Matthew 9

Amharic Gofa GFBEVF (ጌሻ ማፃፋ)

← Chapter 8 Jump to: Chapter 10 →

1ሄሳፈ ጉየ፥ የሱሲ ዎጎሉዋን ገልድ፥ አባ ፕንድ ባ ካታማ ብስ።

2ሀንዳ ጉ አሳት እስ ጉንዳ ኡራ አልጋራ ቶክድ የሱሳኮ ኤህዶሶና። የሱሲ ኤንታ አማኑዋ በእድ፥ ጉንዳ ኡራ፥ “ታ ናአዉ፥ ያዮፋ፤ ነ ናጋራይ አቶ ጌተትስ” ያግስ።

3ሄ ሳትያን፥ አይሁደ ህገ አስታማረታፐ እሶት እሶት፥ “ሀይስ ፆሳ ጫሸ ግደነ” ያግድ ባንታ ዎዛናን ቆፕዶሶና።

4የሱሲ ኤንታ ቆፋ ኤርድ፥ “ኢታባ ህንተ ዎዛናን አይስ ቆፔቲ?

5ሀኖሽን፥ ‘ነ ናጋራይ አቶ ጌተትስ’ ገይሳፈነ ‘ደንዳ ኤቃዳ ባ’ ገይሳፈ አዉስ ካዉዪ?

6ሽን ሳአ ቦላ ናጋራ አቶ ጋናዉ አሳ ናኣስ ማት ደኤይሳ ታ ህንተና ኤርሳና” ያግድ፥ ጉንዳ አድያኮ፥ “ደንዳ ኤቃ፥ ነ አልጋ ቶካዳ፥ ነ ሶ ባ” ያግስ።

7ጉንዳ ኡራይ ደንድድ ባ ሶ ብስ።

8ደረይ ሄሳ በእድ ማላለትዶሶና። ሄሳ መላ ማታ አሳስ እምዳ ፆሳ ጋላትዶሶና።

9የሱሲ ያፐ ደንድድ ብሸ ማቶሳ ገይሳ ቃራፃ ቃንፅስያ በሳን ኡትዳሽን በእድ፥ “ታና ካላ” ያግስ። እካ ደንድድ ካልስ።

10የሱሲ ማቶሳ ሶን ጋይታ ቦላ ኡትዳሽን፥ ቃራፃ ቃንፅስያ ዳሮ አሳትነ ናጋራንቾት ይድ እያራነ እያ ታማረታራ እስፈ ማናዉ ኡትዶሶና።

11እስ እስ ፋርሳወት ሄሳ በእድ፥ የሱሳ ታማረታ፥ “ህንተ አስታማረይ ቃራፃ ቃንፅሰይሳታራነ ናጋራንቾታራ አይስ ሚ?” ያግዶሶና።

12የሱሲ ሄሳ ስእድ፥ “ለ ኮሸይ ሀርጋንቾታሳፈ አትሽን፥ ፓፃታሳ ግደና።

13ሽን ህንተ ብድ፥ ‘ታኒ ህንተ ያርሹዋ ግዶናሽን ህንተ ሀራታ ማራና መላ ኮያይስ’ ጌተትድ ፃፈትዳይስ አይ ጉሰኮ ኤርተ። አይስ ጊኮ፥ ታኒ ናጋራንቾታ ፄጋናዉ ያስፐ አትሽን፥ ፅሎታ ፄጋናዉ ያቢከ” ያግስ።

14ሄ ዎደ ዮሃንሳ ታማረት የሱሳኮ ሺቅድ፥ “ኑነ ፋርሳወት ፆሞስ፥ ሽን ነ ታማረት አይስ ፆሞኮና?” ያግድ ኦይችዶሶና።

15የሱሲ ዛሪድ ኤንታኮ፥ “ማችዉ ኤከይስ ኤንታራ ደእሽን ፄገትድ ይዳ አሳይ ካዮታናዉ ዳንዳኦና? ሙሹራይ ኤንታ ማታፐ ኤከታና ዎደይ ያና፥ ኤንቲ ሄ ዎደ ፆማና።

16“ኦራ ማኦፐ ፔድ ጋልአ ማኦ ቦላ ስከይ ኦንካ ባዋ። ሄሳ ኦኮ ኦራይ ጋልአ ፔስ። ፔይካ ጉጅ ዳልጌስ።

17ኦራ ዎይነ ጋልአ ኦጎሮን ቆልያ ኦንካ ባዋ። ሄሳ ኦኮ ኦራ ዎይነይ ጋልአ ኦጎሩዋ ሴስ ዎይነይካ ጉኬስ፤ ኦጎሮይካ ናምአን ማዶናባ ግዴስ። ሽን ኦራ ዎይነይ ኦራ ኦጎሮን ቆለታናዉ በሴስ። ሄሳ ኦሰትኮ ናምአይካ ኢቶና ናገቶሶና” ያግስ።

18የሱሲ ሄሳ ኦዶ ቦላ ደእሽን፥ አይሁደ ሀላቃታፐ እሶይ እያኮ ይድ፥ እያ ስንን ጉልባትድ፥ “ታ ናእያ ሀእ ሀይቃሱ፥ ሽን እያ ፓፃና መላ ኔኒ ያዳ ነ ኩሽያ እ ቦላ ዎርክ” ግድ ዎስስ።

19የሱሲ ደንድድ እያራ ብስ፤ እያ ታማረትካ ካልዶሶና።

20እ ብሽን ታማነ ናምኡ ላይ ኩመ ሱ ጎግድ ዋይስያ እስ ማጫስያ ጉየራ ሺቃዳ የሱሳ አፍላ ማጫራ ቦቻሱ።

21እያ ባ ዎዛናን፥ “ታ እያ አፍላ ማጫራ ፃላላ ቦችያኮ ፓፃና” ያጋዳ ቆፓሱ።

22የሱሲ ጉየ ስም እዮ ፄልድ፥ “ታ ናተ፥ ያዮፋ! ነና ነ አማኖይ ፓስ” ያግስ። ማጫስያ ኤለሳዳ ፓፃ አጋሱ።

23የሱሲ አይሁደ ሀላቃ ሶ ጋክያ ዎደ ዛየ ፑነይሳታነ ዬከይሳታ በእድ፥

24“አነ ክችተ፤ ጉ ናእያ ስካሱፐ አትሽን፥ ሀይቃቡኩ” ያግስ። ሽን አሳይ እያ ቦላ ሚጭዶሶና።

25አሳ ካረ ከስዳፐ ጉየ ሶ ገልድ፥ ናኤ ኩሽያ ኦይክስ፥ ናእያ ደንዳ ኤቃሱ።

26ሄ ዎረይ ሄ ቢታ ኡባ ጋክስ።

27የሱሲ ያፐ ደንድድ ገደ ስን ብያ ዎደ ናምኡ ቆቀት ባንታ ቃላ ቁ ኦድ፥ “ዳዊታ ናአዉ፥ ኑና ማራርክ” ያግሸ እያ ካልዶሶና።

28የሱሲ ሶ ገልዳ ዎደ ቆቀት እያ ካልድ ይዶሶና። የሱሲ ኤንታኮ፥ “ታኒ ሄሳ ኦናዉ ዳንዳኤይሳ ህንተ አማነቲ?” ያግስ። ኤንትካ፥ “ኤ፥ ጎዳዉ” ያግድ ዛርዶሶና።

29ሄሳፈ ጉየ፥ የሱሲ ኤንታ አይፍያ ቦችድ ኤንታኮ፥ “ህንተዉ፥ ህንተ አማኑዋ ሀኖ” ያግስ።

30ኤንታ አይፈይካ ዶየትስ። የሱሲ ኤንታኮ፥ “ሀይሳ ኦደስካ ኦዶፕተ” ያግድ ምን ኦድስ።

31ሽን አሳት ብድ የሱሳባ ሄ ቢታ ኡባን ኦድዶሶና።

32ኤንቲ ያፐ ከይያ ዎደ አሳይ ቱና አያናይ ኦይክድ ሙምስዳ እስ አስ የሱሳኮ ኤህዶሶና።

33ቱና አያናይ ከይዳፐ ጉየ ሙመ ኡራይ ኦደትስ። ደረይካ ማላለትድ፥ “ሀይሳ መላ ኦራባይ እስራኤለ ቢታን ሀንቤና” ያግዶሶና።

34ሽን ፋርሳወት፥ “ቱና አያናታ ሀላቃን ቱና አያናታ ከሴስ” ያግዶሶና።

35የሱሲ አይሁደ ዎሳ ኬታን ታማርስሸ፥ ሳሎ ካዎተ ዎንገላ ሳባክሸ፥ አሳ ሀርገ ኡባፈ ፓሸ ካታማታንነ ጉታ ኡባን ዩይስ።

36ዳሮ ደረይ፥ ሄምያ አስ ባይና ዶርሳዳ ኤንታና በእያ አስ ይን ኡንኤትድ ደኤይሳታ በእድ ኤንታዉ ቃትስ።

37ባ ታማረታኮ፥ “ሺቃና ካይ ዳሮ፥ ሽን ካ ሺሽያ አሳይ ጉ።

38ሄሳ ግሾ፥ ጎዳይ ካ ሺሽያ ኦሳንቾታ የዳና መላ ዎስተ” ያግስ።

← Chapter 8 Jump to: Chapter 10 →