Numbers 2

Awadhi

← Chapter 1 Jump to: Chapter 3 →

1यहोवा मूसा अउ हारून स कहेस,

2“इस्राएल क मनइयन क मिलापवाला तम्बू क चारिहु कइँती आपन तम्बू लगावइ चाही। हरेक दल क आपन झण्डा होइ अउ हरेक मनई क आपन समूह क झण्डा क लगे आपन तम्बू लगावइ चाही।

3“यहूदा क सिबिर झण्डा क पूरब मँ होइ जेहर सूरज निकरत ह। यहूदा क मनई हुवँइ सिबिर लगइहीं। यहूदा क मनइयन क अगुआ अम्मीनादाब क पूत नहसोन अहइ।

4इ दल मँ 74,600 मनसेधू रहेन।

5“इस्साकार क परिवार समूह यहूदा क मनइयन क ठीक पाछे होइ। इस्साकार क मनइयन क नेता सूआर क पूत नतनेल अहइ।

6इ दल मँ 54,400 मनसेधू रहेन।

7“जबूलून क परिवार समूह भी यहूदा क परिवार समूह स ठीक आगे आपन सिबिर लगाइ। जबूलून क मनइयन क नेता हेलोन क पूत एलीआब अहइ।

8इ दल मँ 57,400 मनसेधू रहेन।

9“यहूदा क सिबिर मँ 1,86,400 मनसेधू रहेन। इ सबइ आपन अलग-अलग परिवार समूहन मँ बँटा भवा रहेन। यहूदा पहिला समूह होइ जउन उ टेमॅ अगवा चली। जब लोग एक ठउर स दूसर ठउर क जात्रा करिहीं।

10“रूबेन क झण्डा पवित्तर तम्बू क दक्खिन मँ होइ। हरके समूह आपन झण्डा क लगे आपन सिबिर लगाइ। रूबेन क लोगन क प्रधान सदेऊर क पूत एलीसूर बाटइ।

11इ दले मँ 46,500 मनसेधू रहेन।

12“सिमोन क परिवार समूह क रूबेन क परिवार समूह क ठीक पाछे आपन सिबिर लगाइ। सिमोन क मनइयन क अगुआ सूरीसद्दल क पूत सलूमीएल अहइ।

13इ दले मँ 59,300 मनसेधू रहेन।

14“गद क परिवार समूह भी रूबेन क मनइयन क ठीक पाछे आपन सिबिर लगाइ। गाद क लोगन क प्रधान रूएल क पूत एल्यासाप अहइ।

15इ दले मँ 45,650 लोगन रहेन।

16“रूबेन क सिबिर मँ सब दलन क 1,51,450 मनसेधू रहेन। रूबेन क सिबिर दूसर समूह होइ जउन उ समइ चली। जब मनई एक ठउर स दूसर ठउर क जात्रा करिहीं।

17“जब मनई जात्रा करिहीं तउ लेवी क सिबिर ठीक ओकरे, पाछे चली। मिलापवाला तम्बू दूसर सिबिरन क बीचउ बीच ओनके संग रही। मनइयन आपन सिबिर उहइ सिलसिला मँ लगइहीं जउने क्रम मँ उ पचे चलिहीं। हरेक मनई आपन परिवार क झण्डा क संग रही।

18“एप्रैम क झण्डा पच्छिम कइँती रही। एप्रैम क परिवार-दलन हुवँइ सिबिर लगइहीं। एप्रैम क लोगन क प्रधान अम्मीहूद क पूत एलीसामा अहइ।

19इ दल मँ 40,500 लोगन रहेन।

20“मनस्से क परिवार समूह एप्रैम क परिवार क ठीक पाछे आपन सिबिर लगाइ। मनस्से क मनइयन क नेता पदासूर क पूत गम्लीएल अहइ।

21इ दल मँ 32,200 मनसेधू रहेन।

22“बिन्यामीन क परिवार समूह भी एप्रैम क परिवार क ठीक आगे आपन सिबिर लगाइ। बिन्यामीन क लोगन क नेता गिदोनी क पूत अबीदान अहइ।

23इ दले मँ 35,400 मनसेधू रहेन।

24“एप्रैम क सिबिर मँ 1,08,100 मनसेधू रहेन। इ तीसर परिवार होइ जउन तब चली जब मनईं एक ठउर स दूसर ठउर क जात्रा करिहीं।

25“दान क सिबिर क निसान उत्तर कइँती होइ। दान क परिवार दलन हुवँइ सिबिर जमाई। दान क मनइयन क प्रधान अम्मीसद्दै क पूत अहीएजेर अहइ।

26इ दले मँ 62,700 मनसेधू रहेन।

27“आसेर क परिवार समूह दान क परिवार समूह क ठीक पाछे आपन सिबिर डाइ। आसेर क मनइयन क नेता ओक्रान क पूत पगीएल बाटइ।

28इ दले मँ 41,500 मनसेधू रहेन।

29“नप्ताली क परिवार समूह दान क परिवार समूह क ठीक पाछे आपन सिबिर लगाइ। नप्ताली क मनइयन क प्रधान एनान क पूत अहीरा अहइ।

30इ दले मँ 53,400 मनसेधू रहेन।

31“दान क सिबिर मँ 1,57,600 मनसेधू रहेन। जब मनइयन एक ठउर स दूसर ठउर क जात्रा करिहीं तउ इ काफिला आखिरी परिवार समूह होइ। हर एक मनई आपन झण्डा क अनुसार आपन परिवार क संग होइ।”

32सबहिं डेरन मँ अलग-अलग दलन क सब परिवारन क मनसेधुअन क समूचइ गिनती रही 6,03,550।

33मूसा इस्राएल क दूसर मनइयन मँ लेवी क मनइयन क नाहीं गनेस। इ यहोवा क हुकुम रहा।

34यहोवा मूसा क जउन कछू करइ क कहेस उ सब क इस्राएलियन मान लिहेन। इस्सर क कहइ क मुताबिक इस्राएल क मनइयन आपन झण्डा तरे आपन सिबिर लगाएन। यहोवा क कहे क मुताबिक इस्राएल क मनइयन जात्रा किहन। हरेक मनई आपन परिवार अउ आपन परिवार समूह क संग रहा।

← Chapter 1 Jump to: Chapter 3 →