Song of Solomon 1

Amharic Gamo (ጋሞ ማጻፋ)

Jump to: Chapter 2 →

1ማዛሙሬ ኡባፌ ኣዛ ሶሎሞኔ ማዛሙሬ።

2«ኔ ሲቆይ ዎይኔ ኡሻፌ ኣ ኡፋይሴስ፤ ኔ ሜቴርሻን ዛራ ዛራዳካ ታና ዬራ።

3ኔ ቲዬቲዛ ሺቶይ ኣይ ማላ ሳዊዜ! ኔ ሱንይ ጼይጌቲዛ ዎዴካ ኣይ ማላ ኡፋይሲዜ! ጌላኦቲ ኔና ሄሳ ጊሻስ ሲቄቴስ።

4ታና ኔናራ ኤካዳ ባ፤ ሃ ያ፥ ኣኔ ናምኣይ ኢሲፌ ዎጾስ! ታ ካዎ፥ ታና ኔ ቁሩጾ ጊዶ ጌል» ጋዱስ። «ኢዛን ኑኒ ኣይ ኬና ኡፋዬቲዶኒ! ኑኒ ኢዛ ሲቆ ዎይኔ ኡሻፌካ ኣዲ ናሾስ። ቱሙካ ማጫሳይ ኡባይ ኔና ሲቃናስ ቤሴስ» ጊዳ።

5«ኢንቴኖ ዬሩሳላሜ ማጫሳቶ፥ ሲዪቴ! ታኒ ካሬ ጊዲኮካ ማላ ሎኦ። ታ ካሬቴይ ቄዳሬ ዱንካኔ ማላ፤ ጊዶ ኣቲን ታ ሜይ ካዎ ሶሎሞኔ ኬ ማጋላሻታ ማላ።

6ታ ሜ ካሬዳይ ኣዋ ሴላ፤ ታኒ ካሬ ጊዲዳ ጊሻስ ታና ካፒቴ። ታ ኣዪ ና ኢሻቲ ታናራ ኦዬቲዲ ታና ዎይኔ ኣታኪልቴ ናጋናስ ዎዳ፤ ሄሳ ጊሻስ ታኒ ታይሳ ናጋቤኬ።

7ታ ሲቆዞ! ኣኔ ታስ ዮታ፤ ኔ ዶርሳ ዉዴ ሄሚዛይ ኣዋኔ? ጋላስ ኣዋፔ ኔ ኢስታ ጉሪሲዛይ ኣዋኔ? ኔና ዴማናስ ኔ ላጌታ ዉዴ ካላሼ ኣይስ ጮ ቶይላቲዛ ማጫሳ ማላ ጊዶ?» ጋዱስ።

8«ሃ ማጫ ኡባፌ ኣ ሎኢዛ ማላንቻዬ! ታ ዲዛሶ ኤሮንታ ኣጊኮ ዶርሳቲ ቢዳ ጌዶ ካላዳ ያ፤ ኔ ዴይሻ ላቃታካ ሄንንቻታ ዱንካኔ ማታን ሄማ።»

9«ታ ጎዴ! ጊብጼ ካዎስ ፓራ-ጋሬ ጎቺዛ ፓራታ ጊዶን ዲዛ ማጫ ፓራይ ማላ ሎኣሳ።

10ኔ ሻጋላሶይ ሎዡ ጊዴስ፤ ኔ ቆይ ኢንቁ ጌቴቲዛ ሴሎን ኣሌቄቲዴስ።

11ኑኒ ኔስ ቢራን ኣሌቄቲዳ ዎርቃ ጌጼ ኦሲሳና» ጊዴስ።

12«ካዎይ ማዳን ኡቲ ዲሺን ታ ሺቶ ሳዎይ ኬ ጊዶ ኡባን ቱኑ ጊዴስ።

13ታ ሲቆዚ ታ ንታ ጊዶን ዲዛ ሳዊዛ ካርቤ ጹንቴ ማላ።

14ታ ሲቆዚ ኤን-ጋዴ ጌቴቲዛ ዎይኔ ቶኪዛ ጋዴን ሞኪዳ ባዞ ጪሻ ማላ» ጋዱስ።

15«ታ ጎዴ! ኔኒ ኣይ ማላ ሎኣይ! ኔኒ ኣይ ማላ ሎኣይ! ኔ ኣይፌቲ ሃራጴ ማላ ሎኤቴስ» ጊዴስ።

16«ታ ሲቆዞ፥ ኔኒካ ኣይ ማላ ሎኣይ! ኔ ኬሃ ሎኣሳ፤ ኑ ሂይ ጪሊላ ማታ ማላ ኡፋይሴስ» ጋዱስ።

17«ኑ ኬ ቱሲ ሊባኖሴ ዚጋ፤ ካራይካ ጺዳን ኦሴቲዴስ» ጊዴስ።

Jump to: Chapter 2 →