1 Peter 2

Bemba

← Chapter 1 Jump to: Chapter 3 →

1Kanshi mutaluke ku fibi fyonse, ku bufi bonse, kuli bumfundabuteshi, ku mufimbila na kukubepeshanya.

2Mube kwati tunya tufyelwe nomba, mulefwaishafye ukonka ibele lyeka lyeka ilyakulisha imipashi yenu. Epakuti mukonka ilyo ibele mumone ukukula bwino mukupusuka.

3Pantu imwe mwaliyumfwila ifyo Imfumu yawama.

4Iseni ku Mfumu, ilibwe ilyumi, ilyo abantu basuulile abati lyafyefye, lelo Lesa elyo asala ukuba ilikankala.

5Imwe mube nga mabwe ayomi ayakuti Lesa abomfya pakukuula iŋanda yakwe. Muli iyi ŋanda yakwe emo imwe ku maka yakwa Yesu Kristu mwakulabombela Lesa nga bashimapepo bamushilo, pakulamulekela amalambo ya mapepo ya mitima yenu ayakusansamusha Lesa.

6Pantu ifyalembwa mu Malembo Yamushilo fitila, “Moneni ndebika ilibwe mu Sioni, ilibwe lya petungi ilyo nasala kabili ilyacindamisha. Elyo no muntu onse uwamucetekela, takatale ekatwa ne nsoni.”

7Kuli imwe mwe basumina, ili libwe lyacindamisha. Lelo ku bashasumina bena, “Ilibwe ilyo bakakuula basuulile, lyaisa ba e libwe lyakwikasha petungi.”

8Pambi napo catila, “Libwe ilyakulenga abantu ukuipununa, e libwe ilyakulenga abantu ukuwa.” Balaipununa pantu tabanakile mashiwi yakwa Lesa. Kwena nico efyo Lesa abateyanishishe.

9Lelo imwe muli mukowa Lesa asala, bashimapepo ba Mfumu, umushobo uwamushilo, abantu bakwa Lesa bene bene. Fyonse ifi ni pakuti muleba abakubila ku bantu ifintu ifyakupapa ifyo Lesa acita mukumwita ukufuma mu mfifi no kumuleta mu lubuuto lwakwe ulwakupapa.

10Kale tamwali bantu bakwa Lesa, lelo nomba muli bantu bakwe. Kale tamwapokelele luse lwakwa Lesa, lelo nomba mwalipokelela uluse lwakwe.

11Mwe batemwikwa bandi, apo mwaba abeni kabili abalendo muli cino calo, ndemupapata ukuti mwilakonkelela ulunkumbwa lubi ululwisha imyeo yenu.

12Ilyo muleikala na bantu abashaishiba Lesa, muleba ne mibeele isuma. Lyena epakuti nelyo balemubepesha ukucita ifibi, lelo bakese lumbanya Lesa pa Bushiku Imfumu ikabwela ico balemona ifisuma mucita.

13Pa mulandu wa Mfumu mulenakila ubuteko bonse ubwa bantu. Mulenakila kateeka mukalamba, pantu e mukalamba pali bonse.

14Mulenakila na balashi, pantu ebo kateeka mukalamba apeela amaka yakukanda abalelufyanya no kutasha abo abalecita ifisuma.

15Pantu Lesa afwaya ukuti, imwe ku ficitwa fyenu ifisuma, muputule umulomo wakusabaila kwa fipumbu fya bantu.

16Mu mikalile yenu mube abantungwa. Nomba mwilabomfya buntungwa bwenu ukuba akabepesho kakucitilako ifibi. Lelo mu mikalile yenu mube nga abasha bakwa Lesa.

17Mulecindika umuntu onse, muletemwa na babwananyina. Muleba na katiina kuli Lesa, mulecindika na kateeka mukalamba.

18Mwe babomfi mulebeela no kucindika bashikulwinwe. Mwilacita ifyo kuli abo aba luse no mutembo, lelo na ku bakali bene.

19Pantu nga mwaba no mutima wakucita ubufwayo bwakwa Lesa, ilyo muleshipikisha mu macushi ayakumufyengeleshafye, ninshi Lesa akamupaala.

20Lelo nga muleshipikisha impumo bamupuma ico mulufyenye, cinshi mwingamwenapo? Lelo nga muleshipikisha mu macushi ilyo mucitile icilungeme, ninshi lyena Lesa akamupaalilapo.

21Ala ni kuli ifi fine eko Lesa amwitilako. Pantu Kristu umwine alimuculile, amushilile ne cilangililo pakuti na imwe mulemupashanya.

22Kristu ena tabifishe, kabili tatalile alanda fyabufi.

23Kristu ilyo balemutuka, wena tabatukilemo. Kristu tapangile abalemucusha ilyo alecula, lelo alesubilafye muli Lesa Kapingula wamulinganya.

24Kristu umwine asendele ifyabubifi fyesu mu mubili wakwe pa musalaba, epakuti na ifwe tutaluke umupwilapo ku bubifi, tuleikala abakaele pa cinso cakwa Lesa. “Filonda fyakwe efyamundapa.”

25Pantu kale mwali kwati ni mpaanga ishaleendafye icende ende, lelo nomba mwalibwelulukila kuli Kacema, kabili Kangalila wa myeo yenu.

← Chapter 1 Jump to: Chapter 3 →