Joshua 14

Amharic Dawro DFBE (ጌሻ ማጻፋ) No Year

← Chapter 13 Jump to: Chapter 15 →

1ቄስያ ኤልኣዛረ፥ ነዌ ናአይ ኢያሱነ እስራኤልያ ዛራቱዋ ካፓቱ፥ ካናነ ጋድያ ኡንቱንታ ያራን ያራን ሻክና፥ ኡንቱንቱ ጋኬዳ ሄራቱ ሀዋፐ ካሊደ ጻፈቴዳዋንታ።

2መና ጎዳይ ሙሴ ባጋና አዛዜዳዋዳን፥ ኡንቱንቱ ላታ ጋዲ ኡዱፑናነ ባጋ ግድያ ዛረቶ ሳማን ሻከቴዳ።

3አያዉ ጎፐ፥ ሙሴ ላአነ ባጋ ግድያ ዛረቶ ዮርዳኖሳ ሻፋፐ ሄፍን አዋይ ዶልያ ባጋና ካሰ ጋድያ እም ዎዳ፤ ሽን ሌዊያ ዛረቶ ኡንቱንቱ ግዱዋን ላታ ጋድያ እምቤና።

4ዮሴፎ ናናይ ምናሳነ ኤፍሬማ ጌተቲደ ላኡ ዛረ ግዴድኖ። ሙሴ ሌዊያ ዛረቶ ላታ ጋድያ እምቤና፤ ሽን ሄዋ ግሻዉ ኡንቱንቶ ደእያ ካታማቱዋነ ኡንቱንቱ ባረንቱ መህያ ዉድያነ ዶርሳ ዉድያ ሄምያ ሄን ጋደቱዋ እሜዳ።

5መና ጎዳይ ሙሳ አዛዜዳዋዳን፥ እስራኤልያ አሳይ ጋድያ ሻክ አኬዳ።

6እት ጋላስ ይሁዳ አሳይ ኢያሱኮ ገልጋል ሺቄድኖ። ኡንቱንቱፐ እቱ፥ ቀኒዝያ ይፉነ ናአይ ካሌብ ኢያሳ ሀዋዳን ያጌዳ፤ “ኑን ቃዴሳ-ባርነን ደእያ ዎደ፥ መና ጎዳይ፥ ጾሳ አሳ ግድያ ሙሴዉ ነባነ ታባ ኦዴዳዋ ኤራሳ።

7መና ጎዳ ቆማይ ሙሴ ጋድያ ዎቻደ ያናዳን፥ ቃዴሳ-ባርነፐ ታና ኪትያ ዎደ፥ ታዉ ላይይ ኦይታማ። ሄ ዎደ ታን አዉ አማነትያ ኦዱዋ አሃደ ኦዳድ።

8ታን መና ጎዳ ታ ጾሳ ፖሎ ካላድ፤ ሽን ታናና ቤዳ አሳቱ አሳ ዎዛና ያሻን ኮልድሴድኖ።

9ሄ ጋላስ ሙሴ፥ ‘ኔን መና ጎዳ ታ ጾሳ ፖሎ ካሌዳ ድራዉ፥ ነ ገዲ የዳ ቢታይ መናዉ ነዉነ ነ ዛርያዉ ላትያ ጋድያ ግዳናዋ’ ጊደ ጫቄዳ።

10“አነ አኬካ፤ መና ጎዳይ ሀ የዉዋ ሙሴዉ ሃሳዮደፐ፥ ኦይታማነ እቼሹ ላይ ግዴዳ። ሄ ዎደፐ እስራኤልያ አሳይ ዎራን ስመረትሽን፥ ሀቼ ጋካናዉ ጾሳይ ታና ፓጻ ዎዳ። በአ፥ ሀእ ታ ላይይ ሆስፑን ታማነ እቼሻ ግዴዳ።

11ግድናካ ሀእ ታዉ ደእያ ምኖተይ በን ሙሴ ታና ኪትያ ዎደ ደእያ ምኖተካ ማላ። ታን ሀእካ ኦለታናዉነ አያ ግዶፐነ ኦናዉ በን ሄ ዎደዋዳን ዎልቃማ።

12ሄዋ ድራዉ፥ መና ጎዳይ ታዉ እማና ጌዳ ሀ ገዘ ጋድያ ሀእ ታዉ እማ። ሄ ዎደ፥ አናቀቱ ሄ ጋድያን ደእያዋነ ኡንቱንቱ ካታማቱካ ግታነ ግምበቴዳዋንታ ግድያዋ ኑን ሃሳይሽን ኔን ነ ሁጲያዉ ስሳዳ። ሽን መና ጎዳይ ታናና ግዶፐ፥ እ ጌዳዋዳን፥ ታን ኡንቱንታ ሄ ጋድያፐ የደርሳና” ያጌዳ።

13ሄዋፐ ጉየ ኢያሱ ይፉነ ናኣ ካሌባ አንጂደ፥ ከብሮና አዉ ላታ ኦደ እሜዳ።

14መና ጎዳ እስራኤልያ ጾሳ ፖሎ ካሌዳ ድራዉ፥ ከብሮና ጋዲ ሄ ዎድያፐ ሀቼ ጋካናዉ፥ ቀኒዝያ ይፉነ ናኣ ካሌባዉ ላታ ቢታ ግዴዳ።

15ካሰ ከብሮና ሱንይ ቅርያት-አርባአ ጌተቴ፤ አርባአ ግያ ብታኒ አናቀቱዋ ኡባፐ አዳ አሳ። ሄዋፐ ጉይያን፥ ሄ ጋዲ ኦላፐ ሸምፔዳ።

← Chapter 13 Jump to: Chapter 15 →