Job 24

Amharic Gofa GFBEVF (ጌሻ ማፃፋ)

← Chapter 23 Jump to: Chapter 25 →

1ኡባ ዳንዳእያ ፆሳይ ፕርዳ ዎደ አይስ ቃንፀኔ? እያ ኤረይሳት ሄ ዎድያ አይስ ጮ ናጎና?

2ኢታ አሳት ዛዋን ደእያ ሹቻ ደንሶና፤ ካይስ ኤህዳ ዶርሳታ ያን ሄሞሶና።

3ይኦ ናይታ ሀረታ ቦንቆሶና፤ አምኤ ቦራ አጮስ ኦይክድ ኤኮሶና።

4ማንቆታ ሻተትድ ኦገፐ ጎዶሶና፤ ባንታ ስንፈ ቆሰታና መላ ኦሶና።

5ባዞን ደእያ ዎራ ሀረ መላ፥ ማንቆት ባንታ ናይታስ ምያባ ኮይሸ ዳቡሮሶና።

6ኤንቲ ሀራ አሳ ጋደን ካ ጫኮሶና፤ ኢታ አሳ ዎይነ ጋደን ቡ ማፆሶና።

7ኤንቲ ቃማ ካሎ አቆሶና፤ ሜጎስ ቦላን የግያባይ ኤንታዉ ባዋ።

8ዙማ ቦላ ቡክያ እራን ኤንቲ ሱሩፆሶና፤ ገልያ በሲ ይድ ሹቻ ሆምኦን አቆሶና።

9አው ባይና ናአ አየ ክኦፐ ዳፍ ኤኮሶና፤ ማንቁዋ ናአ አጮስ ኦይኮሶና።

10ማንቆት ማኦ ይድ ካሎ ሄመቶሶና፤ ኤንቲ ባንታዉ ኮሻትሸ ሀራ አሳ ምርቀ ቶኮሶና።

11ኤንቲ ባንታዉ ሳሞትሸ፥ ዛይተ ከሳናዉ ሀራ አሳ ጋደን ሻማሆ አይፈ ማፆሶና፤ ዎይነ ኡሻ ጉሙአናዉ ዎይነ አይፈ ቆሮሶና።

12ካታማን ካታማን ሀይቃና ሀንያ አሳይ ኦሎሶና፤ ደሸትድ ማዱንፅዳ አሳይ ማዶ ኮይድ ዋሶሶና፤ ሽን ፆሳይ ኤንታ መቱዋ ፄለና።

13ፖኦ እፅያ አሳት፥ እያ ኦግያ ኤሮና አሳትነ፤ እያን ኤቆና አሳት ደኦሶና።

14ሳእ ቃምያ ዎደ ሸምፖ ዎይስ ደንድድ፥ ማንቆታነ መቶታንቾታ ዎስ፤ ቃም ቃስ ካይሶስ ቦሶና።

15ላይማትያ አስ ሳእ ለምአናይሳ ናጌስ፤ ኦንካ በኦና መላ ባ ሶምኡዋ ካሜስ።

16ካይሶት ቃማ ኬ ቦክድ ካይሶታናዉ ገሎሶና፤ ሽን ጋላስ ቆሰትድ ፔኦሶና።

17ዳጋንያ ማራ ኤንቲ ዳቦትያ ግሾ፥ ሳካና ማይ ኤንታዉ ሴታ ጋላሳ መላ።

18“ሽን ኢታ አሳት ሃ ጎፖንቶ መላ፤ ኤንታ ላታ ቢታይ ባደትዳይሳ፤ ኦንካ ኤንታ ዎይነ ጋደ ቤና።

19ሻች ማይን፥ ሃ መልድ የይሳዳ፥ ናጋራንቾት ሀይቅድ ቢታፈ ዮሶና።

20የልዳ አየት ኤንታ ዶጋና፤ ጉፁነይ ኤንታ አሹዋ ማና፤ ኢታ አሳይ ሀሳየቶኮና፤ ምዳ መቃና።

21ኤንቲ ናእ ባይና ማይን ማጫሳ ናቅዶሶና፤ አምኤታ ቃቶና እፅዶሶና።

22ፆሳይ ባ ዎልቃን ምኖታ ይስስ፤ ኤንታዉ ሳእ እንጀትዳ ዳንኮካ፥ ኩንዶና አቶኮና።

23ፆሳይ ኤንቲ ሳሮ ዳናዳ ኦኮካ፥ ኤንታ ኦግያ ዎቼስ።

24ኢታ አሳት ጉ ዎደስ ቁ ቁ ጎሶና፤ ሽን ኤለስድ ሻራፋዳ ሹልድ ዮሶና፤ ካዳ ጫከቶሶና።

25ሄስ ሀነና ግድ ካድያ አስ ደኢ? ታኒ ኦድዳ ቃላ ዎርዶ ጋና አስ ደኢ?” ያግስ።

← Chapter 23 Jump to: Chapter 25 →