1 John 3

Amharic (Tigrigna: Contemporary Tigrinya Bible 2024)

← Chapter 2 Jump to: Chapter 4 →

1እንሆ፡ ኣቦ ከመይ ዝበለ ፍቕሪ ዘርኣየና፡ ደቂ ኣምላኽ ክንብሃል ከም እንኽእል፤ ስለዚ ዓለም ስለ ዘይፈለጠቶ ኣይትፈልጠናን እያ።

2ፍቁራተይ፡ ሕጂ ደቂ ኣምላኽ ኢና፡ እንታይ ከም እንኸውን ግና ኣይተገልጸን። ንሱ ምስ ተራእየ ግን ማዕረኡ ከም እንኸውን ንፈልጥ ኢና፤ ከም ዘለዎ ክንርእዮ ኢና እሞ።

3እዚ ተስፋ እዚ ኣብኡ ዘለዎ ዅሉ ድማ ልክዕ ከምቲ ንጹህ ዝዀነ፡ ንርእሱ ይንጽህ።

4ሓጢኣት ዚፍጽም ዘበለ ዅሉ ሕጊ እውን ይጥሕስ እዩ፣ ከመይሲ፡ ሓጢኣት ምጥሓስ ሕጊ እዩ።

5ሓጢኣትና ኬርሕቕ ከም እተገልጸ ድማ ትፈልጡ ኢኹም። ኣብኡ ድማ ሓጢኣት የለን።

6ኣብኡ ዚጸንዕ ዘበለ ዅሉ ሓጢኣት ኣይገብርን እዩ። ሓጢኣት ዝገብር ኩሉ ኣይረኣዮን ኣይፈለጦን።

7ደቀይ፡ ሓደ እኳ ኣየስሕተኩም፡ እቲ ፍትሒ ዚገብር ከምቲ ጻድቕ ጻድቕ እዩ።

8ሓጢኣት ዚገብር ካብ ድያብሎስ እዩ። ምኽንያቱ ዲያብሎስ ካብ መጀመርታ ሓጢኣት ስለ ዝገብር። በዚ ዕላማ እዚ እዩ ወዲ ኣምላኽ ዝተገልጸ፡ ግብሪ ድያብሎስ ከጥፍእ እዩ።

9ካብ ኣምላኽ እተወልደ ዅሉ ሓጢኣት ኣይገብርን እዩ። ዘርኡ ኣብኡ ይነብር ኣሎ እሞ፡ ካብ ኣምላኽ ስለ እተወልደ፡ ሓጢኣት ኪገብር ኣይክእልን እዩ።

10ደቂ ኣምላኽን ደቂ ድያብሎስን በዚ ይግለጹ፣ ፍትሒ ዘይገብር ዘበለ ዅሉ ካብ ኣምላኽ ኣይኰነን፣ ንሓዉ ዘየፍቅር እውን ኣይኰነን።

11ንሓድሕድና ክንፋቐር፡ ካብ መጀመርታ ዝሰማዕኩምዎ መልእኽቲ እዚ እዩ።

12ከምቲ ቃየል ካብቲ ክፉእ ዝነበረ፡ ንሓዉ ዝቐተለ ኣይኰነን። ስለምንታይከ ቀቲልዎ፧ ግብርታቱ ክፉእን ጻድቕ ሓዉን እዩ ነይሩ እሞ።

13ኣሕዋተየ፡ ዓለም እንተ ጸሊኣኩም ኣይትገረሙ።

14ኣሕዋት ስለ እነፍቅሮም፡ ካብ ሞት ናብ ህይወት ከም ዝሓለፍና ንፈልጥ ኢና። ሓዉ ዘየፍቅር ኣብ ሞት እዩ ዝጸንሕ።

15ንሓዉ ዚጸልእ ዘበለ ዅሉ ቀታሊ እዩ። ቀታሊ ድማ ናይ ዘለኣለም ህይወት ከም ዘይብሉ ትፈልጡ ኢኹም።

16ንሱ ምእንታና ህይወቱ ኣሕሊፉ ስለ ዝሃበ፡ በዚ ኸኣ ፍቕሪ ኣምላኽ ነስተውዕል። ንሕና ድማ ኣብ ክንዲ ኣሕዋት ሕይወትና ክንህብ ይግብኣና።

17እቲ ጽቡቕ ናይዛ ዓለም ዘለዎን ንሓዉ ከም ዝጐደሎ ዚርኢን ውሽጣዊ ርህራሄኡ ዚዓጽዎን ግና፡ ከመይ ጌራ እያ ፍቕሪ ኣምላኽ ኣብኡ ትጸንሕ፧

18ደቀይ፡ ብዘረባ ወይ ብመልሓስ ኣይንፋቐር። ብግብርን ብሓቅን ግን።

19በዚ ድማ ካብ ሓቂ ምዃንና ንፈልጥ፡ ንልብና ድማ ኣብ ቅድሚኡ ከነጽንዖ ኢና።

20ከመይሲ፡ ልብና እንተ ወገነና፡ ኣምላኽ ካብ ልብና ይዓቢ፡ ንዅሉ ድማ ይፈልጥ እዩ።

21ፍቁራተይ፡ ልብና እንተ ዘይኰነነና፡ ኣብ ኣምላኽ እምነት ኣሎና።

22ትእዛዛቱ ስለ እንሕልውን ኣብ ቅድሚ ኣዒንቱ ባህ ዘብል ስለ እንገብርን ኩሉ እንልምኖ ካብኡ ንቕበል።

23ብስም ወዱ ኢየሱስ ክርስቶስ ክንኣምንን ከምቲ ዝኣዘዘና ንሓድሕድና ክንፋቐርን ትእዛዙ እዚ እዩ።

24ትእዛዛቱ ዚሕሉ ድማ ኣብኡ ይነብር፡ ንሱውን ኣብኡ ይነብር። በዚ ድማ በቲ ዝሃበና መንፈስ ኣባና ከም ዝጸንሕ ንፈልጥ።

← Chapter 2 Jump to: Chapter 4 →