Hosea 6

Belarusian Bokun

← Chapter 5 Jump to: Chapter 7 →

1«Хадзем і вернемся да ГОСПАДА, бо Ён разьдзёр, і Ён нас аздаровіць, Ён ударыў, і Ён перавяжа [раны] нашыя.

2Ажывіць нас праз два дні, і на трэці дзень падніме нас, і мы будзем жыць перад абліччам Ягоным.

3І мы пазнаем, і будзем імкнуцца пазнаць ГОСПАДА. Як [прыход] раніцы падрыхтаваны выхад Ягоны, і Ён прыйдзе да нас як дождж, як раньні дождж і як позьні дождж на зямлю».

4Што Мне зрабіць табе, Эфраіме? Што Мне зрабіць табе, Юда? Міласэрнасьць вашая як воблака ранішняе, як раса, што рана зьнікае.

5Дзеля гэтага Я абчэсваў іх праз прарокаў, забіваў іх словамі вуснаў Маіх. І суды Мае як сьвятло выходзяць.

6Бо міласэрнасьці хачу, а не ахвяры, і пазнаньня Бога больш, чым цэласпаленьняў.

7Але яны, як Адам, парушылі запавет, там яны здрадзілі Мне.

8Гілеад — горад тых, якія робяць злачынствы, заплямлены крывёю.

9Як разбойнікі цікуюць на чалавека, так хеўра сьвятароў забіваюць злачынна на шляху ў Сыхем, бо падступнае робяць.

10У доме Ізраіля Я бачыў брыдоту з брыдотаў, там распуста Эфраіма, зганьбаваны Ізраіль.

11Таксама для цябе, Юда, прызначана жніво, калі Я вярну палон народу Майго.

← Chapter 5 Jump to: Chapter 7 →