1 Kings 2 — Aymara 1997

1Davidan jiwañap urux jak'achasinïnwa, ukat Davidax Salomón yuqapar iwxäna:

2“Nayax sarxäwa, kunjämatix taqi jaqinakas aka uraqit sarxapki ukhama. Jumax ch'amañchasim, chachjamarak sarnaqam.

3Tatit Diosaman iwxanakap phuqham, munañap lurasa, kamachi arunakapa, arsutanakap phuqhasa, Moisesan kamachipan qillqatäki ukhamarjama, kawkharutix sarkäta ukkhansa taqi luräwinakaman askir sarañapataki.

4Tatitusti kuntix nayar arsuwaykitu uk phuqharakini: “Wawanakamatix naya nayraqataxan chiqa kankañampi, taqi chuymampi, taqi jakañapampirak sum sarnaqapxani ukkhaxa, janipuniw wila masim taypit Israel markan reyi qunuñankañax tukuskaniti” sasa.

5“Ukhamarusa, jumax sum yattaxa, kuntix Seruiá jaqin Joab yuqapax lurkitu ukxa, Joab jilïrix Ner jaqin Abner yuqaparuw jiwayäna, Jéter jaqin Amasá yuqaparus jiwayarakïnwa. Uka pani jaqisti Israel ejerciton jilïrinakapänwa, ukampis Joab chachax sumankañ urunakan jupanakar jiwayäna, nuwasïwin jiwayatanakat phuqsusiñataki. Uka jiwayatanakatsti nayarukiw juchañchitu.

6Jichhasti, jumax wali amuyt'ampi luram, janiw mä suman jiwañapakxa munätati.

7Galaad chiqankir Barzilai jaqin wawanakaparusti suma chuymampiw uñjäta, manq'añamatsa manq'ayätawa, nayax Absalón jilamat jaltkäyäta ukapachax, jupanakaw yanapt'apxitu.

8Ukxarusti amuyasirakim jumampïki uka Guerá jaqin Simí yuqapata, jupasti Bahurim chiqankir benjaminita jaqiwa. Nayax Mahanaim uksar saraskäyät ukapachaw jupax axsarkañ arunakampi ñanqhachanitu. Uka qhipatsti Jordán jawirarux nayar katuqir mistunirakïnwa, nayasti Tatit laykuw juramento lurañaxäna jupar jan jiwayañataki.

9Jumax, nayar uka jan wal luratapat jan khuyapayasimti. Ch'ikhïtawa, jumaw jupar kun lurañsa yatïta, ukampis t'aqhisis jiwañap wakt'ayäta.”

10Davidax jiwxänwa, juparusti nayra awkinakap jak'aruw imt'xapxäna, Davidan Markapa satäki uka markana.

11Jupasti pusi tunka maraw Israel marka apnaqawayäna, paqallqu marax Hebrón markana, kimsa tunka kimsan marasti Jerusalén markana.

12Uka qhipatsti Salomonax David awkip lantiw reyit utt'asxäna; jupasti Israel markarux wali suma sayt'ayata, ch'aman marka tukuyäna.

13David reyin jiwxatapatsti, Adonías chachax Salomonan Betsabé taykapan ukaruw saräna. Jupasti jiskt'änwa: —¿Suma amtäwimpikiti juttaxa? —sasa. Adoniasasti sänwa: —Jïsa —sasa.

14Ukatsti saskakïnwa: —May sañ munsma —sasa. Betsabé warmisti sänwa: —Saskakita —sasa.

15Adoniasasti sänwa: —Jumax yattawa, Israel marka apnaqañax nayaruw wakt'itäna, taqi markpachaw nayan reyïñaxa suyaskarakïna. Ukampis jichhax Salomón jilaxaw reyit utt'atäxi, Tatituw ukhamäñap munatayna.

16Jichhasti may achikt'asiñ munsma, janikiy “Janiw” sistati —sasa. Betsabé warmisti sänwa: —¿Kunarak muntasti? —sasa.

17Adoniasasti sarakïnwa: —Achikt'asïma, Salomón reyiruy mayirapita, Abisag sunamita tawaqu warmixäñapatak nayar churañapataki. Jupasti janiw jumarux “Janiw” siskätamti —sasa.

18Betsabé warmisti sänwa: —Walikiwa, nayaw reyir parlarapïma —sasa.

19Ukhamasti Betsabé warmix Adoniasatakiw Salomón reyimpi parlir saräna. Reyisti taykapar katuqañatakix sayt'asïnwa, nayraqatapan alt'asirakïna. Ukatsti qunuñapar qunt'asisinxa, taykapatakix mä qunuñ aptayanïna; Betsabeasti Salomonan kupïxaparuw qunt'asïna,

20ukat jupar sarakïna: —May achikt'asiñ munsma. Janikiy “Janiw” sistati —sasa. Reyisti ukxaruw säna: —Taykaxay, kuntix munkta uk mayiskakita, janirakiw “Janiw” siskämati —sasa.

21Taykapasti sänwa: —Sunem markankir Abisag tawaqux Adonías jilamar warmipäñapatak churatäxpan —sasa.

22Reyisti ukxaruw taykapar säna: —¿Kunatarak jumasti Abisag sunamita tawaqu Adoniasan warmipäñapatak nayar mayistasti? Adoniasax jilïr jilaxawa, ukhamarus Abiatar sacerdotempi, Seruiá jaqin Joab yuqapampix jupamp arust'ächixaya. ¿Marka apnaqäwimppachti jupatak mayiñ munistaxa? —sasa.

23Ukham sasinsti, Salomón reyix Tatit laykuw juramento luräna: “¡Diosax nayar jan khuyapt'ayasis mutuyitpan, janitix Adoniasar uka mayïwipat jakañapamp phuqhañapatak kuns lurkä ukkhaxa.

24Tatit laykuw juramento lurta, David awkixan reyi qunuñaparux jupaw qunt'ayitu, arsutaparjamaw sum utt'ayarakitu, Adoniasax jichhürpachaw jiwani!” sasa.

25Ukspachaw Salomón reyix Benaías chachar säna: “Adoniasar jiwayanim” sasa. Benaiasasti sarasin Adoniasarux jiwayanïna.

26Ukxarusti reyix Abiatar sacerdoteruw sarakïna: “¡Anatot uraqimar sarxam! Jumarux jiwayañaw wakisi, ukampis janiw jichhax jiwaykämati, David awkixan nayraqatapan Tatitun arcap apatam layku, jupjamaraki pachpa t'aqhisiñanak t'aqhisitam layku” sasa.

27Ukhamat Salomón reyix Abiatarar Tatitun sacerdotëñapat jaqunuküna, ukampiw Tatitun arsutapax phuqhasïna, Siló chiqan Elí chachan wila masinakapat arskatayna ukaxa.

28Joab chachax Adoniasampi arust'änwa, Absalonan jan arkiripäkchïn ukasa. Ukhamasti Joabax Salomonan arunakap yatisinxa, Tatitump Jikisiñ Carparuw jan jiwayatäñatak jaltxäna, ukatsti altaran waxranakapat katuntasïna.

29Ukampis Salomón reyiruw yatiyapxäna, Joab chachan Tatitump Jikisiñ Carpar jaltxatapa, altaran waxranakapat katuntasitapa. Ukat Salomonax Benaiasar säna: “¡Saram, Joab chachar jiwayanim!” sasa.

30Benaiasasti Tatitump Jikisiñ Carparuw saräna, ukatsti Joab chacharux sänwa: —Reyix “Mistunpan” sistamwa —sasa. Joab chachasti sänwa: —¡Janiwa! ¡Akan jiwä! —sasa. Benaiasasti kuntix Joab chachax siskatayna uk reyir yatiyxarakïna.

31Ukat reyix säna: —Ukhamax arsutaparjam luram. Jiwayam, ukatsti imantanim. Ukhamat Joab chachan jan juchan jaqinakaru jiwayatapat jan juchanïkxañäniti.

32Tatituw jiwatapat jupa pachpar juchañchaskani, pä aski chiqa chachanakar cuchillompi chhuqhuntas jiwayatapata, uksti janiw David awkixax yatkänti. Ner jaqin Abner yuqaparuw jiwayi, jupasti israelita ejerciton jilïripänwa, Jéter chachan Amasá yuqaparux jiwayarakiwa, jupasti Judá ejerciton jilïripänwa.

33Jupanakan jiwatapatsti, juchax wiñayatak Joab chachxankaniwa, ukhamaraki jupat saraqir wawanakapxana. Ukampisa, Tatitun samarañapax Davidampipunïniwa, ukhamaraki jupat saraqiri wawanakapampi, reyi qunuñapampi —sasa.

34Benaías chachasti sarasin Joab chacharux jiwayanïna. Ukatsti Joab chachax wasaran utjir utapan imt'atäxänwa.

35Ukatsti reyix, Benaías chacharuw Joab lanti ejerciton jilïripat uchäna, Abiatar sacerdote lantsti Sadoc sacerdoteruw ucharakïna.

36Ukatsti Simí chachar jawsayanisin, jupar akham sarakïna: —Jerusalén markan mä uta utachasim, ukan utjasïta. Ukampis janiw ukat kawksarus mistütati.

37Kunürutix uka utat mistkäta, Cedrón jisk'a jawirsa makhatkäta ukkhaxa, jiwätawa, uksti sum katuqasim, jumaw ukat juchanïskäta —sasa.

38Simí chachasti ukxaruw reyir säna: —Walikiwa, juma reyin arsutamarjamaw nayax phuqhä —sasa. Ukatsti Simí chachax Jerusalén markan jaya maranakaw jakäna.

39Ukampis ukat kimsa mararux Simí chachan uywatanakapat paniniw Gat markar jaltxapxatayna, kawkhantix Maacá chachan Aquís yuqapax reyïkän ukaru. Kunapachatix Simí chachar pani uywatanakapan Gat markankasipkatap yatiyapxäna ukkhasti,

40jupax sartasin asnop caront'asïna ukatsti uywatanakap thaqhiriw Gat chiqar sarawayäna. Simí chachax Gat chiqata pani uywatanakapampi kutt'ankäna ukkhaxa,

41Salomonax yatïnwa, Simí chachan Jerusalén markat mistusin Gat chiqar saratapa, ukatsti niya kutt'anxataparaki.

42Ukat reyix Simí chachar jawsayanïna, juparusti sänwa: —¿Janit Tatit layku juramento lurayksma, ukat iwxkaraksma, kunürutix kawkharus mistkäta ukkhaxa, jiwätawa, sasaxa? Jumasti: “Walikiwa, arsutamarjamaw nayax phuqhä” sarakistasä.

43¿Kunatarak Tatitur juramento luratam jan phuqktasti, nayax sisksma ukarus janirak jayskistasti?

44Jumax sum yattaxa kuna jan waltix David awkixar lurktaxa ukxa. Jichhaw Tatitux jumar t'aqhisiyätam, kunjämtix jumax awkixar t'aqhisiykta ukhama.

45Ukampis nayarux aski waxt'äwinakap churitani, David awkixan saraqirinakapasti wiñayaw Tatitun nayraqatapan marka apnaqapxani —sasa.

46Ukatsti reyix Benaiasaruw Simí jaqir jiwayañapatak säna, jupasti mistuwayasin Simí chachar jiwayanïna. Ukhamat marka apnaqäwix Salomonan amparapan sum sayt'awayäna.