Isaiah 64

Balinese

1Napi awinan Palungguh IRatu nenten nyibak akasane raris tedun? Gunung-gununge pacang pada magejeran riantuk ajerihipune ngeton Palungguh IRatu.

2Ipun pacang ngetor sakadi toyane maluab kapumpunin antuk geni. Duaning punika sinahangja kawisesan Palungguh IRatune ring parameseh druene, tur dadosangja parabangsane ngetor ring ajeng Palungguh IRatune.

3Sampun dauhipun Palungguh IRatu rauh ngardi paindikan sane kalintang ngresresin sane nenten ajap-ajap titiang. Gunung-gununge jaga magejeran riantuk ipun ngeton Palungguh IRatu.

4Nenten wenten anak sane naenin ngeton wiadin miragi Widi sane sakadi Palungguh IRatu, sane ledang ngardi paindikan kadi asapunika pabuat anake sane ngajap-ajap ring Ida.

5Palungguh IRatu ledang nampi anake sane saking liang ngardi paindikan sane patut, inggih punika anake sane eling ngamargiang paindikan sane arsayang Palungguh IRatu. Palungguh IRatu sampun duka ring titiang, nanging titiang tan mari ngardi dosa. Yadiastu Palungguh IRatu kalintang duka ring titiang, titiang sampun tansah ngardi iwang ngawit saking riin.

6Yadiastu pakardin titiange sane pinih becik punika taler sampun keni weci. Riantuk dosan titiange, titiang waluya kadi daune sane layu sane kampehang antuk angin.

7Nenten wenten anak sane mabalik ka ajeng Palungguh IRatu ring pangastawannyane, tur nenten wenten anak sane rauh tangkil ring ajeng Palungguh IRatu buat nunas pitulungan. Palungguh IRatu sampun nyingidang ragan Palungguh IRatune saking titiang, tur sampun ngutang titiang riantuk dosan titiange.

8Nanging Palungguh IRatu dados Ajin titiange, duh Ratu Sang Hyang Widi Wasa. Titiang puniki waluya tanah legit, tur Palungguh IRatu satmaka dados tukang payuk. Palungguh IRatu sane ngardi titiang.

9Duaning punika, sampunangja kalintang duka ring titiang, wiadin ngetang dosan titiange salawas-lawasnya. Titiang kaulan Palungguh IRatune, suecaninja titiang.

10Kota-kotan Palungguh IRatune sane suci sampun sakadi tegal melakang, kota Yerusaleme sampun kabanggayang uug,

11tur Perhyangan Agung titiange, genah sane suci tur luih sane dados genah leluur titiange muji-muji Palungguh IRatu, sampun kasirnayang antuk geni. Genah-genahe sane tresnain titiang makasami uug.

12Duh Ratu Sang Hyang Widi Wasa, punapike Palungguh IRatu jaga meneng kewanten ngeniang indike punika makasami? Punapike Palungguh IRatu pacang manggayang titiang nandang kasangsaran langkungan ring sane prasida antuk titiang naanang?

← Chapter 63 Chapter 65 →