2 Chronicles 5

Amharic Gofa GFBEVF (ጌሻ ማፃፋ)

← Chapter 4 Jump to: Chapter 6 →

1ሶሎሞነይ ፆሳ ኬ ኦሶ ኡባ ፖልዳፐ ጉየ እያ አዋይ ዳዊቲ ጎዳስ ዱማይድ ዎዳ ብራ፥ ዎርቃነ ሀራ ሚሸታ ኡባ ኤህድ፥ ፆሳ ኬ ቡቁራ ምንጅያ በሳን ዎስ።

2ሄሳፈ ጉየ፥ ካዎይ ሶሎሞነይ ጎዳ ቃላ ጫቆ ታቦትያ ዳዊታ ካታማ ግድዳ ፅዮነፐ ኤሀና መላ እስራኤለ ጭማታ፥ እስራኤለ ኮቻታነ ሶ አሳ ሀላቃታ የሩሳላመ ሺሽስ።

3እስራኤለ አሳ ኡባይ ላፑን አጌናን፥ ሻቃራ ባለይ ቦንቸትያ ዎደ ካዋኮ ሺቅዶሶና።

4እስራኤለ ጭማት ኡባይ ጋክን፥ ሌወት ታቦትያ ደንዶሶና።

5ሌወትነ ካህነት ታቦትያ፥ ዱንካንያነ እያ ግዶን ደእያ ጌሻ ሚሸታ ኡባ ቶክድ ኤህዶሶና።

6ካዎይ ሶሎሞነይነ እያራ ደእያ እስራኤለ ማባራ ኡባይ ታቦትያ ስንን ሺቅድ፥ ታይባናዉ ዳንዳኤቶና ዳሮ ዶርሰነ መሄ ያርሽዶሶና።

7ካህነት ጫቆ ታቦተይ ፆሳ ኬ ኡባፈ ጌሻ በሳ ኤህድ፥ ክሩበታ ምስለታ ቀፈታፐ ጋርሳራ ዎዶሶና።

8ምጨትድ ኡትዳ ክሩበታ ቀፈት ታቦትያነ ታቦትያ ቶክያ ካሶታ ካምዶሶና።

9ካሶት ዳሮ አዱሰ ግድያ ግሾ፥ ኤንታ ፄራይ ኡባፈ ጌሻ በሳ ስንን ደእያ ጌሻ በሳን ኤቅዳ አስ በአናዉ ዳንዳኤስ፤ ሽን ጌሻ በሳፈ ካረራ በንተና። ኤንቲ ሀች ጋካናዉ ሄ በሳን ደኦሶና።

10እስራኤለ አሳይ ግብፀ ቢታፈ ከይዳ ዎደ ጎዳይ ኤንታራ ጫቅዳ ኮሬባ ዙማን ሙሰይ ዎዳ ናምኡ ሎቸ ሹቻታፐ አትሽን፥ ታቦትያ ግዶን ሀራባይ ባዋ።

11ሄ በሳን ደእያ ካህነት ኡባይ ባንታ ኦያ በሳን በሳን ሻከቶና ደእሸ ባንታና ጎዳስ ዱማይዶሶና።

12ማዝሙረ ዛማርያ ሌወት ኡባይ፥ አሳፍ፥ ሄማንነ ኤዶታፐ፥ ኤንታ ናይትነ ኤንታ ዳቦት ሊኖ ጌተትያ ማኦ ማእዶሶና። ሄ ማኡዋ ማእድ፥ ዳላ፥ ዲነ ማስንቆ ኦይክድ፥ ያርሾ በሳፈ ዶሎሀ ባጋራ ኤቅዶሶና።

13ፄታነ ላታሙ ካህነት ሞይዘ ፑናናዉ ኤንታራ ኤቅዶሶና። ኤንቲ ኡባይ ሞይዘ ፑንሸ፥ ዳላ ቃሸ፥ ዲ ዲፅሸነ ሀራ ሚሸታ ካእሸ፥ “ጎዳይ ኬሀ! እያ ሲቆይ መርናሳ” ያግድ ጎዳ ሳቦሶና።

14ጎዳ ቦንቾይ ፆሳ ኬ ኩምዳ ግሾ፥ ሻራ ጋሶን ካህነት ባንታ ኦሱዋ ኦናዉ ዳንዳእቦኮና።

← Chapter 4 Jump to: Chapter 6 →