2 Kings 25

Bemba

← Chapter 24 Jump to:

1Kanshi mu mwaka walenga pabula uwa pa bufumu bwakwa Sedekia, pa bushiku bwalenga ikumi mu mweshi walenga ikumi, Nebukadinesa imfumu ya ku Babiloni yaima mukuya lwisha Yerusalemu ne fita fyakwe fyonse. Akuula inkambi kunse ya musumba elyo ashingulusha imina ya maloba na fimbi fyakubomfya pakwikata umusumba.

2Ifita fyashingulwike umusumba ukufika pa mwaka we kumi limo na umo (11) uwa pa bufumu bwakwa Sedekia.

3Pa bushiku bwalenga pabula mu mweshi walenga bune, insala mu musumba yakulisha icakuti abantu balafilwa no kumona icakulya.

4Amalinga ya ku musumba epakulabongololwa. Pakumona ifi, imfumu Sedekia na bashilika bonse aba mu musumba bena bafulumuka ubushiku, ninshi na bena Kaludea nabashinguluka umusumba. Bakonka inshila iyalola kwibala lya mfumu, bapitila pa mpongolo iyaba pakati ka fibumba fibili, balola na ku Araba.

5Nomba ifita fya bena Kaludea fyakunkunika imfumu Sedekia, mpaka fyamwikatila mu mawanga ya Yeriko, na bashilika bakwe bonse ninshi baya basalangana ukufuma kuli ena.

6Fyati fikate imfumu, awe fyaitwala na kuli Nebukadinesa imfumu ya ku Babiloni ilyo ninshi wena ali ku mushi wa Ribula, uko kwine eko na Nebukadinesa aputwila Sedekia umulandu.

7Baipaya abana abaume bakwa Sedekia pa cinso cakwe. Elyo ena bamutonkola amenso, bamukaka mu minyololo ya mukuba elyo bamusenda ku Babiloni.

8Pa bushiku bwalenga cine lubali mu mweshi walenga isano, mu mwaka walenga ikumi limo na pabula (19) apo Nebukadinesa atampile ukuteeka ubufumu mu Babiloni, elintu Nebusaradani aingile mu musumba wa Yerusalemu. Uyu Nebusaradani ali ni shicilye wa mfumu, kabili ewali mushika mukalamba uwa bakalinda ba mfumu.

9Kanshi Nebusaradani epakoca iŋanda yakwa Yawe, aoca na mayanda ya kwisano, aocela kumo na mayanda yonse ayacindami ya mu Yerusalemu.

10Ifita fyonse ifya bena Kaludea ifyali no mukalamba wa bakalinda ba mfumu batobaula na malinga ayashingulwike umusumba wa Yerusalemu.

11Nebusaradani umukalamba wa bakalinda wa mfumu asenda muli bunkole abantu bonse abashele mu musumba, pamo pene na bantu abafyukile ku mfumu ya ku Babiloni. Asendela kumo na bantu abacenjela ku fyakutukuta tukuta.

12Lelo uyu mukalamba wa bakalinda ashako abekalacalo bamo abalanda nganshi abakuti balesunga imyangashi elyo no kulalima amabala.

13Abena Kaludea batobaula inceshi sha mukuba, ne fyakuteekapo ifyashinguluka elyo ne cakusambilamo ca mukuba ifyali mu ŋanda yakwa Yawe, basenda no mukuba ku Babiloni.

14Kabili basenda imipika, bafosholo, ifyakukushilamo imito, ifyakushimishako nangu ukukushishako ulubuuto, imbale elyo na fyonse ifipe fya mukuba ifyo balebomfya mu ŋanda yakwa Yawe.

15Umukalamba wa bakalinda wa mfumu asendafye fyonse ifyapangilwe na golide na silifa, emukuti ne fifukilisho ne mbale umwalesumina umulopa we lambo.

16Asenda umukuba wa ku nceshi shibili, icakusambilamo, ne fyakutekapo ifyashinguluka ifyo Solomoni apangile ifya mu ŋanda yakwa Yawe, fyena fyalicililemo ukufina kanshi balifililwe no kufipima.

17Cila luceshi lwalepele lumo lumo amakubiti ikumi limo na cine konse konse (18). Umutwe wa mukuba umo uwali pa mulu wa luceshi wali amakubiti yatatu ukulola mumulu, elyo ukushinguluka cila luceshi balengeleko amaluba ayasuma ayapala amateke aya mukuba. Uluceshi lwacibili nalo lwine lwali ulwapalana ku lubiye.

18Kabili Nebusaradani umukalamba wa bakalinda asenda Seraya shimapepo mukalamba, Sefania shimapepo wamukonkelepo na bakalinda wa pa mwinshi wa ŋanda yakwa Yawe batatu ukuba abafungwa.

19Ku bashelepo mu musumba, asenda uwaletungulula ifita elyo na bampandamano basano aba kwisano. Asenda na kalemba uwali cilolo mukalamba wa bashilika ba nkondo uwalesunga imilandu ya bulwi elyo na bambi abaume amakumi mutanda (60) abasangilwe mu musumba.

20Awe Nebusaradani umukalamba wa bakalinda abatwala bonse ku mfumu ya ku Babiloni, iyali mu mushi wa Ribula.

21Kulya kwine ku Ribula, mu calo ca ku Hamati, eko imfumu yabepaila. Kanshi efyo abena Yuda baile muli bunkole, ukutali ne calo cabo.

22Nebukadinesa imfumu ya ku Babiloni yasonta Gedalia umwana wakwa Ahikamu, mwana Shafyani ukuba umulashi wa bantu bashele mu Yuda abo bashasendeleko muli bunkole ku Babiloni.

23Ilyo bacilolo wa fita pamo na bantu babo baumfwa ukuti imfumu ya ku Babiloni naisonta Gedalia ukuba umulashi, baima baisa kuli Gedalia ku Misipa. Abaishile bali ni Ishimaeli mwana Netaniya, Yohanani mwana Karea, Seraya mwana Tanihumeti umwina Netofa, Yasaniya umwana wa mwina Makati elyo na bantu babo bonse.

24Gedalia alapa umulapo wakubalaya, bena pamo na bantu babo. Abeba nokuti, “Mwitiina bacilolo ba bena Kaludea, lelo iseni mwikale muno calo. Mulebombela imfumu ya ku Babiloni, ninshi na fyonse fili nokubafye bwino kuli imwe.”

25Nomba mu mweshi walenga cine lubali, Ishimaeli umwana wakwa Netaniya, mwana Elishama uwali uwa ku bufumu aisa na bantu ikumi limo no kwisa ipaya Gedalia na baume abena Yuda elyo na bena Kaludea abali nankwe ku Misipa.

26Pali iyi nshita, abantu bonse ukufuma pa wacepesha ukufika na ku wacindamisha pamo pene na bacilolo wa bashilika babutukila ku Egupto pa mulandu wakutiina abena Kaludea.

27Mu mwaka walenga amakumi yatatu na cine lubali (37) apo basendele Yehoiyakini imfumu ya bena Yuda muli bunkole, pa bushiku bwalenga amakumi yabili na cine lubali (27) mu mweshi we kumi limo na ibili (12), emo imfumu Efili Merodaki atendeke ukuteeka pa bufumu bwa bena Babiloni. Abelela Yehoiyakini uluse, amufumya na mu cifungo.

28Efili Melodaki alemutentemba, alimupeele ne cipuna icacindamisha pa fipuna fya shamfumu shimbi shonse ishali pamo na Yehoiyakini muli bunkole mu Babiloni.

29Kanshi Yehoiyakini epakufula ifyakufwala fya mu cifungo, elyo na mu nshiku shonse isha bumi bwakwe lyonse alalya kwisano lya mfumu.

30Kabili imfumu Efili Melodaki yalemupeela ifintu fyonse ifyo alekabila cila bushiku pa nshiku shonse ishashele ku bumi bwakwe.

← Chapter 24 Jump to: