Malachi 2

Azerbaijan 2013

← Chapter 1 Jump to: Chapter 3 →

1«ائندی، ای کاهئنلر، بو امر سئزئن اوچوندور.»

2قوشونلار ربّی دیئر: «اگر سؤزه قولاق آسمایاسینیز، آدیما عئزّت ورمه‌یی اورَکدن ائستمیه‌سئنئز، اوستونوزه لعنت یاغدیریب خیئر-دوعالارینیزی لعنته چِوئره‌جیم. بلی، من اونلاری لعنتله‌‌مئشم، چونکی منی عئزّتلَندئرمه‌یی اورَکدن ائسته‌مئرسئنئز.

3من سئزئن نسلئنئزی محو اده‌جیم. بایراملارینیزدا قوربان اتدئیئنئز حیوانلارین تزه‌یئنی اوزونوزه چیرپاجاغام، سئز اونونلا بئرلئکده چؤله آتیلاجاقسینیز.

4او واخت بئله‌جکسئنئز کی، من بو امری لاوی ائله باغلادیغیم عهدئمئن یاشاماسی اوچون سئزه گؤندَ‌رمئشم.» قوشونلار ربّی دیئر.

5«اونونلا باغلادیغیم عهد حیات و صولح عهدی ائدی، و من اونا وردئم؛ بو حؤرمت طلب اتدی و او، منه حؤرمت گؤرستدی، منئم آدیمین هیبتی اونو بورودو.

6اونون آغزیندا حقئقی تعلئم وار ائدی و دئلئنده حئیله تاپیلمادی. او، صولح و صداقت ائچئنده منئمله بئرلئکده قدم آتیردی. چوخونو دا خاطا یولوندان قایتارمیشدی.

7کاهئنئن آغزی بئلئیی قورومالی، ائنسانلار اونون دئلئنده تعلئم آختارمالی‌دیر. چونکی او، قوشونلار ربّئنئن سؤز آپارانی‌دیر.

8آنجاق سئز یولدان آزدینیز و تعلئمئنئزله چوخ آدامی گوناها چکدئنئز. لاوی ائله باغلادیغیم عهدی پوزدونوز.» قوشونلار ربّی دیئر.

9«سئز منئم یوللاریملا گتمه‌دئنئز، شرئعته باغلی اولان مَسَله‌لرده طرفدارلیق اتدئنئز. بونا گؤره ده من بوتون خالقین قاباغیندا سئزی آلچالدیب خجالتلی حالا سالدیم.»

10هامیمیزین آتاسی مگر بئر دیئل؟ بئزی هَمَن تاری مگر یاراتمادی؟ اگر اِله‌دئر، نه اوچون بئز آتالاریمیزین باغلادیغی عهدی پوزاراق، اؤز قونشوموزا خیانت ادئرئک؟

11یهودا خالقی خیانت اتدی. ائسرایئلده و اورشلئمده ائیرنج ائشلر ادئلدی: یهودالی‌لار یاد آللاهلارین یانینا گِدن قیزلارلا اِوله‌نئب، ربّئن سِودئیی موقدّس مکانی نجئس اتدئلر.

12بونو ادن آدام، حتّا کشئک چکسه ده، جاوابده اولسا دا، قوشونلار ربّئنه قوربان گتئرسه ده، قوی رب اونو یعقوبون جاماعاتیندان قووسون.

13سئز باشقا بئر شیی ده ادئرسئنئز: آغلاییب سیزلاماقلا ربّئن قوربانگاهینی گؤز یاشلاری ائله دولدورورسونوز. چونکی رب آرتیق گتئردئیئنئز قوربانلارا دئقّت اتمئر، اونلاری سئزدن کؤنول خوشلوغو ائله قبول اتمئر.

14سئز «نه اوچون؟» دیئب سوروشورسونوز. چونکی رب سنئنله جاوانلیغیندا اِولَندئیئن آروادین آراسیندا شاهئددئر. او آرواد سنئن شرئکئن اولدوغو حالدا، نئکاح عهدی ائله آروادین اولدوغو حالدا اونا خیانت ادئبسن.

15تاری مگر اونلاری بئر اولاراق یاراتمادی؟ هم بدن هم ده روح اونوندور. بس نه اوچون بئر؟ چونکی او اؤزو اوچون ائلاهی بئر نسئل ائسته‌یئردی. بونا گؤره ده اؤزونوزو گؤزله‌یئن. قوی هچ کس جاوانلیغیندا اِولَندئیی آروادینا خیانت اتمه‌سئن.

16ائسرایئلئن تاریسی رب بله دیئر: «من بوشانمادان، قدّارلیغا بورونَن آدامدان دا نئفرت ادئرم. بونا گؤره ده اؤزونوزو گؤزله‌یئن و خیانت اتمه‌یئن.» قوشونلار ربّی دیئر.

17ددئکلرئنئزله ربّی یوردونوز. «اونو نه ائله یوردوق؟» دیئب سوروشورسونوز. «پئسلئک ادن هر کس ربّئن گؤزونده یاخشی‌دیر و رب اونلاردان راضی‌دیر.» و یا «هارادادیر عدالتئن تاریسی؟» دئیه‌رک اونو یوردونوز.

← Chapter 1 Jump to: Chapter 3 →