Genesis 24 — Amharic Gofa GFBEVF (ጌሻ ማፃፋ)

2አብራሃመይ ባ አይልያ፥ ባ ሶ አሳ ኡባስ ሀላቃትያ፥ ባ አቆ ኡባ ቦላ ሱንትዳይሳ ሀይሳዳ ያግስ፥ “ነ ኩሽያን ታ ጉልባታ ኦይካ፤

3ታኒ ኤንታ ግዶን ደእዳ ካናነታ ማጫ ናይታፐ ታ ናኣስ ማቾ ኦይቾና መላ፥ ጎዳን፥ ሳሎነ ሳአ ፆሳ ሱንን ታኒ ነና ጫቅሳይስ፤

4ሽን ኔኒ ታ የለትዳ ቢታ፥ ታ ዳቦታኮ ባዳ፥ ታ ናአ ይሳቃስ ማቾ ኦይቻ” ያግስ።

5እያ አይለይ፥ “ሄ ማጫስያ ታራ ያናዉ ዶሶና እፅኮ፥ ነ ናአ ኔኒ ይዳ ቢታ ጉየ ኤፎ?” ያግድ ኦይችስ።

7ጎዳይ፥ ሳሉዋ ፆሳይ፥ ታና ታ አዋ ሶፐነ ታ የለትዳ ቢታፈ ከስዳይስ ታዉ፥ ‘ነ ዘረስ ታኒ ሀ ቢታ እማና’ ያግድ ጫቅዳይስ፥ ኔኒ ታ ናኣስ ያፐ ማቾ ደማና መላ፥ እ ባ ኪታንቹዋ ኔፐ ስን ኪታና።

8ሄ ማጫስያ ኔራ ያናዉ ዶሶና እፅኮ፥ ሀ ታኒ ነና ጫቅስዳ ጫቆይ ነዉ ጎመ ግደና፤ ሽን ታ ናአ ያ ኡባካ ኤፎፓ” ያግስ።

9አይለይ ባ ጎዳ አብራሃመ ጉልባታ ኦይክስ፤ ሄ ኦዳስ ጫቅስ።

10ሄሳፈ ጉየ፥ አይለይ ባ ጎዳ ግማለታፐ ታማ ኤክድ፥ ባ ጎዳ ሚሽያፐካ ሙሩታ ሙሩታ ኤክ ብድ ማሰጰፆመ ቢታን ናኮራ ካታማ ጋክስ።

11ኦማርስ፥ ማጫስ ሃ ትካናዉ ያ ዎደ፥ ካታማፐ ጋፃን ሃ ኦላ ማታን ባ ግማለታ ጉልባትስስ።

12እ ዎስሸ፥ “ጎዳዉ፥ ታ ጎዳ አብራሃመ ፆሳዉ፥ ሀች ታኒ ቆፓዳ ይዳይሳ ታዉ ጊግሳ፤ ቃስ ታ ጎዳ አብራሃመስ ኬሀባ ኦ።

13ሄኮ፥ ታኒ ሀ ሃ ፑልቱዋ ማታን ኤቃይስ፤ ሀ ካታማ ማጫ ናይት ሃ ትካናዉ ሃ ዮሶና።

14ታኒ፥ ‘አነ ኦቱዋ ዝቅ ኦዳ ታና ሃ ኡሻ’ ግያ ዎደ፥ እያ፥ ‘ሄኮ ኡያ፤ ቃስ ነ ግማለታ ታኒ ኡሻና’ ግያራ፥ ህና ነ አይልያ ይሳቃስ ኔኒ ዶርዳሮ ግዶ፤ ኔኒ ታ ጎዳስ ኬሀባ ኦዳይሳ ታኒ ሄሳን ኤራና” ያግስ።

15ቡሮ እ ዎሳ ዛሮና ደእሽን፥ እርብቃ ሃ ኦቶ ቶካዳ ፑቱ ጋሱ። እያ ባቱኤላ ናአ፥ ባቱኤል ምልካ ናአ፥ ምልካ አብራሃመ እሻ ናኮራ ማችዉ።

16እርብቂ ዳሮ የገልስን አደ ኤሮና ጌላኦ። ፑልቱዋ ዱገ ዎዳ፥ ባ ኦቱዋ ኩንዳ ባናዉ ደንዳሱ።

17ያንን፥ ሄ አይለይ ኢኮ ዎፅ ብድ እዮ፥ “ነ ታና ጉ ሃ ኡሻርክ” ያግስ።

18እያ፥ “ኤሮ ታ ጎዳዉ፥ ኡያ” ያጋሱ። ኤለሳዳ ኦቱዋ ባ ሀሸፐ ዎዳ፥ ገድ ኦ ኦይካዳ እያ ኡሻሱ።

19እያ ኡሽዳፐ ጉየ፥ “ነ ግማለትካ አላና ጋካናዉ ታኒ ኤንታዉ ሃ ዱቃና” ያጋሱ።

20አትዳ ሃ ኤለሳዳ ጎንጌን ትጋዳ፥ ሀራ ሃ ዱቃናዉ ኦላ ዎፃሱ፤ ግማለት ኡባይ አላና ጋካናስ፥ ሃ ኦላፈ ዱቃ ዱቃ ኤሀዳ ጎንገን ትጋዳ ኡሻሱ።

21እ ቆፕድ ይዳ ቆፋ ጎዳይ እንጀይሸ ደእያኮነ ኤራናዉ አደይ ስእ ግድ እዮ ፄሌስ።

22ግማለት ሃ ኡይ ስምን፥ አደይ እቻሹ ግራመ ባጋ ሲን አያ ዎርቃ ፄታነ ታሙ ግራመ ግድያ ናምኡ ዎርቃ ሳጋዮታ ጊግስስ።

23እዮ፥ “ኔኒ ኦደ ናኤ? አነ ታዉ ኦዳ፤ ነ አዋ ሶን ኑስ አቅያ በሲ ዳኔ?” ያግስ።

24እያ፥ “ታኒ ባቱኤላ ናአ፤ ባቱኤል ምልካ ናኮራስ የልዳ ናአ።

25ኑ ሶን ግድያ ካለይነ ሀርቆይ ደኤስ፤ ቃስ ህንተ አቃናዉ በሲ ደኤስ” ያጋሱ።

26አደይ ጉልባትድ ጎዳ ጎይንድ፥

27ሀይሳዳ ያግስ፤ “ታ ጎዳስ ኬሄይሳነ አማነተይሳ አግቦና ጎዳይ፥ ታ ጎዳ አብራሃመ ፆሳይ ጋላተቶ፤ ታኒ ይሽን፥ ጎዳይ ታና ታ ጎዳ ዳቦታ ሶ ካለስ” ያግስ።

28ናእያ ዎፃ ባዳ፥ ባ አየ ሶን ደእያ አሳስ ሀንዳባ ኦዳሱ።

29እርብቃስ ላባ ጌተትያ እሺ ደኤስ። ላቢ ካረ ከይድ ሃ ፑልቱዋ ማታን ደእያ አድያኮ ዎፅስ።

30ሲ ዎርቃነ ባ ምቸ ኩሸን ደእያ ሳጋዮታ በእዳ ዎደ እርብቃ አደይ ባና ግዶይሳ ኦድን ስእዳ ዎደ፥ ከይድ አድያኮ ብስ። አደይካ ግማለታራ ፑልቱዋ ማታን ኤቅዳይሳ ደምስ።

31እያኮ፥ “ጎዳይ ነና አንጅዳይሶ፥ ሃያ፥ ኔኒ ካረን አይስ ኤቃዲ? ታኒ ነዉ ኬነ ግማለታስካ በሰ ጊግሳስ” ያግስ።

32ያትን አደይ ሶ ገልስ። ላቢ ግማለታ ጫና ብልድ፥ ካለነ ለ ግማለታስ እማስ። ቶሆ ሜጫናዉ እያስነ እያራ ደእያ አሳስ ሃ ኤህስ።

33ካ እያ ስን አስ። ሽን፥ “ታኒ ታና ኤህዳባ ህንተዉ ኦዶና ደአሸ ካ ሚከ” ያግስ። ላቢ፥ “ያኮ ኦዳ” ያግስ።

34ሄሳ ግሾ፥ እ፥ “ታኒ አብራሃመ አይልያ።

35ጎዳይ ታ ጎዳ ዳሮ አንጅዳ ግሾ እ ዱረትስ። ዶርሰ፥ ሚዝ፥ ብራ፥ ዎርቃ፥ አደ አይለታ፥ ማጫ አይለታ፥ ግማለታነ ሀረታ እያዉ እሚስ።

36ታ ጎዳ ማችያ ሳራ ባ ጭማተ ላይን እያዉ አደ ናአ የላሱ። ያትን እ ባዉ ደእያባ ኡባ እያዉ እሚስ።

37ታ ጎዳይ ታና ሀይሳዳ ጫቅስስ፥ ‘ታኒ ደእያ ካናነ ቢታ ማጫ ናይታፐ ታ ናኣስ ማቾ ኦይቾፋ።

38ሽን ታ አዋ አሳኮ፥ ታ ዳቦታኮ ባዳ ታ ናኣስ ማቾ ኦይቻ’ ያግስ።

39ታኒ ታ ጎዳ፥ ‘ናእያ ታራ ያናዉ ዶሶና እፅኮች?’ ያጋዳ ኦይቻስ።

40እካ፥ ታኒ እያ ስንን ኪተትዳ ጎዳይ ባ ኪታንቹዋ ኪታና፤ ኔኒ ታ ናኣስ ታ አዋ አሳፐ፥ ታ ኮቻፈ ማቾ ደማና መላ፥ ነ በይሳካ እንጀያና።

41ኔኒ ታ ኮቻታኮ ብን፥ ኤንቲ ነዉ እዮ እሞና እፅኮ፥ ሄ ዎደ ነዉ ጫቆይ ጎመ ግደና” ያግስ።

42“ታኒ ሀች ሄ ፑልቱዋኮ ያ ዎደ ያጋስ፤ ‘ጎዳዉ፥ ታ ጎዳ አብራሃመ ፆሳዉ፥ ነ ሸነ ግድኮ፥ ታኒ ብያ አላልያ ጊግሳ።

43ሄኮ፥ ታኒ ሀ ፑልቱዋ ማታን ኤቃይስ፤ ጌላኦ እስንያ ሃ ትካናዉ ዪኮ፥ ታኒ እዮ፥ ታና ነ ኦቱዋፐ ጉ ሃ ኡሻርክ’ ያጋና።

44እያ፥ ‘ኤሮ ኡያ፥ ቃስ ነ ግማለታስካ ታኒ ሃ ዱቃና’ ግያራ፥ ጎዳይ ታ ጎዳ ናኣስ ዶርዳሮ ግዶ” ያጋስ።

45“ታኒ ታ ዎዛናን ዎሰይሳ ዛሮና ደእሽን፥ እርብቃ ባ ኦቱዋ ቶካዳ፥ ፑቱ ጋሱ፤ ፑልቱዋ ዱገ ዎዳ ሃ ዱቃሱ፤ ታኒ እዮ፥ ‘ታና ሃ ኡሻርክ’ ያጋስ።

46“ያግን እያ ኤለሳዳ ባ ሀሽያፐ ኦቱዋ ዎዳ፥ ‘ሄኮ ኡያ፤ ቃስ ታኒ ነ ግማለታ ኡሻና’ ያጋሱ። ያትን ታኒ ኡያስ፤ ቃስ ታ ግማለታ እያ ኡሻሱ።

47“ታኒ እዮ፥ ‘ኔኒ ኦደ ናኤ?’ ያጋስ። “እያ ዛራዳ፥ ‘ታኒ ባቱኤላ ናኣ፤ ባቱኤል፥ ምልካ ናኮራስ የልዳ ናአ’ ያጋሱ። ታኒ ዎርቃ እ ሲን፥ ሳጋዮታ እ ኩሸን አስ።

48ሄሳፈ ጉየ፥ ታኒ ጉልባታዳ፥ ጎዳስ ጎይናስ። ታኒ ጎዳ፥ ታ ጎዳ አብራሃመ ፆሳ፥ ታ ጎዳ እሻ ናአ ናእዉ እያ ናኣስ ኤካናዉ ታና ልከ ኦግያ ካለዳይሳስ ጋላታይስ።

49ሀእካ ህንተ ታ ጎዳስ ኬሀናባነ አማነታናባ ግድኮ፥ ታዉ ኦድተ፤ ግዶና እፅኮካ ኦድተ፤ ሄሳፈ ጉየ፥ ታኒ ሀናናባ ኤራና” ያግስ።

50ላብነ ባቱኤል ዛሪድ ያግዶሶና፤ “ሀ ኦዳይ ጎዳፐ ይስ፤ ኑኒ ነዉ ያ ሃ ጋናዉ ዳንዳኦኮ።

51እርብቆ ሀኖ በአ፤ ኤካዳ ባ፤ ጎዳይ ግዳይሳዳ ነ ጎዳ ናኣስ ማቾ ግዶ” ያግዶሶና።

52አብራሃመ አይለይ ኤንቲ ግያባ ስእዳ ዎደ፥ ሳአን ጉልባትድ ጎዳስ ጎይንስ።

53አይለይ ብራ አሌቆ፥ ዎርቃ አሌቆነ ማኦ ከስድ እርብቃስ እሚስ። ቃስ አልኦ ሚሸታ እ እሻስነ እ አየስ እሚስ።

54ሄሳፈ ጉየ፥ እነ እያራ ደኤይሳት ምዶሶና ኡይዶሶና፤ ያን አቅዶሶና። ኤንቲ ጉራ ደንድን፥ እ፥ “ታና ታ ጎዳኮ የድተ” ያግስ።

55ያትን እ እሻይነ እ አይያ፥ “ናእያ እስ ታሙ ጋላሳ መላ ኑራ ታኮ፥ ሄሳፈ ጉየ እያ ባና” ያግዶሶና።

56ሽን እ፥ “ጎዳይ ታ ይዳይሳ እንጀይን፥ ህንተ ታና ጋምእሶፕተ። ታኒ ታ ጎዳኮ ባና መላ ታና ሞይዝተ” ያግስ።

57ኤንቲ፥ “ናእዉ ፄግድ አነ እዮ ኦይቾስ” ያግዶሶና።

58እርብቃ ፄግድ፥ “ሀ አድያራ ባኔ?” ያግድ ኦይችዶሶና። እያ፥ “ኤ፤ ታኒ ባና” ያጋሱ።

59ያንን፥ ኤንቲ ባንታ ምችዉ እርብቃ፥ እዮ ድችዳሮ፥ አብራሃመ አይልያነ እያ አሳታ ሞይዝዶሶና።

60ኤንቲ እርብቃ፥ “ኑ ምቸ እርብቀ፥ ሙኩሉፐ ሙኩሉ ጋካናዉ ዳራ፤ ነ ኮቻይ ባንታ ሞርከታ ካታማታ ላቶ” ያግድ አንጅዶሶና።

61ሄሳፈ ጉየ፥ እርብቅነ እ ማጫ አይለት ደንድድ፥ ግማለታ ቶግድ፥ አድያራ ብዶሶና። ያትን አይለይ እርብቃ ኤክድ ብስ።

62ሄ ዎደ ይሳቅ፥ “ታና በእያ ደኦ ፆሳ ፑልቱዋ” ጌተትያ ፑልቱዋ ማታ ብድ፥ ነገበ መላ ቢታን ደኤስ።

63እስ ጋላስ ኦማርስ ይሳቅ ባ ዎዛናን ቆፕሸ ደምባ ከይድ ዩዬስ፤ እ ቁ ግድ ፄልያ ዎደ፥ ግማለት የይሳታ በእስ።

64እርብቃካ ቁ ጋዳ ፄልያ ዎደ፥ ይሳቃ በአሱ፤ ግማለታፐ ዎሱ።

65አብራሃመ አይልያኮ፥ “ሀ ኑራ ጋሄታናዉ ደምባራ ያ አደይ ኦኔ?” ያጋሱ። አይለይ፥ “እ፥ ታ ጎዳ” ያግስ። እያ ባ ላፃና ኤካዳ ጉሉንታሱ።

66ቃስ አይለይ ባ ኦዳባ ኡባ ይሳቃስ ኦድስ።

67ይሳቅ እርብቃ ባ አየ ሳራ ዱንካንያ ግዶ ኤፍስ። እዮ ማችስ፤ እያካ እያዉ ማቾ ግዳሱ። እ እዮ ዶስስ፤ ባ አየ ካዩዋ ዎስ።