Haggai 2

Aymara 1997

← Chapter 1 Jump to:

1Paqallqür phaxsina, pä tunka mayan uru saraqatarusti, Tatitux wasitat Hageo profetar parläna,

2ukatsti Zorobabelampiru, Josué chachampiru, taqi jaqinakampir sañapatakiw arsüna:

3“Khitinakatix nayrïr suma uta uñt'apkän ukanakax sapxpan: ¿Kunjämas jichhax aka machaq utaxa? ¿Janixay kunaparükis nayrïr utat sipanxa?

4¡Zorobabel, ch'amañcht'asim! ¡Josué, sacerdotenakan jilïripa, jumas ch'amañcht'asirakim! Aka markankir jaqinaka, ch'amañcht'asipxam. Irnaqapxam, nayax jumanakampïsktwa. Naya, taqi ch'aman Tatituw arsta.

5Egipto markat mistunipkta ukapachax jumanakampïñatakiw nayax arsüyäta, ukasti phuqhasiskiwa. Ajayuxaw jumanakampïski, jan axsarapxamti.

6Akat mä juk'arusti nayax alaxpachampi, akapachampi khathatiyä, jach'a qutsa, waña uraqsa khathatiyäwa.

7Taqi markanak khathatiyarakï, ukatsti qamir yänakap apanipxani, nayan utaxasti k'ajkirirakïniwa.” Taqi ch'aman Tatituw arsu:

8“Nayankiw qullqisa, qurisa.

9Aka payïr utasti nayrïr utat sipan k'ajkirïniwa, ukansti suman sarnaqasiñ utjayarakï. Naya, taqi ch'aman Tatituw arsta.”

10Darío reyin payïr mara marka apnaqäwipana, llätunkïr phaxsina, pä tunka pusini uru saraqataruw Tatitux Hageo profetar parläna,

11kamachinak tuqit taqi ch'aman Tatitun sutipar sacerdotenakar jiskt'añapatakiw arsurakïna. Hageo profetasti akham sasaw jupanakar jiskt'äna:

12“Sañäni, mä jaqix luqtat aycha isipar llawt'at apaspa, ukat isipan thiyapax t'ant'arusa, manq'arusa, vinorusa, aceiterusa, jan ukax kuna manq'arus purispa ukax: ¿uka laykuti uka manq'ax luqtatäxarakispasti?” Sacerdotenakasti —Janiwa —sapxänwa.

13Hageo profetasti saskakïnwa: “Sañäni, maynitix amaya llamkt'asin q'añuchasispa, ukatsti uka yänakaru llamkt'aspa ukaxa, ¿llamkt'at laykuti uka yänakax q'añu tukurakispasti?” Sacerdotenakasti —Jïsa —sapxarakïnwa.

14Ukat Hageo profetax säna: “Tatitux siwa: ‘Aka jaqinakax ukar uñtasitawa. Kunanaktix lurapki, kunanaktix luqtapkitu ukanakas q'añuwa.

15Jumanakax akat uksarux wal amuyt'asipxam. Nayan utax janïra utachañ qalltkasa,

16¿kunarak jumanakar kamachapxayätamsti? Kunapachatix jumanakat maynix pä tunka tupu grano aptir sarkän ukkhaxa, tunkak jikxatäna; ukhamaraki, maynix vino lurapkis uka chiqar phisqa tunka wayuchanak vino waytir saräna ukkhasti, pä tunkak jikxatxäna.

17Nayaw jumanakan taqi ch'ama tukutanakamxarux qasawimpi, chhijchhimpi q'al tukjtxa, uk uñjkasas jumanakax janiw nayarux jaysapkistati. Naya, taqi ch'aman Tatituw uk arsta.

18Jichhüru, llätunkïr phaxsina, pä tunka pusin uru saraqataruw utaxataki nayrïr qala uchantapxtaxa.

19Walikiwa, wal amuyasipxam, jichhat uksarux janiw jumanakan pirwanakaman trigox pist'kaniti. Janïraw uva alix achunïkiti, janirakiw higosa, granadosa, olivos achunïkiti; ukampis jichhürut uksarux nayaw jumanakar jilarkir achunak churapxäma.’ ”

20Ukürpachaw Tatitux wasitat Hageo profetar parläna,

21ukatsti Judá marka apnaqir Zorobabel chachar sañapatakiw arsurakïna: “Nayaw alaxpacha, akapach khathatiyä;

22akapach apnaqäwinakarus tukjäwa, reyinakan qunuñanakapsa t'unjäwa; nuwasiñatak sarir carronakapsa willthapirakïwa, carronak apirinakarus tukjäwa, caballonakasa, caballonakxat sarir jaqinakas jiwaraniwa; sapaqat mayniw jilapan espadapampi chhuqhuntat jiwarani.

23Ukampisa, nayaw Zorobabelarux chhijllasta, ukürusti nayaw munañan kankañax jupar churä. Nayätwa Israel markan Tatitupaxa, arstwa, ukhampun lurä.”

← Chapter 1 Jump to: