Joshua 20

Amharic Dawro DFBE (ጌሻ ማጻፋ) No Year

← Chapter 19 Jump to: Chapter 21 →

1ሄዋፐ ጉይያን መና ጎዳይ ኢያሳ ሀዋዳን ያጌዳ፤

2“እስራኤልያ አሳዉ ሀዋዳን ያጋ፤ ‘ታን ሙሴ ባጋና ህንተንታ አዛዜዳዋዳን፥ አሳይ ባቃት ቢደ አትያ ካታማቱዋ ዶርተ።

3አይ አሳይነ አኬከናንነ ኤረናን አሳ ዎፐ፥ ያ ባቃት ቢደ፥ ሱ አችያዋፐ አታናዋ።

4አሳ ዎዳዌ ሄ ካታማቱዋፐ እቱዋኮ ባቃት ቢደ፥ ካታማ ገልያ ፐንግያን ኤቂደ፥ ሀኔዳባ ሄ ካታማ ጭማቶ ኦዶ። ኡንቱንቱ ባረንቱ ካታማ አፊደ፥ እ ደአና ሳኣ እምና፥ እ ኡንቱንቱና ያን ደኦ።

5ሱ አችያዌ አ ካሊደ ዮፐ፥ ሄ ካታማ ጭማቱ አ አደ እሞፕኖ። አያዉ ጎፐ፥ ባረ ሾሩዋ እ ቆፒደ፥ ባረ ካሰ ሞርከተ ድራዉ ዎቤና።

6ሽቁዋ ስንን ፕርዳዉ እ ኤቃና ጋካናሽ ሄ ዎድያን ደእያ ቄሳቱዋ ኡባቱዋ ካፑ ሀይቃና ጋካናዉ፥ ሄ ካታማን ደኦ። ሄዋፐ ጉይያን፥ ባቃቲደ ከሴዳ ካታማ ጉየ ዛሪደ፥ ባረ ሶ ገሎ’ ያጋ” ያጌዳ።

7ሄዋፐ ጉየ እስራኤልያ አሳይ ንፍታሌማ ገዝያን፥ ጋሊላን ደእያ ቀዴሻነ አ ሄን ጋደቱዋ፥ ኤፍሬማ ገዝያን ደእያ ሰኬማነ አ ሄን ጋደቱዋነ ይሁዳ ገዝያን ደእያ ቅርያት-አርባአ ዎይ ከብሮነ ዱማዬድኖ።

8ዮርዳኖሳ ሻፋፐ ሄፍንን፥ ያርኮፐ አዋይ ዶልያ ባጋ ዎራን፥ ቃሳን ደእያ ሮቤላ ዛራቱዋ ጋድያፐ ቤጸራ፥ ጋደ ዛራቱዋ ጋድያፐ ጋላኣደን ደእያ ራሞታነ ምናሰ ዛራቱዋ ጋድያፐ ባሳነን ደእያ ጎላና ዱማዬድኖ።

9እስራኤልያ አሳ ኡባዉነ ኡንቱንቱ ግዶን ደእያ በተቶ ዱማዬዳ ካታማቱ ሀዋንታ፤ ኤረናን ደኢደ አሳ ዎዳ አይ አሳይነ፥ ሽቁዋ ስንን ኤቃና ጋካናዉ፥ ሱ አችያዋ ኩሽያን ሀይቀናዳን፥ ሄ ካታማቱዋፐ እቱዋኮ ባቃታናዉ ዳንዳዬ።

← Chapter 19 Jump to: Chapter 21 →