Micah 2

Belarusian Bokun

← Chapter 1 Jump to: Chapter 3 →

1Гора тым, якія прыдумляюць беззаконьне і абдумваюць ліхоцьце на ложках сваіх, а ў сьвятле раніцы выконваюць гэта, бо гэта ў моцы рук іхніх.

2І зажадаюць яны палёў, і забіраюць іх, і дамоў — і бяруць [іх]; яны прыгнятаюць гаспадара і дом ягоны, чалавека і спадчыну ягоную.

3Дзеля гэтага гэтак кажа ГОСПАД: «Вось, Я задумляю на гэтае племя ліха, ад якога вы ня ўхіліце шыяў вашых і ня будзеце хадзіць ганарліва, бо гэта час ліхі».

4У той дзень складуць прыповесьць пра вас, і будуць галасіць галашэньнем, і скажуць: “Зьнішчэньнем мы зьнішчаны. Частка народу Майго зьмянілася. Навошта забраная яна ад мяне! Забраўшы, Ты падзяліў палі нашыя”.

5Дзеля гэтага ня будзе ў цябе таго, хто мераў бы шнуром паводле жэрабя ў царкве ГОСПАДА.

6“Не прапаведуйце”, а яны прапаведуюць: “Не прапаведуйце нам, і аддаліцца ганьба”.

7Ты, які завешся домам Якуба, няўжо скараціўся Дух ГОСПАДА? Няўжо такія ўчынкі Ягоныя? Ці ж ня словы Мае робяць дабро таму, што ходзіць у правасьці?

8Але ўчора народ Мой паўстаў як вораг. Вы забіраеце вопратку ў тых, якія праходзяць [каля вас] бясьпечна, якія не імкнуцца ваяваць.

9Жанчынаў люду Майго вы выганяеце з утульных дамоў іхніх, у дзяцей іхніх забіраеце велічнасьць Маю на вякі.

10Устаньце і ідзіце, бо няма [тут] супачынку, гэта [месца] нячыстае, яно – загуба для [вас], загуба страшэнная.

11Калі б чалавек, які ходзіць за ветрам і хлусьнёю падманвае, [сказаў]: “Я буду прапаведваць пра віно і сікеру”, ён стаў бы прапаведнікам для народу гэтага.

12Я зьбіраньнем зьбяру ўсяго цябе, Якубе, зграмаджэньнем зграмаджу рэшту Ізраіля, пастаўлю іх разам, як авечак у Боцры, як чараду пасярод пашы ейнай, і будзе гоман ад [мноства] людзей.

13Узыйдзе Той, Які зломіць [першкоды] перад абліччам іхнім; яны праломяць і пойдуць праз браму, і ўвойдуць праз яе, і валадар іхні — перад абліччам іх, і ГОСПАД на чале іх.

← Chapter 1 Jump to: Chapter 3 →