Zephaniah 3

Aymara 1997

← Chapter 2 Jump to:

1¡Ay, Jerusalén marka, Tatitur saykatir marka, juchansa q'añuchjata, yaqha markanakarus t'aqhisiyiriraki!

2Tatitun aruparux janiw ist'känti, chiqachäwi arunaksa janiw ist'añ munkänti, Diosaparus janiw katuyaskänti, juparus jak'achasiñ janiw munkarakïnti.

3Jach'a jilïri jaqinakapax leonanakjamaw wararipxi; juchanak taripir jilïrinakapasa, wasaran sarnaqir qamaqinakjamaw ch'akhanaksa q'al manq'antapxi, qhipürutakix jan jilt'ayasa.

4Profetanakapas wali jach'achasiri, sallqa arunak parlirïpxiwa; sacerdotenakapax Tatitun qullan utapsa q'añuchapxiwa, kamachinakapsa p'akintapxarakiwa.

5Ukampis Tatituw uka markankaski; luräwinakapax taqinitakis askipuniwa. Sapa qhantatiw jan armt'asis chiqa arunakap arsuraki. Ukampis juchan phuqhantat jaqixa, luratanakapat janiw p'inqasipkarakisa.

6Tatitux siwa: “Nayax markanakap t'unjta, pirqanakapan utjir jach'a pukaranakapsa q'al tinkurayta, markan thakhinakapsa jan mä jaqini ch'usa tukuyarakta. ¡Uka ch'usa markanakanxa janirakiw mä jaqis sartkxiti!

7Ukat sista: ‘Jerusalén markax axsartitaniwa, iwxa arunakaxsa ist'arakitaniwa; mutuyatäñapax janiw wakiskxaniti, janirakiw utanakapas t'unjatäkaniti.’ Ukampis jupanakax jank'akiw kunayman juchanak lurañanakar puripxaraki.

8Jichhaxa, ukham lurapxatanakamatxa, jumanakar mutuyañ urux jak'ankiwa. Naya, Tatituw Israel markan Diosapätxa, arsutaxarux phuqhapuniwa. Markanakar mayar tantachthapiñatakiw amtta, jach'a q'apisiñaxampiw uka markanakar mutuyä. Q'apisitäkta ukkhaxa, mä ninjamätwa; ¡aka uraqpach nakhantayarakïxa!

9“Kunapachatix uka urux purinini ukkhaxa, taqi markanakan parläwinakap q'umachä, taqinis nayar yupaychapxañapataki, taqinis nayar arkapxañapataki.

10Etiopía jawir tuqinakata, ch'iqitatat markaxasti, achikt'asisaw waxt'äwinak apanisin nayan ukar jutapxani.

11Uka urunsti, nayan Jerusalén markaxa, naya tuqi sayt'asitamatxa, kunayman luratanakampi nayar qallkatatamat janiw p'inqaskxätati, nayaw uka jach'a jach'a tukuri jaqinakarux juma thiyat apaqxäma, ukatsti nayan qullan qulluxanxa, janiw mayampis jach'a jach'a tukxätati.

12Nayasti jumanak taypirux llamp'u chuymani, aski jaqinak jaytawayä, jupanakasti nayar iyawsas sarnaqirïpxaniwa.

13Israel markan jilt'iri jaqinakasti, jan wali luräwinakxa janiw lurkxapxaniti, k'arisiñsa apanukxapxaniwa, jupanakax sallqa arunaksa janiw parlkxapxaniti. Jupanakax jan kun axsarasaw manqt'asipxani, samart'apxarakini” sasa.

14¡Sión marka, q'uchunak q'uchum! ¡Israel marka, kusisiñ arunakamp q'uchum! ¡Jerusalén marka, taqi chuymampirak kusisim!

15Tatituw juchanakamat mutuyatäñxa apaqtam, uñisirinakamarus jaqunukurakiwa. Israel markan Reyipa Tatituw, juma taypinkaski; janiw kunat axsarañamas utjañapäkxiti.

16Khä urux Jerusalén markarux sapxaniwa: “Sión marka, jan axsaramti, janirak amparamas jan ch'amanjam tukurakpanti” sasa.

17Tatit Diosamaw juma taypinkaski; ¡jupax taqi ch'amapampiw jumarux qhispiyätam! Tatitusti jumar uñjasin kusisiniwa. Munasiñapampiw machaq jakañ churätam; kusisiñapan q'uchuni,

18phunchhäwi urunakanjam q'uchurakini. Tatitux siwa: “Nayaw jan walt'añanakamat qhispiyäma, uka jach'a p'inqamsa apaqarakïmawa.

19Khä urunakanxa, nayaw t'aqhisiyir jaqinakat arxatäma. Kayu p'akit ovejanakjamäpxsta ukasa qullt'apxämawa, saranukutanakarus kuttayanxarakïwa, t'aqhisitanakamsa, jan walt'atanakamsa askiruw tukuyarakï, ukhamat akapachan jach'ar aptatäpxañamataki.

20Khä urunxa, taqi jumanakar kuttayanxasinxa, mayarukiw tantacht'xapxäma; jaya markaru apanukutat uraqimar kuttayanxasinsti, askiruw tukuyapxarakïma, taqi markanak taypin jach'ar aptatäpxañamataki. Naya, Tatituw uk arsta.”

← Chapter 2 Jump to: