Exodus 15

Awadhi

← Chapter 14 Jump to: Chapter 16 →

1तब मूसा अउ इस्राएल क मनइयन यहोवा बरे इ गीत गावइ लागेन: “मइँ यहोवा बरे गीत गाउब काहेकि उ बड़का कारनामा किहेस ह। उ घोड़ा अउ सवारन क सगरे मँ बहाइ दिहेस ह।

2यहोवा ही मोर सक्ती अहइ। उ मोका बचावत ह अउर मइँ गावत हउँ गीत ओनकी बड़कई क। मोर परमेस्सर यहोवा अहइ अउ मइँ ओनकइ बड़कई करत हउँ। यहोवा मोरे पुरखन क परमेस्सर अहइ अउर मइँ ओनकइ मान करत हउँ।

3यहोवा बड़का जोधा अहइ ओकर नाउँ यहोवा अहइ।

4यहोवा फिरौन क रथ अउ फउजिअन क सगरे मँ बहाइ दिहस। फिरौन क उत्तिम अफसरन लाल सगरे मँ बूड़ि गएन।

5गहिर पानी ओनका ढाँकि लिहस। उ पचे चट्टाने क नाई गहिर पानी मँ डूबेन।

6“आप क दाहिन बाँह गजब क सक्ती स भरी अहइ। यहोवा आप क दाहिन बाँह दुस्मनन क छिटकाइ बिटकाइ दिहस।

7आप आपन सक्ती अउ बड़की परताप म नसाइ दिहा ओन पचेन क जउन खिलाफ खड़ा होइ गएन। आपक किरोध ओनका उ तरह नास कइ दिहस जइसे आगी तिनका क बारि डावत ह।

8आप आपन किरोध मँ जउन तेज हवा क चलाया, उ जले क उँचके उछारि दिहेस। उ जोर स बहत पानी पोढ़ दिवार बनि गवा। समुद्दर आपन गहिर स गहिर तले तक ठोस होइ गवा।

9“दुस्मन कहेस, ‘मइँ ओनका खदेरब अउ धइ लेब। मइँ ओनकइ धन दौलत लइ लेब। मइँ आपन तरवारि क भांजब अउ ओनकइ हर एक चीज छीन लेब। मइँ आपन खातिर सब कछू लइ लेब।’

10मुला आप ओनपइ फूँकि दिहन अउ सगरे स ओन पचन्क ढाँकि दिहा उ पचे गहिर सागर मँ सीसा क नाई बूड़ि गएन।

11“का कउनो देवता यहोवा क समान अहइ? नाहीं, आप क बराबरी क कउनो देवता नाहीं, तू आपन पवित्तर होइ मँ अजूबा अहा तोहरे मँ अचरजवाली सक्ती बाटइ आप अजूबा चमत्कार करत हीं।

12आप आपन दाहिन हाथ क पसारेस अउर धरती ओनका निगल लिहेस।

13आप मेहरबानी कइके लोगन क लइ चलइँ जेका आप बचाइन ह। आप आपन सक्ती स इन लोगन क आपन पवित्तर अउ सुहावना भुइँया मँ लइ जाइँ।

14“दूसर देस जब इ कथा क सुनिहीं अउर उ सबइ डेराइ जइहीं। पलिस्तीन क मनई डर स कँपिहीं।

15तबहिं एदोम क नेतन डर स कँपिहीं मोआब क नेतन डर स कँपिहीं, कनान क मनई आपन हिम्मत छोड़ि देइहीं।

16ओनमाँ डर समाइ जाइ जबहिं उ पचे तोहार सक्ती देखिहीं। इ सबइ चट्टाने क नाई सान्त रइहीं जब तलक यहोवा क लोग निकरि न जाइँ, जब तलक उ लोग निकरि न जाइँ जेका आप बनाइन ह।

17यहोवा तू आपन पहाड़े ताई आपन लोगन क लइ जा। ओनका उ जगहिया मँ रहइ द्या जेका तू आपन सिंहासन बरे बनाएस ह, तोहार आपन यहोवा क मन्दिर क बगलमँ, जेका तू आपन हथवा स बनाएस ह।

18“यहोवा हमेसा हमेसा राज्ज करत रइहीं।”

19हाँ इ फुरे अइसा भवा। फिरौन क घोड़ा, सवार अउ रथ समुद्दर मँ चला गएन। यहोवा ओनके ऊपर समुद्दर क पानी लइ आइ दिहस। मुला इस्राएल क मनइयन झुरान धरती प चलिके समुद्दर पार कइ लिहन।

20तब्बइ हारून क बहिन नबिया मिरियम एक ठु ढपली लिहस। मिरियम अउ दूसर मेहररूअन नाचइ गावइ लागीं। मिरियम क गवनिया क बोल रहा:

21“यहोवा बरे गावा। काहेकी उ बड़वार काम किहेस ह। उठाइके बहाइ दिहस घोड़ा अउ सवारे क सगरे क बीच मँ”

22मूसा इस्राएल क मनइयन क लाल सागर स सूर रेगिस्तान लइ जात रहा। लोग तीन दिना तलक रेगिस्तान मँ जात्रा करत रहेन। उ पचे तनिकउ पानी नाहीं पाइ सकेन।

23तीन दिना क पाछे मनइयन मारा आएन। मारा मँ पानी रहा। पानी ऍतना करूआ रहा कि लोग पिउ नाहीं सकत रहेन। (इहइ कारण रहा कि ठउरे क नाउँ मारा पड़ि गवा।)

24मनइयन मूसा क ओराहना दिहन। मनइयन कहि बइठेन, “अब हम पचे का पिई?”

25मूसा यहोवा क दोहाई दिहस। ऍह बरे यहोवा ओका एक बृच्छ देखाएस। मूसा बृच्छे क पानी मँ नाएस। जब उ अइसा किहस, पानी बढ़िया पिअइ क जोग्ग होइ गवा। उ ठउरे प यहोवा लोगन क परखेन अउ ओनका एक नेमॅ दिहन। यहोवा लोगन क बिस्सास क भी जाँच किहस।

26यहोवा कहेस, “तू पचन्क आपन परमेस्सर यहोवा क हुकुम जरूर मानइ चाही। तू सबन्क उहइ करइ चाही जेकॉ उ नीक कहत हीं। जदि तू पचे यहोवा क हुकुम अउ नेमॅ क मनब्या तउ तू पचे मिस्री मनइयन क नाई बेमार जिन होब्या। मइँ तोहार यहोवा तू पचन्क कउनो अइसी बेरामी नाहीं देब जइसे मइँ मिस्री मनइयन क दीन्ह ह। मइँ यहोवा हउँ, मइँ उहइ हउँ जउन तोहका बेमारी स नीक बनवत हउँ।”

27तबहिं लोगन एलिम तलक क जात्रा किहेन। एलीम मँ पानी क बारह झरना रहेन अउ हुवाँ सत्तर खजूरे क पेड़ रहेन। ऍह बरे लोगन हुवाँ पानी क नगिचे डेरा डाइ लिहेन।

← Chapter 14 Jump to: Chapter 16 →