1 Peter 3

Bemba

← Chapter 2 Jump to: Chapter 4 →

1Mu musango umo wine abakashi balenakila abalume. Epakuti nga pali bamo abashanakila amashiwi yakwa Lesa, imyendele yenu iyisuma ibanashe ukwabula ukusosa nangu ishiwi nelyo limo.

2Pantu balemona ifyo imyendele yenu yakaele, kabili iyamucinshi.

3Lekeni ukuyemba kwenu kwiba ku fyakuisamika ifili ngo musango mulelukilamo imishishi, nangu ukulafwala ifisamo ifya golide nangu insalu ishaciyembelo.

4Lelo ukuyemba kwenu kuli nokuba mu mitima yenu. Muleba nokuyemba ukushonaika, ukwamutembo no mutima uwaikala tondolo. Ala ici e cintu cikankala pa cinso cakwa Lesa.

5Ifi efyo abanakashi aba pakale abamushilo baleisamika. Balesubila muli Lesa, kabili balenakila na balume babo.

6Efyo Sara alecita, alenakila Abrahamu, alemwita nokuti, “We mfumu.” Na imwe ninshi muli bana bakwa Sara nga mulecita ifisuma, tamukwete na mwenso wakutiina nelyo cimo.

7E cimo cine na imwe mwe balume, mu mikalile yenu mube na mano yasuma pa bakashi benu. Nangu abanakashi bantu abashakosa, mulebacindika, pantu pamo pene na imwe, nabo bene bapokelelako ubupe bwakwa Lesa ubwamweo wape. Ifi efyo mulecita, pakuti kwilaba nelyo cimo icakufulunganya amapepo yenu.

8Pakulekelesha ndeti, bonse muleba no mutima umo. Muleumfwilana uluse, mube ne citemwiko cabwananyina, mube ne cilela kabili muleicefya.

9Mwilalandula pa bubi bamucitila nangu ukulasaushanya, lelo mulebalombela ipaalo lyakwa Lesa. Ici eco Lesa amwitako pakuti na imwe mukapyaneko ipaalo lyakwe.

10Pantu calemba ukuti, “Umuntu uufwaya insansa mu bumi bwakwe no kukwata inshiku ishisuma, ali nokusunga ululimi lwakwe ukufuma ku bubifi, ne milomo yakwe kukubepa ubufi.

11Ali nokuleka ukucita ifyabipa, alecita ne fisuma. Ali nokufwaisha ukwikala mu mutende, no kucita efyo alecita.

12Pantu amenso ya Mfumu yaba pa bololoke, kabili amatwi yakwe yalakutika ku mapepo yabo. Lelo abacita ifyabipa, icinso ca Mfumu cilabafulilwa.”

13Nomba nga mwalicincila mukucita ifisuma, nga nani engamucita icakumubipila?

14Lelo nangu cakuti mulecula ico mulecita ifyo Lesa afwaya, ninshi mwalishuka. Mwilatiina abantu, nangu ukusakamikwa iyoo.

15Mulecindika Kristu no kumucita Imfumu ya bumi bwenu. Lyonse muleba abaiteyanya ukwasuka umuntu onse uwamwipusha ukumulondolwela pesubilo ilyo mwakwata. Muleyasuka uyo muntu mucinshi mucinshi no mutembo.

16Muleenda na kampingu wa mitima yenu umusuma, ukwabula akakumusakamika. Epakuti ilyo bamusaalula, abo bantu balelanda ifibi pa myendele yenu iya bwina Kristu, baleikatwa ne nsoni.

17Pantu cawamapo ukucula pakucita ifisuma, nga efyo Lesa alefwaya, ukucila ukuculila pakucita ifibi.

18Kristu afwile umuku umo pa fyabubifi, calipwa. Umuntu uwakaele afwilile abashaba abakaele pakuti atutwale kuli Lesa. Muli bumuntu balimwipeye, lelo mu mupashi wena ali uwamweo.

19Elyo ngo mupashi aile kukushimikila imipashi iyali mu cifungo.

20Iyi e mipashi ya bantu abo bakeene ukunakila Lesa mu nshiku shilya Noa alepanga icibwato, lelo Lesa wena alebapembela nateka umutima. Bantufye abanono abali mu cibwato ebapuswike ku menshi, bali cine konse konse.

21Ici cena cilangililo ca lubatisho ulumupususha imwe nomba. Ulu lubatisho talusamba ifiko ifya mubili iyoo, lelo cilayo umuntu alaya kuli Lesa muli kampingu musuma wa mutima wakwe. Lubatisho elutupususha ku maka yakushukuka kwakwa Yesu Kristu.

22Uyu Yesu alinina ku mulu, aikala lubali lwa ku kulyo kwakwa Lesa. Elyo alateeka bamalaika, bakateeka na bamaka aba mu mulu.

← Chapter 2 Jump to: Chapter 4 →