Haggai 1

Aymara 1997

Jump to: Chapter 2 →

1Darío reyin payïr mara markar apnaqatapana, suxtïr phaxsina, nayrïr uru saraqataruw Tatitux Hageo profeta tuqi parläna, Salatiel chachan Zorobabel yuqapampiru, khititix Judá uraqi apnaqirïkäna ukaru, Josadac chachan Josué yuqapampiru, khititix jilïr sacerdotëkän ukampiru.

2Taqi ch'aman Tatitux akham sänwa: “Aka jaqinakax ‘Tatitun utap wasitat sayt'ayañax janïräkiwa’ sasaw sapxi.

4Utaxan laqayar tukuyatäkipansa, ¿jumanakatakisti walikïskiti suma k'achachat utanakan utjasipxañamasti?

5Naya, taqi ch'aman Tatituw sapxsma, ukham sarnaqatanakamat wal amuyt'asipxam.

6Jumanakax wal yapucht'apxtaxa, ukampis juk'ak apthapipxtaxa; manq'apxtawa, ukampis janiw sist'asipktati; umapxtawa, ukampis umat pharjatakïsipktawa; isthapisipxtawa, ukampis janirakiw junt'thapipktati; irnaqatat qullqi katuqapkta ukampix janiw kunsa jikxatapktati.

7Naya, taqi ch'aman Tatituw sapxsma, sarnaqäwinakamat amuyasipxam.

8Qullunakar sarasin lawanak aptanipxam, nayan utax wasitat utachapxam; nayasti ukan k'uchikïyäwa, jach'a kankañax uñacht'ayarakï.

9Jumanakax wal thaqhapxtaxa, ukampis juk'ak jikxatapxtaxa; kuntix utanakaman imasipkta ukanaksti nayax may phust'asakiw ina ch'usar tukuyta. ¿Kunata? Utaxan laqayar tukuyatätapata, jumanakan utanakamatakik llakisipxatamata. Naya, ch'aman Tatituw arsta.

10Ukat jumanakatakix jallux jan purxatkiti, uraqis achuykarakiti.

11Nayaw jallu jan puriykti, pampanakxarusa, qullunakxarusa, trigo yapunakxarusa, uva yapunakxarusa, olivo quqanakxarusa, pampa yapunakxarusa, jaqinakxarusa, uywanakxarusa, ukhamarak taqi luratanakapxarusa” sasa.

12Kunapachatix Zorobabelampi, Josué chachampi, ukhamaraki markankir jaqinakampix kuntix Tatitux Hageo profeta tuqi parlkän ukanak ist'asaxa, wal axsarayasipxäna.

13Tatitun yatiyiripa Hageosti, markachirinakar Tatitun arsutap yatiyäna akham sasa: “Tatitux siwa: ‘Nayax jumanakampïsktwa, naya Tatituw arsta’ ” sasa.

14Tatitux ukham Judá marka apnaqir Zorobabelampiru, sacerdotenakan Josué jilïripampiru, markachirinakampirux ch'amañcht'äna; ukatsti, suxtïr phaxsina, pä tunka pusin uru saraqataru, Darío reyix Persia marka payïr mara apnaqkän ukkhaw taqi ch'aman Tatitu Diosapan utap wasitat utachañ qalltapxäna.

Jump to: Chapter 2 →

Recommended Reading

Commentary Haggai Commentaries → Devotional Haggai Devotional Guide → Get This Bible Aymara Study Bible →