1 Samuel 3

Amharic Gofa GFBEVF (ጌሻ ማፃፋ)

← Chapter 2 Jump to: Chapter 4 →

1ናአይ ሳሜል ኤልፐ ጋርሳራ ጎዳስ ኦስ፤ ጎዳ ቃላይ ሄ ዎደ ዳሮ አልኦ፤ ቆንጨካ ባዋ።

2አይፈይ ዳቡርን ዋየትድ ፄልያ ኤል እስ ቃማ ባ በሳን ዝንእስ።

3ሄ ዎደ ፆሳ ፆምፐይ ቡሮ ቶእቤና፤ ጎዳ ታቦተይ ደእያ ኬን ሳሜል ስክስ።

4ጎዳይ ሳሜላ ፄግስ፤ ሳሜል፥ “ዬ” ግድ ኮይስ።

5እ ኤልኮ ዎፅ ብድ፥ “ኔኒ ፄግን ሄኮ ያስ” ያግስ። ሽን ኤል፥ “ታ ነና ፄጋብከ፤ ባዳ ዝንአ” ያግን፥ ሳሜል ብድ ዝንእስ።

6ቃስ ጎዳይ፥ “ሳሜላ” ያግድ ናምአን ፄግን፥ ሳሜል ደንድድ፥ ኤልኮ ብድ፥ “ኔኒ ፄግን ሄኮ ያስ” ያግስ። ሽን ኤል፥ “ታ ናአዉ፥ ታ ነና ፄጋብከ፤ ባዳ ዝንአ” ያግስ።

7ጎዳ ቃላይ ቡሮ እያዉ ቆንጭቦና ግሾ፥ ሳሜል ጎዳ ግደይሳ ኤርቤና።

8ጎዳይ ሳሜላ ሄን ፄግን ደንድድ፥ ኤልኮ ብድ፥ “ኔኒ ፄግን ሄኮ ያስ” ያግስ። ሄሳን ጎዳይ ናኣ ፄግዳይሳ ኤል አኬክድ፥

9“ባዳ ዝንአ፤ እ ነና ፄግያባ ግድኮ፥ ‘ጎዳዉ፥ ኦዳ፤ ታ ነ አይለይ ስአይስ’ ያጋ” ግድ፥ ኤል እያዉ ኦድን፥ ሳሜል ባ በሳ ብድ ዝንእስ።

10ሄሳፈ ጉየ፥ ጎዳይ ይድ እያ ማታን ኤቅድ፥ ካሰይሳዳ፥ “ሳሜላ፥ ሳሜላ” ያግድ ፄግስ። ሳሜል፥ “ነ አይለይ ስኤስ፥ ኦዳ” ያግስ።

11ጎዳይ ሳሜላ፥ “ሄኮ፥ ታኒ አሳ ሀይስ ኢትያ እስባ እስራኤለ ቦላ ኦና ሀናይስ።

12ሄ ጋላስ ታኒ ኤል ሶ አሳ ቦላ ኦና ጋዳ ኦድዳ ኡባ ኮይሮፐ ዉርሰ ጋካናዉ ፖላና።

13ኤል ኤርድ ሴሮና አግዳ እያ ናይታ ናጋራ ግሾ፥ ታኒ እያ ሶ አሳ ቦላ መርናዉ ፕርዳናይሳ እያዉ ካሰ ኦዳ ዎስ።

14ሄሳ ግሾ፥ ‘ኤል ሶ አሳ ናጋራይ ያርሾንነ እሞን ፖሎ አቶ ጌተተና’ ያጋዳ ታኒ እያ ሶ አሳስ ካሰ ጫቃስ” ያግስ።

15ሳሜል ዎንታና ጋካናዉ ስክስ፤ ዎንትን ደንድድ፥ ፆሳ ኬ ፐንግያ ዶይስ። ሳሜል ቆንጭዳባ ኤልስ ኦዳናዉ ያይስ።

16ኤል፥ “ታ ናአዉ፥ ሳሜላ” ያግድ ፄግስ። ሳሜል፥ “ዬ” ግድ ኮይስ።

17ኤል፥ “ጎዳይ ነዉ ኦድዳይ አይቤ? ታፐ አይኮካ ቆሶፓ፤ ኔኒ ፆሳይ ነዉ ኦድዳባፐ እስባካ ታፐ ቆስኮ፥ ፆሲ ነና ፕርዶ” ያግድ ኦይችስ።

18ሳሜል አይኮካ ቆሶና ኡባ ኤልስ ኦድስ። ኤል፥ “እ ጎዳ፤ ባና ሎእዳባ ኦ” ያግስ።

19ሳሜል ድጭሸ ብስ፤ ጎዳይ እያራ ደኤስ። ሳሜል ኦድዳባፐ እስ ቃልካ ሳአን ዎና።

20ዳነፐ በርሳበ ጋካናዉ፥ ሳሜል ቱማ ጎዳ ናበ ግደይሳ እስራኤለ አሳ ኡባይ ኤርስ።

21ጎዳይ ሴሎን ቆንጬስ፤ ያን ባ ቃላን ባናተ ሳሜላስ ቆንጭሴስ።

← Chapter 2 Jump to: Chapter 4 →