1 Samuel 30

Amharic Gofa GFBEVF (ጌሻ ማፃፋ)

← Chapter 29 Jump to: Chapter 31 →

1ዳዊቲነ እያ አሳት ሄን ጋላስ ፅቅላጋ ጋክዶሶና። አማለቃት ነገባነ ፅቅላጋ ኦልድ፥ ፅቅላጋ ታማን ፁግዶሶና።

2ፅቅላጋን ደእያ ማጫሳነ ናአፐ ጭማ ጋካናዉ ደእያ ኡባ ድእዶሶና፤ ኤንታፈ እስ አስካ ዎና ኤንታ ኡባ ድእድ ኤፍዶሶና።

3ዳዊቲነ እያ አሳት ፅቅላጋ ጋክያ ዎደ ካታማይ ታማን ፁገትዳይሳነ ኤንታ ማቸት፥ አደ ናይትነ ማጫ ናይት ድኤትዳይሳ በእዶሶና።

4ዳዊቲነ እያራ ደእያ አሳይ ባንታ ዎልቃይ እፃና ጋካናዉ ዋስድ ዬክዶሶና።

5ዳዊታ ማቸት እዝራኤለ አክናሆማነ ካሰ ናባላ ማችያ ቃርመሎሳ አብግያ ናምአይካ ድኤትዶሶና።

6እያ አሳይ ባንታ አደ ናይትነ ማጫ ናይት ድኤትዳ ግሾ ይሎትድ ዳዊታ ሹቻን ጫዳናዉ ኦደትን፥ ዳዊቲ ዳሮ ኡንኤትስ። ግዶሽን፥ ዳዊቲ ጎዳን ባ ፆሳን ምነትስ።

7ዳዊቲ አብመለከ ናኣ ካህንያ አብያታራኮ፥ “ኤፉድያ ኤካዳ ያ” ያግን፥ አብያታር ኤፉድያ ዳዊታስ ኤህስ።

8ዳዊቲ፥ “ታኒ፥ ታና ኦልያ አሳታ ካላዳ ጋካኔ?” ያግድ ጎዳ ኦይችስ። ጎዳይ፥ “ኤ፤ ኤንታ ካላዳ ባ፤ ቱማ ኤንታ ነ ጋካና፤ ቱማ ድኡዋ ዛራና” ያግስ።

9ዳዊቲነ እያራ ደእያ ኡሱፑን ፄቱ አሳት ደንድድ ቦሶራ ሻፋ ጋክያ ዎደ ኤንታፈ ጉ አሳት ያን አትዶሶና።

10ናምኡ ፄቱ አሳይ ሻፋ ፕናናዉ ዳሮ ዳቡርዶሶና። ሽን ዳዊቲነ ኦይዱ ፄቱ አሳይ ካልዶሶና።

11ኤንቲ እስ ግብፀ አስ ደንባን ደምድ፥ ዳዊታኮ ኤህድ፥ እያዉ ሃነ ካ እምዶሶና።

12ባላሰ ኦንጎቾነ ናምኡ ዎይነ ኑካ እያዉ እምን ምድ ጋሽትስስ። እ ሄ ጋላስነ ሄ ቃማ ካ ሞና ሃ ኡዮና ጋምእስ።

13ዳዊቲ፥ “ኔኒ ኦደ አይሌ? አዉፐ ያዲ?” ያግድ አድያ ኦይችስ። አደይ፥ “ታኒ አማለቃ አድያስ አይለትዳ ግብፀ አስ፤ ሄ ጋላሳፐ ካሰ ታ ሳከትን፥ ታ ጎዳይ ታና የግ አግድ ብስ።

14ኑኒ ይሁዳ ዛዋ፥ ከልታወታ ዱገሀ ባጋነ ካለባ ዱገሀ ባጋ ኦልድ ፅቅላጋ ታማን ፁግዳ” ያግስ።

15ዳዊቲ፥ “ኔኒ ታና ሄ ኦልዳ ጩጋታኮ ካለናዉ ዳንዳአይ?” ያግድ ኦይችስ። እ ዛሪድ፥ “ኔኒ ታና ዎና መላነ ታ ጎዳስ አዳ እምከ ጋዳ ታዉ ፆሳን ጫቃ፤ ታኒ ነና ኤንታኮ ካለና” ያግስ።

16ዳዊቲ ካለድ ኤንታኮ ጋስ። ኤንቲ ፍልስፄመፐነ ይሁዳፐ ዳሮ ድኦ ድእዳ ግሾ ኡፋይትድ ምሸነ ኡይሸ ላለትድ ኡትዶሶና።

17ሄ ጋላስ ኦማርሳፈ ዶምድ ዎንተ ጋላስ ኦማርስ ጋካናዉ ዳዊቲ ኤንታ ሾጭስ። ግማለ ቶግድ ባቃትዳ ኦይዱ ፄቱ ፓንታፐ አትሽን፥ ሀር እስ አስካ አትቤና።

18አማለቃ አሳት ኤፍዳ ኡባ፥ ባ ናምኡ ማቸታራ እስፈ ዳዊቲ ዎስስድ ኤክስ።

19አሳት ድእድ ኤፍዳባፐ እስባይካ ፓጭቤና፤ ናእ ዎይኮ ጭም፥ አደይ ዎይኮ ማጭ፥ ሄሳዳካ ኤንቲ ድእድ ኤፍዳ ሀራባ ኡባይ ፓጮና ደእሽን ዳዊቲ ኡባ ዛርስ።

20ዳዊቲ ዶርሰ፥ ዴሸነ መሄ ኡባ ድእስ፤ ዳዊቲ አሳይ እ ድእዳ መህያ ሀንኮ መህያፐ ስንራ ላግሸ፥ “ሀይስ ዳዊታ ድኦ” ያግዶሶና።

21ዳዊቲ ዳቡርድ ቦሶራ ሻፋ አቻን አትዳ ናምኡ ፄቱ አሳኮ ይስ። ኤንቲ ዳዊታነ እያራ ደእያ አሳ ሞካናዉ ከይዶሶና። ዳዊቲ ባ አሳራ ሺቅድ ኤንታ ሳሮስ።

22ሽን ዳዊታራ ብዳ አሳታ ግዶፈ ፓና ኢታ አሳት፥ “ኤንቲ ኑራ ቦና ግሾ ኑኒ ዛሪድ ኤህዳባፐ አይኮካ ኤንታዉ ሻኮኮ፤ ኤንቲ ባንታ ናይታነ ባንታ ማቸታ ኤክድ ቦና” ያግዶሶና።

23ዳዊቲ ዛሪድ፥ “ታ እሻቶ፥ ጎዳይ ኑስ እምዳባን ህንተ ሀይሳዳ ኦናዉ በሰና። እ ኑና ናግድ፥ ኑና ኦልዳ ጩጋታ ኑስ አድ እሚስ።

24ህንተ ግያባ ኦንካ ኤከና። ኦለታናዉ ብዳይሳታነ ኑባ ናግሸ ሀይሳን ጋምእዳይሳታ ግሾይ እስኖ፤ ኡባይ ግና ሻከታና” ያግስ።

25ሄ ጋላሳፐ ዶምድ ሀች ጋካናዉ እስራኤለ ቢታን ሄስ ህገነ ዎጋ ግድስ።

26ዳዊቲ ፅቅላጋ ጋክዳ ዎደ ባ ላገ ግድዳ ይሁዳ ጭማታኮ፥ “ጎዳ ሞርከታፐ ድኤትዳባፐ ታኒ ህንተዉ እመይሳ ኤክተ” ያግድ ጉራ የድስ።

27እ ሄሳ ቤተለን፥ ራሞታ ነገባንነ ያትራን ደኤይሳታስ፥

28አሮኤራን፥ ስፍሞታን፥ ኤሽታሞአንነ

29ራካላን፥ ይራህማኤላን፥ ቄና ካታማታን፥

30ሆርማና፥ ቦራሳና፥ አታካንነ

31ከብሮናን ደኤይሳታስ የድስ። እነ እያ አሳት ዩይዳ በሳ ኡባን ደእያ አሳስ የድስ።

← Chapter 29 Jump to: Chapter 31 →