Amos 3

Aymara 1997

← Chapter 2 Jump to: Chapter 4 →

1Israelitanaka, Tatitun arunakap ist'apxam, Egipto uraqit irpsunki uka markar arsut arunaka:

2“Taqi markanak taypitxa, jumanak saparukiw ajllisipxsma. Ukat taqi jan wali ñanqhanak lurapxatanakamat taripapxäma”.

3Mä amtakïsipki ukkhaw jaqix panini suma sarnaqapxixa;

4kunsa katjki ukkhaw leonax ch'umin jach'at warari; manq'añax utjki ukkhaw león qallunakax putupan uxupxi;

5kuna sipitarus jalt'ki ukkhaw jamach'ix uraqir jalaqtani; kunsa katthapki ukkhaw sipitax uraqin unxti;

6trompetan phust'asitap markan ist'aski ukkhaw jaqix wal sustjasi; Tatitux kuns apayanki ukkhaw jan walinakax markan utji.

7Tatitux janipuniw kunsa lurkaspati profeta luqtirinakapar jan yatiykasaxa.

8¿Khitirak jan sustjaskaspa leonan wararitap ist'asasti? Tatitutix parlam saspaxa, ¿khitirak jutir urunakat jan yatiykaspasti?

9Asdod markankir reyi utanakapan yatiyapxam, Egipto markankir reyi utanakapan yatiyapxarakim: “Samaria uraqin qullunakapar jutapxam; uka markan utjir jan walt'añanakampi, t'aqhisiyañanakampi uñjapxam.”

10Tatitux akham siwa: “Janiw jupanakax chiqa lurañ yatipkiti, reyi utanakapan ch'amamp lunthatat yänak imapxi.”

11Ukat Tatitux akham arsu: “Mä uñisir markaw uraqimarux taqi tuqit muyuntani, jach'a uyunakam t'unthapini, reyi utanakamatsa yänakam q'alak apsusiwäpxani.”

12Tatitux akham siwa: “Kunjämatix awatirix leonan lakapat pä chhuchhulliksa, jan ukax mä chikat jinchuksa aparasixa, ukhamaw Samaria markan jakir israelitanakat juk'aniki qhispipxani, Damasco markat apanit suma qunuñan qunt'asipki ukanakaxa.”

13Taqi ch'aman Tatitux siwa: “Ist'apxam, Jacobun markapar qhanañchapxam,

14Israel markaru jucha luratanakapat wayt'kä uka uruxa, Betel markan utjir yaqha diosanakar yupaychañ altaranakapsa t'unthapïwa; altaran uchat waxranakapsa, uraqirkamaw willthapirakï.

15Thaya pachan qamañ utanaka, jallu pachan qamañ utanaksa t'unthapïwa, marfilat lurat utanaksa ch'usaruw tukuyä, reyi utanakapsa q'al tukjarakï.” Ukham siw Tatituxa.

← Chapter 2 Jump to: Chapter 4 →