Hosea 3

Aymara 1997

← Chapter 2 Jump to: Chapter 4 →

1Tatitux wasitat sarakitu: “Oseas, warmimax janiw jumatakjamäkiti, jupan mayni munatapaw utji. Uka kipkarakiw israelitanakax jan nayatakjamäpkiti, k'ari diosanakaruw yupaychapxi, luqtäwi churatanakat manq'apxi. Ukampis saram, warmimarux munasim, kunjämtï nayax israelitanakar munastxa ukhama.”

2Ukatsti uka warmirux tunka phisqan qullqimpi, mä khumu chikatani cebadampiw alasta.

3Ukatsti juparux saraktwa: “Jichhax walja maranakaw nayampi jakasïta; janiw yaqha chachanakampi sarnaqxätati, nayasti jumatakikiw jakarakï” sasa.

4Walja maranakaw israelitanakax jan reyini, jan jilïr irpirini sarnaqapxani, wilañchanak jan luqtasa, jan altaranakani, jan sacerdotenakani, jan yaqha diosanakani.

5Uka qhipatsti israelitanakax kuttanxapxaniwa, Tatit Diosaparuw thaqhapxani, David reyiparuw thaqhapxarakini. Uka qhipa urunakansti, askinak katuqapxatapatxa, alt'at chuymampiw Tatitur jak'achasipxani.

← Chapter 2 Jump to: Chapter 4 →