Job 2

Amharic Gofa GFBEVF (ጌሻ ማፃፋ)

← Chapter 1 Jump to: Chapter 3 →

1ሀራ ጋላስ ኪታንቾት ጎዳ ስንን በንታናዉ ይዶሶና፤ ፃላሄይካ ቃስ ኤንታራ እስፈ እያ ስንን በንታናዉ ይስ።

2ጎዳይ ፃላህያኮ፥ “ኔኒ አዉፐ ያዲ?” ያግስ። ፃላሄይ ጎዳኮ፥ “ታኒ ሳአ ኡባን ያነ ሃነ ዩያሸ ጋምአስ” ያግስ።

3ጎዳይ ፃላህያኮ፥ “ኔኒ ታ አይልያ እዮባ ሎይዳ በአዲ? ሳአ ቦላ እያ መላ ቦረይ ባይና አስ፥ ሱረ አስ፥ ፆሰ ያይያነ ኢታባፐ ሃክዳ አስ ባዋ። ጋሶይ ባይና ታኒ እያ ይሳና መላ ነ ታና ደንንካ ሀእ ጋካናዉ እ ባ ሱረተን ምንድ ኤቅስ” ያግስ።

4ፃላሄይ ዛሪድ፥ “ነ ሸምፖይ አቶ” አስ ገይሳዳ አስ ባ ሸምፑዋ ግሾ ባዉ ደእያባ ኡባ እሜስ።

5ሽን፥ “ኔኒ ነ ኩሽያ የዳዳ እያ አሳተ ቦችያኮ፥ እ ነና ቱማ ሶምኦን ባዳና” ያግስ።

6ጎዳይ ፃላህያኮ፥ “ኤሮ ሎኦ፥ እያ ዎፓፈ አትሽን፥ እያ ቦላ ነ ኮይዳባ ኦናዉ ዳንዳኣሳ” ያግስ።

7ሄሳፈ ጉየ፥ ፃላሄይ ጎዳ ስንፈ ከይድ፥ እዮባ ቶሆፐ ሁጰ ጋካናዉ ኢታ ማዱንን ካኤታና መላ ኦስ።

8እዮብ ብዶ ቦላ ኡትድ ኮንአን ባና ጎድስ።

9እያ ማችያ፥ “ሀእ ጋካናዉካ ኔኒ ነ ሱረተ ምን ኦይካዲ? ፆሳ ባዳዳ ሀይቃጋ” ያጋሱ።

10እዮብ ዛሪድ፥ “ኔኒ ኤያ ማጫሳዳ ዋናዳ ኦደታይ? ኑኒ ፆሳፈ ሎኦባ ኤክ ጋምእድ፥ ኢታባይ ጋክያ ዎደ ኤኮኮዬ?” ያግስ። ሀ ዋየ ኡባን እዮብ ፆሳ ቦላ ኢታባ ኦደትቤና።

11ሄ እዮባ ላገት፥ ተማና ቢታፈ ኤልፋዝ፥ ሹሀ ቢታፈ በልዳዶስነ ናእማ ቢታ አስ ግድዳ ሶፋር እዮባ ቦላ ጋክዳ መቱዋ ስእዳ ዎደ እያዉ ቃታናዉነ ምንናዉ እስፈ እያኮ ይዶሶና።

12ኤንቲ እያ ሃሆን ኤቅድ ፄልያ ዎደ እ እዮባ ግደይሳ ኤርቦኮና። ጉየፐ እያ ግደይሳ ኤርዳ ዎደ ባንታ ቃላ ቁ ኦድ ዬክዶሶና፤ ባንታ ማኡዋ ፔድ፥ ባንታ ሁጰን ባና ቆልዶሶና።

13ኤንቲ እያራ ላፑን ጋላስነ ላፑን ቃማ ቢታን ኡትዶሶና። ኤንቲ እያ ዋየይ ኬህ ዳሮ ግደይሳ በእዳ ግሾ ኦንካ እያ ኦድስቤና።

← Chapter 1 Jump to: Chapter 3 →