2 Corinthians 3

Amharic Gofa GFBEVF (ጌሻ ማፃፋ)

← Chapter 2 Jump to: Chapter 4 →

1ኑኒ ዛሪድ ኑና ሳቢኖዬ? ዎይኮ ሀራ አሳዳ፥ ሳባ ዳብዳብያ ህንተዉ የዳናዉ ዎይኮ ህንተፈ ኤካናዉ ኑና ኮሽዬ?

2አስ ኡባይ ህንተና ኤራና መላነ ናባባና መላ ህንተ ኑ ዎዛናን ፃፈትድ ደእያ ኑ ዳብዳበ።

3ህንተ ቃላመን ግዶናሽን፥ ደኦ ፆሳ አያናን፥ ሹቻ ቦላ ግዶናሽን፥ አሳ ዎዛናን ፃፈትዳይሳታነ ኑናን ሀጋዘትዳ ክርስቶሳ ዳብዳበ ግደይሳ በስደታ።

4ኑ ሄሳ ግዳይ፥ ክርስቶሳ ባጋራ ፆሳን አማኖይ ኑስ ደእያ ግሾሳ።

5ኑ ሄሳ ኦናዉ ዳንዳእዳይ ፆሳ ዎልቃናፐ አትሽን፥ ኑኒ ኑ ዎልቃን አይኮካ ኦናዉ ዳንዳኦኮ።

6ኑ ኦራ ጫቁዋ ኦሳንቾታ ግዳና መላ ፆሳይ ኑና ዳንዳእስስ። ሄ ኦራ ጫቆይ ጌሻ አያናን በንትዳይሳፈ አትሽን፥ ፃፈትዳ ህገን ግደና። ህገይ ዎስ፥ ሽን ጌሻ አያናይ ደኦ እሜስ።

7ሹቻ ቦላ ፃፈትዳ ህገይ እመትያ ዎደ ፆሳ ቦንቾይ ቆንጭስ። ሙሰ ሶምኡዋን ደእያ ቦንቾይ ይሸ ብያባ ግድኮካ፥ እስራኤለ አሳይ እያ ሶምኡዋ ትሽ ኦድ ፄላናዉ ዳንዳእቦኮና። ህዛ፥ ሀይቆ ኤህያ ህገይ ሄሳ መላ ቦንቾን ቆንጭኮ፥

8ያትን፥ ጌሻ አያናን ኦሰትያ ኦሱዋ ቦንቾይ ዋንድ አኔ?

9አሳ ቦላ ፕርዳ ኤህያ ህገይ ቦንቾ ግድኮ ያትን፥ አሰ ፅልስያ ኦራ ኦገይ ዋንድ አድ ቦንቸተኔ?

10ካሰ ቦንቾ ግድዳይሳ ሀእ አያ ቦንቾይ ደኤይሳራ ጋ በእያ ዎደ ቦንቾይ ባይናባ ግድስ።

11ጉ ዎደስ ቆንጭድ ጉየፐ ይዳይስ ሀይሳዳ ቦንቸትኮ፥ መርናዉ ደኤይስ ዋንድ አድ ቦንቸተኔ?

12ኑስ ሀይሳ መላ ኡፋይሳይ ደእያ ግሾ፥ ዬላቶና ኦደቶስ።

13ኑኒ፥ እስራኤለ አሳይ ይሸ ብያ ቦንቹዋ ዉርሰ በኦና መላ ባ ሶምኡዋ ካምዳ ሙሰ መላ ግዶኮ።

14ሽን ኤንታ ዎዛናይ ዶጭስ። ሀች ጋካናዉ ኤንቲ ጋልአ ጫቁዋ ናባብያ ዎደ ኤንታ ዎዛናይ ሄ ካማን ካመትድ ደኤስ። ሄ ካማይ ክርስቶሳ ፃላላን ቃረቴስ።

15ሽን ሀች ጋካናዉካ ኤንቲ ሙሰ ማፃፋ ናባብያ ዎደ ኡባን ሄ ካማይ ኤንታ ዎዛና ካሜስ።

16ሽን ኦንካ ጎዳኮ ስምያ ዎደ አዉደካ ሄ ካማይ ቃረቴስ።

17ጎዳይ አያና፤ ጎዳ አያናይ ደእያ በሳን ላአተ ደኤስ።

18ኑኒ ኡባይ ካመትቦና ሶምኦን ጎዳ ቦንቹዋ በአና። ኑኒ አያና ግድዳ ጎዳ ማላ ዳናናዉ ቦንቾፈ ቦንቾን ላመታና።

← Chapter 2 Jump to: Chapter 4 →