Amos 2

Aymara 1997

← Chapter 1 Jump to: Chapter 3 →

1Tatitux akham siwa: “Moab markankir jaqinakax walja ñanqhanakpun lurapxi, ukat jupanakarux mutuyarakï; Edom markan reyipan ch'akhanakap qhillar tukuyañkam phichhantapxatapata.

2Ukat Moab uraqirux ninampi phichhantä, uka ninax Queriot markan reyi utanakap nakhantani; moabitanakax wali ch'axwañ taypina, warariñ taypina, trompet phust'asiñanak taypin jiwarapxani.

3¡Nayaw reyiparux markap taypit alisnukü; reyimp chiksti taqi jilïr jaqinakaparuw jiwarayarakï!” Ukham siw Tatituxa.

4Tatitux akham siwa: “Judá markankir jaqinakax walja ñanqhanak lurapxi, ukat jupanakarux mutuyarakï; Tatitun yatichäwinakap janiw katuqapkiti, janirakiw kamachinakaparus phuqhapkiti, jan ukasti kawkïr yaqha diosanakarutix awkinakapax yupaychapkän ukanakaruw yupaychapxi.

5Ukat Judá markarux ninampi phichhantä, uka ninaw Jerusalén markan jach'a utanakapsa q'al nakhantani.”

6Tatitux akham siwa: “Israel markankir jaqinakax walja ñanqhanak lurapxi, ukat jupanakarux mutuyä; jan juchan jaqirux qullqiruw aljantapxi, jan kunan wajcha jaqirusti mä paris wiskhuruw aljantapxi.

7Jan kunan jaqinakarusti wali t'aqhisiyañampiw jisk'achapxi, llamp'u chuyman jaqinakarux janiw chiqapar uñjapkiti. Awkis, yuqas, pachpa warmimpiw ikintasipxi, ukhamat nayan Qullan sutix takichasipxi.

8Manut jaytat isinakxar winkxatasaw yaqha diosanakar yupaychasax altaran manq'apxi; qullqinak apsusasti, diosanakapan utaparuw vino umirix sarapxi.

9Nayasti, jumanak laykuw amorreonakarux q'alpun tukjta; cedro quqanakjam jach'anakäpkchïnsa, roble quqanakjam ch'ullqhïpkchïn ukasa.

10Nayaw jumanakarux Egipto markat irpsunipxsma, pusi tunka maraw wasaran irpnaqapxsma amorreonakan uraqipsa jumanakaruw churapxsma.

11Israelitanaka, janiw jan yatirix tukupkasmati, jumanak taypit yaqhipanakarux profetanak tukuyta, mayninakarusti nazireonak tukuyarakta.” Ukham siw Tatituxa.

12“Jumanakax nazireonakar munkir jan munkir vino umayapxtaxa, profetanakarusti nayxat parlir jark'apxaraktaxa.

13Ukat jichhax, israelitanaka, kunjämtix mä carretax trigo khumuntatax uraqir wal jatxattixa, ukhamaw jumanakarux jatxattapxäma.

14Qawqhsa jaltasipkätawa, janiw atipapkätati; wali ch'aman jaqirusa ch'amax pist'aniwa, ch'amamp atipt'irïki uka jaqis qhispkaniti.

15Mich'inak antutt'añ apnaqiris janiw sayt'askaniti, jank'aki t'ijtirinakasa, caballxat jaltirinakas qhispipkaniti.

16Uka urunxa, wali ch'amamp nuwt'asir jaqisa, nuwasiñ yänakap apanukusaw jaltxani.” Tatituw uk arsuwayi.

← Chapter 1 Jump to: Chapter 3 →