከ” ያጊደ ካዴዳ።

26ቄሳቱዋ ኡባቱዋ ካፑዋ ቆማቱዋፐ እቱዋ፥ ጰጽሮሰ ሀይ ቃንጼዳ ብታንያ ዳቡ ጰጽሮሳ፥ “ታን ኔና አናና ዳሮ አታክልትያ ግዶን በአበይክታዬ?” ያጊደ ኦቼዳ።

27ጰጽሮሰ ቃይካ ካዴዳ፤ ኤለካ ኩቱ ዋስ አጌዳ።

28ኡንቱንቱ የሱሳ ቃያፋ ጎለፐ ሮመ አሳ አይስያዋ ኦሶ ጎልያ አፌድኖ። ሳአይ ዎንታ ጉራ፤ አይሁዳቱ ፓስጋ ቦንችያ ጋላሳ ቁማ ማናዉ፥ ባረንቱ ሁጲያዉ ቱነና ማላ፥ ሮመ አሳ አይስያዋ ኦሶ ጎልያ ገልበይክኖ።

29ሄዋ ድራዉ፥ ጵላጾስ ኡንቱንቱኮ ካረ ከሲደ፥ “ሀ ብታንያ ህንተንቱ አያን ሞቲቴ?” ያጌዳ።

30ኡንቱንቱ፥ “እ ኢታባ ኦቤናዋ ግድንቶ፥ ኑን አ ኔኮ አሆኮ” ያጌድኖ።

31ጵላጾስ ዛሪደ ኡንቱንቶ፥ “ህንተንቱ አ አፊደ፥ ህንተንቱ ህጊ ግያዋዳን፥ አ ቦላ ፕርድተ” ያጌዳ። አይሁዳቱ፥ “ኦናነ ዎያ ማታይ ኑዉ ባዋ” ያጌድኖ።

32ሀዌ ሀኔዳዌ የሱስ አይ ማላ ሀይቁዋ ሀይቃነንቶ ኤርሳናዉ ሃሳዬዳዌ ፖለታናሳ።

33ጵላጾስ ባረ ኦሱዋ ጎለ ላኤንዋ ገሊደ፥ የሱሳ ጼሲደ፥ “ኔን አይሁዳ ካቴ?” ያጊደ አ ኦቼዳ።

34የሱስ ጵላጾሳ፥ “ሀ ኦሻ ኔን ኔፐ ኦቻይዬ ዎይ ሀራ አሳይ ነዉ ታባ ኦዴዴ?” ያጌዳ።

35ጵላጾስ ዛሪደ፥ “ታና አይሁዳ አሳ ጋይ? ነ ዛራቱነ ቄሳቱዋ ካፓቱ ኔና ታዉ አ እሜድኖ፤ ኔን አያ ኦዲ?” ያጌዳ።

36የሱስ፥ “ታ ካዉተይ ሀ አላምያና ግደና። ታ ካዉተይ ሀ አላምያና ግዴደንቶ፥ ታና አይሁዳቶ አ እመናዳን፥ ታዉ ኦያዋንቱ ታዉ ኦለታና፤ ሽን ታ ካዉተይ ሀ አላምያና ግደና” ያጌዳ።

37ሄዋ ድራዉ፥ ጵላጾስ የሱሳ፥ “ያትና፥ ኔን ካቴየ?” ያጊደ ኦቼዳ። የሱስ ዛሪደ፥ “ኔን ታና ካትያ ጋዳ። ታን ቱሙዋ ማርካታና ድራዉ የለታድ፤ ቃይ ሄዋ ድራዉ፥ ሀ አላምያ ያድ። ቱሙዋ ባጋ ግዴዳ ኦንነ ታን ግያዋ ስሴዳ” ያጌዳ።

38ጵላጾስ፥ “ቱሙ አዬ?” ያጌዳ። ጵላጾስ ሄዋ ጌዳዋፐ ጉይያን፥ አይሁዳቱዋኮ ካረ ከሲደ፥ “ታን አን አይ ባላነ ደማበይከ።

39ሽን ፓስጋ ቦንችያ ጋላስ፥ እት አሳ ታን ህንተንቶ ቃሹዋፐ ብልያ ዶያይ ደኤ፤ ታን ህንተንቶ አይሁዳቱ ካትያ ብልያዋ ኮዪቴ?” ያጌዳ።

40ኡንቱንቱ ዛሪደ፥ ባረንቱ ኮሻ ቁ ኦደ፥ “ባርባና ብላፐ አትን፥ አ ግደና!” ያጌድኖ። ሽን ባርባን ፓኑዋ።

← Chapter 17 Jump to: Chapter 19 →