2 Kings 20

Bemba

← Chapter 19 Jump to: Chapter 21 →

1Mu nshiku shine shilya, Hesekia alwala ubulwele ubwafwaile ukumwipaya. Kasesema Esaya mwana Amosi aya kuli ena amweba ati, “Ifi efyo Yawe alanda ati, ‘Ubangililile uipekanye bwino pantu ulefwa, tauli nakupola.’”

2Hesekia nao epakupilibukila ku cibumba, alapapata kuli Yawe ati,

3“Nakulomba we Yawe, ibukisha ifyo nyenda pa cinso cobe mu cishinka na mu bololoke bwa mutima no kucita ifyawama pa cinso cobe.” Elyo kabili Hesekia alalila nganshi, tepakulila mwe.

4Lintu Esaya talati afume mu lubansa lwa mukati, ishiwi lyakwa Yawe lyaisa kuli ena aliti,

5“Bwelela kuli Hesekia intungulushi ya bantu bandi, no kuya mweba ukuti Yawe aletila ati, ‘Ine ne Yawe Lesa wa cikolwe cobe Davidi, niŋumfwa ukupapata kobe, kabili nimona ne filamba fyobe. Cisuma, ine nalakuposha. Pa bushiku bwalenga shitatu ukutula nomba, uli nokuya na ku ŋanda yakwa Yawe.

6Nalalunda imyaka ikumi limo na isano (15) ku bumi bobe. Kabili ine nkalakupokololako, no kupokololako uno musumba, ku kuboko kwa mfumu ya calo ca Asiria. Nkacingilila na uno wine umusumba pa mulandu wandi na pa mulandu wa cilayo ico ine nalaile umubomfi wandi Davidi.’”

7Elyo Esaya asosa ati, “Pekanya icimamantwa ca makunyu.” Nabo bacita ifyo fine elyo bashinga pa cipute nao apola.

8Hesekia alitalile aipusha Esaya ati, “Bushe ni cinshi icakwishibilako ukuti Yawe alemposha kabili ndi nokukwata amaka yakwenda no kuya ku ŋanda yakwa Yawe pa bushiku bwalenga shitatu ukufuma nomba?”

9Esaya ayasuka ati, “Ici e cishibilo cakwa Yawe kuli iwe icakuti Yawe ali nokufikilisha ifyo alaya ukuti, ‘Bushe cintu cayanguka icinshingwa ukulola kuntanshi intampulo ikumi, nangu ukushalila kunuma intampulo ikumi?’”

10Hesekia asosa ati, “Cintu icayanguka icinshingwa ukulola kuntanshi intampulo ikumi, nomba leka cilole kunuma intampulo ikumi.”

11Elyo kasesema Esaya apepa kuli Yawe. Elyo nao Yawe alenga icinshingwa ukulola kunuma intampulo ikumi umusango cacitikilemo pa matabo yakwa Ahasi.

12Pali ilya nshita Merodaki Baladani umwana mwaume wakwa Baladani imfumu ya ku Babiloni yatumine Hesekia amakalata elyo ne cabupe, pantu alyumfwile ukulwala kwakwe.

13Hesekia ilyo apokelela ishi nkombe, ashilangilila fyonse ifyali mu matala yakwe, silifa, golide ne fyanunka ubusuka, amafuta ayasuma, iŋanda ya fyanso fyakwe elyo na fyonse ifyali mu ŋanda yakutulilamo ifyuma. Mwisano lyakwe na mu calo cakwe conse tamwashele nelyo kamo ako Hesekia ashalangile inkombe.

14Elyo Esaya kasesema aya ku mfumu Hesekia no kumwipusha ati, “Ni finshi balya bantu bacisosa, kabili ni kwisa bafumine?” Hesekia ayasuka ati, “Bafumine ukutali ku calo ca ku Babiloni.”

15Kasesema aipusha ati, “Ni finshi bacimona mu ŋanda yobe iya mwisano?” Hesekia ayasuka ati, “Nabamona fyonse ifya mwisano lyandi. Tapashele nangu cimo pa cuma natutila mu matala ico nshibalangile.”

16Elyo Esaya aeba Hesekia ati, “Umfwa ishiwi lyakwa Yawe.

17Inshita ileisa ilyo ifintu fyonse mu ŋanda yobe iye sano, na fyonse ifyo ifikolwe fyenu fyatutile ukushinta ilelo fili nokusendwa ku Babiloni. Ala takwakashale nangu kamo, efyasosa Yawe.

18Kabili na pa ba mu lupwa lobe, aba mubili no mulopa obe, abo waifyalila we mwine, bakasendapo bamo no kuya bacita bamutungwi abakubombela imfumu ya ku Babiloni kwisano lyaiko.”

19Hesekia ayasuka ati, “Ishiwi lyakwa Yawe ilyo walanda lisuma.” Pantu atontonkenye ati, “Bushe emukuti takwakatale akuba umutende no kucingililwa mu nshita ya bumi bwandi?”

20Lelo palwa fintu fimbi ifya pa bufumu bwakwa Hesekia, fyonse ifyo abombele, kabili ifyo apangile icishiba nefyo aimbile umufolo wakuleta amenshi mu musumba, bushe tafyalembwa mu citabo ca milandu ya shamfumu sha bena Yuda?

21Hesekia ilyo afwile aile lala ukwalala ifikolwe fyakwe. Elyo Manase umwana wakwe amupyana pa bufumu.

← Chapter 19 Jump to: Chapter 21 →