2 Corinthians 4

Amharic Gofa GFBEVF (ጌሻ ማፃፋ)

← Chapter 3 Jump to: Chapter 5 →

1ህዛ፥ ፆሳይ ባ ማሮተን ሀ ኦሱዋ ኑስ እምዳ ግሾ፥ ኑኒ ኡፋይስ ቃንፆኮ።

2ኑኒ ዬላያ ጌማ ኦሶ ኡባ አግዳ፤ ገነ ኦሶ ኦኮ፤ ፆሳ ቃላ ዎርዶራ ዋላኮኮ። ቱማ ቆንጨን ሃሳይሸ፥ አሳ ኡባ ካሀይ ኑና ኤካና መላ ፆሳ ስንን ኑና ሺሾስ።

3ኑ ኦድያ ዎንገላይ ጌምዳባ ግድኮካ፥ ጌምዳይ ዮ ኦገን ደእያ አሳሳ።

4ሀ አላምያ ሃርያ ፆሳይ አማኖና አሳ ዎዛና ጎዝስ። ኤንቲ ፆሳ መላ ግድዳ ክርስቶሳ ቦንቾ ዎንገላ ፖኡዋ በኦና መላ ድግስ።

5ኑኒ፥ የሱስ ክርስቶሲ ጎዳ ግደይሳነ ኑ እያ ግሾ ህንተ ኦሳንቾ ግደይሳ ኦዶስፐ አትሽን፥ ኑባ ኦዶኮ።

6“ማን ፖኦይ ፖኦ” ግዳ ፆሳይ፥ ክርስቶሳ ሶምኡዋን ፖእያ ፆሳ ቦንቹዋ ኤራ ፖኡዋ እማናዉ ባ ፖኡዋ ኑ ዎዛናን ፖእስስ።

7ሽን ኡባፈ አያ ዎልቃይ ኑባ ግዶናሽን፥ ፆሳባ ግደይሳ በሳናዉ ሀ ቦንቾ ሻሎይ መቃ ሚሸ ግድዳ ኑ አሳተን ደኤስ።

8ኑ ኡባ ባጋራካ ዋየትዳ፥ ሽን መቀረትቦኮ። ኑስ ሀድርስ ግድስ፥ ሽን ኡፋይስ ቃንፅቦኮ።

9ኑ፥ ሞርከታን ጎደትዳ፥ ሽን ላገ ይቦኮ። ኑ ሞርከታን ሾጨትድ ኩንድዳ፥ ሽን ይቦኮ።

10የሱሳ ደኦይ ኑ አሳተን ቆንጫና መላ እያ ሀይቁዋ ኡባ ዎደ ኑ አሳተን ቶክድ ዩዮስ።

11የሱሳ ደኦይ ሀይቅያ ኑ አሳተን ቆንጫና መላ ፓፃ ደእያ ኑኒ እያ ግሾ፥ ኡባ ዎደ ሀይቆስ አድ እመቶስ።

12ህዛ፥ ሀይቆይ ኑናን ኦያ ዎደ ደኦይ ህንተናን ኦስ።

13ጌሻ ማፃፋን፥ “ታ አማናስ፤ ሄሳ ግሾ ኦዳስ” ያገትስ። ሄሳ መላ አማኖይ ኑስ ደእያ ግሾ ሃሳዮስ።

14ጎዳ የሱሳ ሀይቆፐ ደንዳ ፆሳይ፥ ኑናካ የሱሳራ ሀይቆፐ ደንናይሳነ ህንተራ እስፈ ባ ስን ሺሻናይሳ ኤሮስ።

15ሄስ ኡባይ ሀንዳይ ህንተ ግሾሳ። ፆሳ አ ኬሀተይ ዳሮ አሳ ጋክያ ዎደ አሳይ ፆሳ ቦንቹዋስ ዳሮ ጋላታ እማና።

16ሄሳ ግሾ፥ ኑኒ ኡፋይስ ቃንፆኮ። ኑ በንትያ አሳተይ ዳቡርሸ ብያባ ግድኮካ፥ ኑ አያና አሳተይ ጋላስ ጋላስ ኦራፄስ።

17ሀእስ ኑኒ ዋየትያ ሀ ካዉሻ ዋየይ፥ ኡባፈ ኬህ ግታትያ መርና ቦንቹዋ ኑስ እምሳና።

18ኑኒ በንትያባ ግዶናሽን፥ በንቶናባ ፄሎስ። በንትያባይ ሀእሳ፥ ሽን በንቶናባይ መርናሳ።

← Chapter 3 Jump to: Chapter 5 →