Genesis 49

Amharic Gofa GFBEVF (ጌሻ ማፃፋ)

← Chapter 48 Jump to: Chapter 50 →

1ሄሳፈ ጉየ፥ ያይቆብ ባ አደ ናይታ ፄግድ፥ “ስንፈ ሀናናባ ታኒ ህንተዉ ኦዳና መላ ሀ ሺቅተ” ያግስ።

2“ህንተኖ ያይቆባ ናይቶ፥ እስፈ ሺቅድ ስእተ፤ ህንተ አዋይ እስራኤለይ ኦደይሳ ሀይዝተ።

3“ሮቤላ፥ ታ ባይራ ናአዉ፥ ኔኒ ታ ዎልቃ፤ ታ ምኖተስ ኮይሩዋ፤ ኔኒ ቦንቾንካ ዎልቃንካ ኡባፈ አሳ።

4ኔኒ ሃ መላ፥ ኤቅዳሶን ደአካ፤ ነ እሻታ ቦላ ባይራተ ነዉ በሰና። ኔኒ ነ አዋ ሂፃን ከያዳሳ፤ ነ አዋ አርሳ ቱንሳዳሳ።

5“ስሞንነ ሌወይ እሻታ፤ ኤንቲ ባንታ ማሻ ማካላተስ ደንሶና።

6ኤንቲ ባንታ ሀንቁዋን አደ ዎዶሶና፥ ባንታ አሙዋ ኩንናዉ ቦራታ ጋድያ ቃንፅዶሶና። ያንያ ግሾ፥ ታኒ ኤንታ ዞረታን ገልከ፤ ኤንታ ሺቁዋንካ ኡትከ።

7ኤንታ ዎልቃማ ሀንቆይ ኤንታ ዎዛና ኢታተይ ባደትዳባ ግዶ። ታኒ፥ ኤንታ ያይቆባ አሳ ግዶን ላላና። እስራኤለ ቢታን ርጫና።

8“ይሁዳ፥ ነ እሻት ነና ጋላታና፤ ነ ኩሸይ ነ ሞርከታ ቆ ኦይካና፤ ነ አዋ ናይት ነዉ ሆክድ ዝጋና።

9ይሁዳ፥ ኔኒ ዎዳላ ጋሞ፤ ታ ናአዉ፥ ኔኒ ሻንካፈ ዎ ስሚድ፥ ጮጎትድ ዝንእዳ ጋሞ መላ። ነና ቦቻናዉ ዳንዳኤይ ባዋ።

10መርናዉ ሃረይስ ያና ጋካናዉ ካዎተ ፃምአይ፥ ይሁዳ ኩሸፐ ከየና፤ ካዎተት እያዉ ኪተታና።

11እ ባ ሀርያ ዎይነ ቦላ፥ ባ ሀረ ማራ ዶረትዳ ዎይነ ቦላ ቃቻና፤ እ ባ ማኡዋ ሱ ዳንያ ዎይነ ኡሻን ሜጫና።

12እያ አይፈይ ዎይነ ኡሻፈ አድ ዱልካና፤ እያ አቻይ ፃማታፐ አድ ቦፃና።

13“ዛብሎን አባ ዶናን ዳና፤ እ አባ ዶናን ማርካበት ኤቅያ በሲ ግዳና፤ እያ ዛዋይ ስዶና ጋካና።

14“ይሳኮር ምኖ ሀረ መላ፥ ጫናታ ግዶን ዝንኤስ።

15ሽን እ ባ ሸምፕያ በሳይ ሎኦ ግደይሳነ ባ ቢታይ ኡፋይሰይሳ ግደይሳ በእያ ዎደ፥ ጫና ቶካናዉ ባ ሀሽያ ዝቅ ኦድ፥ አይለተ ኦሶ ኦና።

16“ዳነይ እስራኤለ ዘረፈ እሱዋ ግድያ ባ አሳ ቦላ ፕርዳና።

17ዳነይ ኦገ ጋፃን ደእያ ሾሻ መላ፥ ፓራ ሹቁልያ ዱክድ፥ ፓራ ቶግዳይሳ ጉየ የግያ ጎፐ መላ።

18“አቤት ጎዳዉ፥ ታኒ ነ አሹዋ ናጋይስ።

19“ጋደ፥ ቦንቀይሳት ቆሀና፤ ሽን እ ኤንታ ጌዶ ካልድ ኦይካና።

20“አሴራ ቢታይ ኦርደ፤ እ ካዎታስ ሎኦ ካ እማና።

21“ንፍታለመይ ቃሸቶና የዳ ደእያ፥ ሎኦ ማራታ የልያ ገንኤ መላ።

22“ዮሰፍ ሃ ማታን ቶከትድ፥ ደረ ቦላ ዛእዳ፥ አይፈይ ኩምዳ ዎይነ መላ።

23ዶንገን ዱከይሳት እያ ቦላ ደንዳና፤ ባንታ ዶንግያን ዱክሸ እያ ጎዳና።

24ሽን ያይቆባ ፆሳ ዎልቃን፥ እስራኤለ ሄንንቹዋ ናጉዋን፥ እያ ዶንገይ ምኖ፥ እያ ቀሰይ ፃላ ግዳና።

25ነ አዋ ፆሳይ ነና ማዳና። ኡባ ዳንዳእያ ፆሳይ፥ ቦላ ሳሎ አንጁዋን፥ ጋርሳ ጪሙዋ አንጁዋን፥ መሄንካ የሎንካ ነና አንጃና።

26ነ አዋ አንጆይ በንፐ ምንድ ደእያ ዙማታ አንጁዋፈካ፥ መርናዉ ደእያ ደረታፐ በንትያ ኡፋይስያ አንጁዋፈካ አስ። ሀይስ ኡባይ ዮሰፋ ሁጰን፥ ባ እሻታ ግዶን ካፖ ግደይሳ ሊጰን ሸምፖ።

27“ብንያመይ ቦንቅያ ሱመ፤ ባ ኦልዳባ ዎንታ ሜስ፤ ባ ድእዳባ ኦማርስ ሻኬስ” ያግስ።

28ሀይሳቲ ታማነ ናምኡ እስራኤለ ሼሻታ። ኤንታ አዋይ ኤንታ ሁጰን ሁጰን ኤንታዉ በሲያ አንጁዋ አንጅሸ ኤንታኮ ግዳባይ ሀይሳ።

29ሄሳፈ ጉየ፥ እ ኤንታ ሀይሳዳ ያግድ ኪትስ፤ “ታኒ ታ ማይዛታን ጋሄታና ሀናይስ። ታና ህተ አድያ ኤፍሮና ጋደን ደእያ ጎንጎሉዋን ታ አዋታ ማታን ሞግተ።

30ሄስካ፥ ካናነ ቢታን፥ ማምረ ማታን ደእያ፥ ማክፌላን ደእያ ጎንጎሉዋ። ሄ ጎንጎሎይ አብራሃመይ ሞጎስ ህተ አድያ ኤፍሮናፐ እያ ጋድያራ ሻምዳ ዱፉዋ።

31አብራሃመይነ እያ ማችያ ሳራ፥ ይሳቅነ እያ ማችያ እርብቃ ያን ሞገትዶሶና። ታኒ ቃስ ልያካ ያን ሞጋስ።

32ሄ ጋደይነ እያን ደእያ ጎንጎሎይ ህተታፐ ሻመትዳይሳ። ታና ያን ሞግተ” ያግስ።

33ያይቆብ፥ ባ ናይታ ኪታ ኦንግዳፐ ጉየ ባ ቶሁዋ ባ ሂፃን ሺሽ ኤክድ፥ ባ ማይዛታን ጋሄትስ።

← Chapter 48 Jump to: Chapter 50 →