2 Chronicles 4

Amharic Gofa GFBEVF (ጌሻ ማፃፋ)

← Chapter 3 Jump to: Chapter 5 →

1ሄሳፈ ጉየ፥ ሶሎሞነይ አዱሳተ ላታሙ ዋ፥ ጎምፓይ ላታሙ ዋ፥ ቃተይ ታሙ ዋ ግድያ ያርሾ በሳ ናሰ ብራታፐ ኦስስስ።

2ቃስ ናሰ ብራታ ሴርስድ፥ ዶናይ ያ ጋፃፐ ሀ ጋፃ ጋካናዉ ታሙ ዋ፥ አዱሳተይ እቻሹ ዋነ ዩሾይ ሀስታሙ ዋ ግድያ አባ ሳነ መስስ።

3አባ ሳነ ዶናን ካረ ባጋራ ዩይ አድ፥ እያራ ኦይከትድ መትዳ ምስለት ደኦሶና፤ ሄ ምስለት ናምኡ ማራን ደእያ ቦራታ ምስለታ።

4ሄ አባ ሳነ ናሰ ብራታፐ መትዳ ታማነ ናምኡ ቦራታ ምስለታስ ዞኩዋን ኡትስ። ቦራታፐ ሄት ፑደሀ ባጋ፥ ሄት ዉሎሀ ባጋ፥ ሄት ዱገሀ ባጋ፥ ሄት ቃስ ዶሎሀ ባጋ ስሚድ ፄልያባ ዳኖሶና። አባ ሳነ ኤንታ ቦላ ኡትስ፤ ኤንታስ ጉየ ባጋይ ግዶኮ ስም ኡትስ።

5አባ ሳነይ እስ ታካ መላ ኦርደ፤ እያ ዶናይ ዋንጫ ዶና መላ፤ ሱፈ ጪሽ ዳኔስ። ሄ አባ ሳነይ ኡሱፑን ታሙ ሙኩሉ ልትሮ ግድያ ሃ ኦይከይሳ።

6ሶሎሞነይ ሜጨትያ ታሙ ከረታ፤ ኦስስድ፥ እቻሻ ኡሻቻ ጋርሳ ባጋራ፥ እቻሻ ሀድርሳ ባጋራ ዎስ። ኤንታን ፁሳ ያርሾ አሾይ ሜጨቴስ፤ ሽን አባ ሳነ ሃን ካህነት ሜጨቶሶና።

7ሄሳፈ ጉየ፥ ሶሎሞነይ ኤንታዉ እመትዳ ሀልቹዋዳ ፆምፐ ዎያ ታሙ ኮጫታ ዎርቃፈ ኦድ፥ እቻሻ ኡሻቻ ባጋራ፥ እቻሻ ሀድርሳ ባጋራ ፆሳ ኬን ዎስ።

8ታሙ ፃርጴዛታ ኦድ፥ እቻሻ ኡሻቻ ባጋራ፥ እቻሻ ሀድርሳ ባጋራ ፆሳ ኬ ግዶን ዎስ። ቃስ ፄቱ ድስተታ ዎርቃፈ ኦስ።

9ሶሎሞነይ ካህነታስ ግዶ ዳባባ፥ ካረ ባጋ ግታ ዳባባ ጊግስስ፤ ዳባባስ ፐንገታ ጊግስድ፥ ፐንገታ ናሰ ብራታን ላንፅስ።

10አባ ሳንያ ፆሳ ኬፈ ጋርሳን ዶሎሀ ባጋን ዎስ።

11ክራም ከረታ፥ አካፋታነ ፃሮታ መስ፤ ክራም ካዋ ሶሎሞነስ ፆሳ ኬን ኦሶ ኦድ ፖልስ።

12እ ኦዳ ኦሶትካ ናምኡ ቱሳታ፥ ቱሳታ ሁጰን ዎያ ሳነ መላ ናምኡ ጉምቦታ፥ ቱሳታ ቦላ ደእያ ናምኡ ጉምቦታ አሌቅስያ ናምኡ ግተ ዳንያ ሳንላታ፥

13እስ እስ ቱቅያ ቦላ ናምኡ ማራን ናሰ ብራታፐ ኦሰትዳ እስ እስ ፄቱ ኦሮማነ ቴራ ምስለታ፥ ኩመ ኦይዱ ፄቱ ኦሮማነ ቴራ ምስለታ፥

14ኦይደታነ ኦይደታ ቦላ ኡትያ ሜቻ ታሙ ከረታ፥

15አባ ሳነይነ እያፐ ጋርሳን ደእያ ታማነ ናምኡ ቦራ ምስለታ፥

16ከረታ፥ አካፋታ፥ ቃጰታነ ሀራ ሚሸታ ኡባ። ክራም-አብ ካዋ ሶሎሞነስ ፆሳ ኬ ኦሱዋስ መዳ ሀ ሚሸታ ኡባ ጌሻ ናሰ ብራታፐ መስ።

17ካዎይ ሶሎሞነይ ሱኮታፐነ ፃሬዳፐ ግዶን፥ ዮርዳኖሰ ደንባን ደእያ ናሰ ብራታ ሼሽያ በሳን ሀ ኡባ ኦስስስ።

18ናሰፐ መትዳ ሀ ሚሸ ኡባይ ዳሮ ግድዳ ግሾ፥ አይ መላ ዴፅያኮ ልከይ ኤረትቤና።

19ሶሎሞነይ ፆሳ ኬን ደእያ ሚሸታ ኡባ ዎርቃፈ ኦስስስ። ሄስካ ዎርቃፈ ኦሰትዳ ያርሾ በሳ፥ ጎዳ ስንን ዎያ ኡይይ ኡትያ ፃርጴዛ፥

20ዎጋ መላ ኡባፈ ጌሻ በሳ ስንን ፖአና መላ ፆምፐ ዎያ ዎርቃ ኮጫ፥ ዎርቃ ፆምፐታ፥

21ዋላህ ባይና ዎርቃፈ ኦሰትዳ ጪሻ ምስለታ፥ ፆምፐታነ ቃጰታ፥

22ፆምፐ ቶይስያባታ፥ ፃሮታ፥ እፃነ ጩይስያባታነ ታማ ኤክያ ቃጰታ። ሀ ሚሸት ኡባይ ጌሻ ዎርቃፈ ኦሰትዶሶና። ፆሳ ኬስ ካረ ባጋ ፐንገታነ ኡባፈ ጌሻ በሳ ገልያ ፐንገታ ዎርቃን ትይስ።

← Chapter 3 Jump to: Chapter 5 →