Ezekiel 30

Amharic Gamo (ጋሞ ማጻፋ)

← Chapter 29 Jump to: Chapter 31 →

1ጎዳ ቃላይ ታኮ ዪዲ፥

2«ሃይሶ ኣሳ ናዉ! ሃይሳ ማላ ጋዳ ቲንቢቴ ዮታ፡ ኡባ ሃሪዛ ጎዳይ፥ « ‹ዉ! ዉይ› ጋ ዋሳ፤ ‹ሄ ጋላሳይስ ኣዬ ኣና!› ጋ።

3ጋላሳይ ማቲዴስ! ጎዳ ጋላሳይ ጋኪዴስ! ሄ ጋላሳይ ሻራ ጋላሳ፤ ካዎቴታ ኡባስ ባሻ ጋላሳ።

4ጊብጼ ቦላ ኦላይ ያና፤ ቶጵያ ቦላካ ቱጋይ ያና። ዳሮቲ ጊብጼን ሹኬቲ ኩንዳና፤ ኢዚ ኣቆታይ ቦንቄታና፤ ኢዚ ዮቻቲካ ላሌታና።

5«ቶጵያይኔ ፑጼይ፥ ሉዴይኔ ኣራቤይ፥ ሊቢያይኔ ጫቆ ቃላ ቢታ ኣሳይ ጊብጼራ ኢሲፌ ማሻን ዉራና።

6«ኡባ ሃሪዛ ጎዳይ፥ ‹ጊብጼራ ዙፔቲዛይቲ ኩንዳና፤ ኢዛ ኦቶሬቲዛ ሚኖቴይ ያና፤ ሚጊዶሌፔ ቢዲ ኣሲዋ ጋካናስ፥ ኢስቲ ማሻን ሃይቃና› ጌስ።

7ቡላ ቢታታ ጊዶን ኢስቲ ኣ ቡላ ጊዳና፤ ኢስታ ካታማቲካ ላሌቲዳ ካታማታ ጊዶፌ ኢሳ ጊዳና።

8ታኒ ጊብጼን ታማ ኦይዛ ዎዴ፥ ኢዞ ማዲዛይቲ ኡባይ ኩንዲዛ ዎዴ፥ ታኒ ጎዳ ጊዲዳይሳ ኢስቲ ሄ ዎዴ ኤራና።

9«ሄ ጋላስ ታ ቃስታኔቲ ማርካቤን ቢዲ ባ ጋ ኡቲዳሶሆፔ ኬሳናስ ቶጵያ ዳጋንና፤ ጊብጼይ ማን ሚቴቲዛ ዎዴ ኢስታ ጬጬይ ኦይካና፤ ቱማፔ ሄ ጋላሳይ ያና»።

10ኡባ ሃሪዛ ጎዳይ፥ «ባቢሎኔ ካዎ ናቡካዳናጾሬ ኩሼን ቆዳይ ባይንዳ ጊብጼ ዴሬ ኣሳ ታ ይሳና።

11ካዎቴታ ኡባፌ ሜንጼ ኢታ ጊዲዳ ኢዚኔ ኢዛ ኦሳንቻቲ ቢታዮ ይሳናስ ያና ማላ ኦና፤ ባንታ ማሻ ጊብጼ ቦላ ሾዲዲ ቢታዮ ኣሃ ጻላ ሂስታና።

12ኣባዬ ሻፋ ታኒ ሜሊሳና፤ ቢታዮካ ኢታ ኣሳታስ ባይዛና፤ ኣላጋታ ኩሼን ቢታዮኔ ኢዚን ዲዛ ኡባ ታ ቡላ ሂስታና፤ ታኒ ጎዳይ ሃይሳ ዮታዲስ።

13«ኤቃ ጾሳታ ታ ይሳና፤ ሜምፒሳን ዲዛ ሚስሌታ ታ ዲፒ ሂስታና፤ ሃይሳፌ ጉዬ ጊብጼን ሃላቃታናይ ዴና፤ ቢታይ ቦላ ታ ያሻቴ ኪታና።

14ታኒ ጳጺሮሴ ቢታ ቡላ ሂስታና፤ ጻኖሴ ቦላ ታማ ዬዳና፤ ቴቤሴ ቦላ ቂጻቴ ዬጋና።

15ጊብጼስ ሚጻ ጊዲዳ ሲና ቦላ ታ ባሻ ጉሳና፤ ቆዳይ ባይንዳ ቴቤሴ ኣሳ ታ ይሳና።

16ታኒ ጊብጼ ቦላ ታማ ኤና፤ ሲኔይ ጬጬን ቡልኣኬታና፤ ቴቤሴይ ዳምባላን ሚቴታና፤ ሜምፒሳይ ዱጾንታ ጬጬ ጊዶ ጌላና።

17ሄሊዮቴኔ ቡባስቴ ናቴቲ ማሻን ሲፌታና፤ ሄ ካታማቲካ ዲኤታና።

18ታኒ ጊብጼ ቃምባራ ሜንዛ ዎዴ ጻፊናሴን ጋላሳይ ቃማና፤ ሄሳፌ ጉዬ ኢዛ ኦቶሬቲዳ ኢዚ ሚኖቴይ ኩንዳና፤ ኢዛ ሻራን ካሜታና፤ ኢዚ ጉታቲካ ዲኤታና።

19ሄሳ ጊሻስ ታ ጊብጼ ቦላ ታ ቂጻቴ ኤሃና፤ ኢስቲካ ታኒ ጎዳ ጊዲዳይሳ ሄ ዎዴ ኤራና» ጊዴስ።

20ኑኒ ዲኤቲዳ ታማኔ ኢሲን ላይን፥ ኮይሮ ኣጊናን፥ ላፑን ጋላሳን ጎዳ ቃላይ ታኮ ዪዲ፥

21«ሃይሶ ኣሳ ናዉ! ታኒ ጊብጼ ካዎ ቄሴ ሜንዲስ፤ ኢዚ ፓጻና ማላ ኢዛ ቄሴይ ኮሌቲቤና፤ ዎይኮ ኢዚ ማሻ ኦይኪ ዳንዳያና ማላ ኢዛ ኩሼይ ማቃን ኮሌቲቤና።

22ሄሳ ጊሻስ ኡባ ሃሪዛ ጎዳይ፥ ‹ታኒ ጊብጼ ካዎ ፓሮኔ ቦላ ዴንዳዲስ፤ ኢዛስ ፓጻ ቄሴዛራኔ ሜቆ ቄሴዛራ ናምኣ ጋ ሜንና፤ ኢዛ ማሻይ ኢዛ ኩሼፔ ኬሲ ኤኪ ዎና ማላ ታ ኦና።

23ታኒ ጊብጼ ኣሳ ካዎቴታ ጊዶን ላላና፤ ሃራ ዴሬታ ጊዶንካ ዜራና።

24ታኒ ባቢሎኔ ካዎ ቄሴ ሚንዳ ታ ማሻካ ኢዛ ኦይና። ጊዶ ኣቲን ፓሮኔ ቄሴዛ ታ ሜንና፤ ኢዚካ ባ ሞርኬዛ ሲንን ኢታ ማዱንጺዳ ኣሳ ማላ ቶቃና።

25ባቢሎኔ ካዎ ቄሴ ታ ሚንና፤ ጊዶ ኣቲን ፓሮኔ ቄሴይ ዳቡራና፤ ታኒ ታ ማሻ ባቢሎኔ ካዎ ኩሼን ኦይን ኢዚካ ቃሺን ታኒ ጎዳ ጊዲዳይሳ ኢስቲ ኤራና።

26ታ ጊብጼታ ካዎቴታ ጊዶን ላላና፤ ዴሬታ ጊዶንካ ዜራና፤ ሄሳፌ ጉዬ ታኒ ጎዳ ጊዲዳይሳ ኢስቲ ሄ ዎዴ ኤራና› ጌስ» ጊዴስ።

← Chapter 29 Jump to: Chapter 31 →