Zephaniah 1

Aymara 1997

Jump to: Chapter 2 →

1Tatitux aka yatiyäwi arunak Sofonías profetarux churäna, kunapachatix Amón chachan Josías yuqapax Judá markan reyipäkän ukapacha. Sofonías profetax Cusí sat chachan yuqapänwa, Cusí chachasti Gedaliasan yuqapa, Gedaliasasti Amariasan yuqapa, Amariasasti Ezequiasan yuqaparakïnwa.

2Tatitux akham siwa: “Taqi kunatix akapach uraqin utjki ukanak q'al tukjä.

3Taqi jaqinakaru, uywanakaru, jamach'inakaru, chawllanakarus q'al tukjä, jan wali lurir jaqinakar lanqtasiyäwa, jaqirux akapach uraqitsa chhaqtayarakïwa.” Tatitux akham siwa:

4“Judá markaruw mutuyä, Jerusalén markankirinakarux mutuyarakïwa. Nayaw, akawjan utjir jaqin lurata Baal diosat jilt'irinak q'al chhaqtayä, sacerdotenakapan sutinakapsa taqpach chhaqtayarakï.

5Uta patanakar mistusin warawaranakar yupaychirinakarux tukjäwa, Tatitun nayraqatapan killt'askasa, jaqin lurat Milcom sat diosan sutip layku juramento luririnakarux tukjarakïwa.

6Ukatsti khitinakatix nayar arkkasin qhipar kuttapki ukanakarus tukjarakïwa, khitinakatix nayar jan thaqhapkitu, janirak nayar jiskt'asiris jutapki ukanakarus tukjäwa.”

7¡Tatit nayraqatan amukt'apxam, Tatitun mutuyañ urupaw jak'achasini! ¡Taqi kunas wakicht'atawa! ¡Jawsatanakax akankxapxiwa, ¡Markaxarux q'al jiwarayä!

8“Uka urunxa, jach'a jilïrinakarusa, reyin wawanakaparus mutuyäwa, nayar jan iyawsirinakaru, jan wali luräwinakapan sarnaqirinakarus mutuyäwa.

9Uka urunsti yaqha diosanakar arkirinakarux mutuyarakïwa, uywiripan utap lunthatat yänakampi, sallqjañampi phuqt'ayirinakarusa” sasa.

10Tatitux akham siwa: “Khä urunxa, Chawlla Punku satäkis ukäkatpacha yanap mayisa warariñanakaw ist'asini. Jaqin art'asitapax maysäx markatpachaw ist'asini, qullunakatsti allthaptkaspas ukhamaw ist'asirakini.

11¡Mortero sat chiqankir alakip lurir jaqinaka, wararipxam, taqi alakip luririnakaw jiwarani, sallqjañamp qullqi apnaqir jaqinakax tukjataw uñjasipxani!

12“Uka urunakanxa, Jerusalén markarux mä qhanampi qhant'ayasaw uñakipäxa. Kawkïr jaqinakatix jucha luratanakapat jan amthapisis qamasisipki ukanakarux mutuyäwa, chuymanakapansti sapxaraki: ‘¡Janiw Tatitux walsa jan walsa lurkaniti!’ sasa.

13Ukham jan wali amuyatanakapat taqi yänakapas aparatäpxani, utanakapas t'unjatarakïni. Utanaksa lurasipxaniwa, ukampis janiw uka utanakan jakapkaniti; uva alinaksa ayrusisipkaniwa, ukampis janiw uka uvat vino umapkaniti” sasa.

14¡Tatitun jach'a urupax jak'achasisinkiwa! ¡Jak'ankiwa, jank'akiw purinini! Tatitun jutäwip urusti wali jachañ urüniwa, jan axsarir ch'aman jaqinakas axsarañat wararipxaniwa.

15Uka urusti q'apisiñ urüniwa, llakisiña, jachañ ururaki, t'unjatäña, apanukutäña, qinayampi urpumpi phuqhantat ch'amak ch'iwi ururakïniwa;

16uka urux trompet phust'añampi, warariñampiw ist'asini, suma uyuchrantat markanakaru, jach'a alaykam lurat pukaranakar t'unjañataki.

17Tatitusti siwa: “Jaqinakarux t'aqhisiyäwa, jupanakasti jucha luratanakap laykux juykhunakjamaw sarnaqapxani. Wilanakapas laq'ar uñtat wartatäniwa, janchinakapas wanjam phint'atarakïniwa” sasa.

18Tatitun q'apisïwi urupanxa, aka uraqix uka q'apisiñapampix q'ala nakhantatäniwa, janiw jaqirux qullqipasa, quripas qhispiykaniti. ¡Aka uraqin jakir jaqinakax jan mayan tukjatarakïniwa!

Jump to: Chapter 2 →