bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Bhilali
/
Bhilali (भगवानेन छाचला बुल)
/
John 5
John 5
Bhilali (भगवानेन छाचला बुल)
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 6 →
1
अळतेन यहुदी माणसेन एक तीहवार आयु, ने ईसु यरुसलेम सहर अळी गुयु।
2
यरुसलेम सहरेम गाडरान फाटक धड़े एक कुंडान तसों हतलो, तीनाक ईब्रानी माणसेन बुली मां बेतसेदा कह्वे; ने हीना कुंडान चारे मेर पांच मांडवा हतला।
3
चां बेसका मांदवाड़ वाळा, आंदळा, लंगड़ा, ने पांगळा पाणी झलकायणेन वाट देखीन पड़ी रवतेला,
4
काहाकी ठहरावली टेम पर भगवानेन सरग वाळु काहवाळ्यु कुंडा मां उतरीन पाणीक गचळावतेला। पाणी हवतेत जु काहनुक पेहेल उतरे चे मांदवाड़ वाळा वारु हय जाय, चाहे तेरी काहनी बी मांदवाड़ हय।
5
तीना हळावेन चां एक माणुस हतलो, च दुय कम चालीस साल लग, चां मांदलु पड़ी रवलु।
6
ईसु तीनाक चां पड़ी रवलो देख्यु ने ज जाणीन की चु बेसका दाहड़ा सी असुत पड़ रवलु तेरेमां तीना मांदला काजे कह्यु, “तु वारु हवणे हींडे काय?”
7
च मांदलो ईसु काजे जपाप आप्यु, “ए मालीक, पाणी झलकाय्तात मेसेक हळाव मां उतारे असो कुय माणुस मारे पुठ्ये नी हय। ने मेसेक पुगणेन पेहलुत हळाव मां दीसरु मांदलो माणुस उतरी पड़े।”
8
ईसु तीनाक कह्यु, “उबु हय जां। ने तारी गुदड़ी हाकलीन चाल।”
9
च माणुस तत्यारुत वारु हय गुयो, ने तेरी गुदड़ी हाकलीन हींडणे बाजी गुयो चु दाहड़ु आरामेन दाहड़ु हतलु।
10
तेरेमां यहुदी माणसेन मुख्या तीना वारु हवला माणसेक कहंणे बाजी गुया, “आज आरामेन दाहड़ु छे। आज कायदान अनसारे तारे धड़े गुदड़ी हाकलनु वारु नी हय।”
11
चु वारु हवलु माणुस तीनुक कह्यु, जु मेसेक वारु करलु छे, चु मेसेक कहंलु छे, “उबु हय जां। ने तारी गुदड़ी हाकलीन जाती रव।”
12
चे तीनाक पुछ्या, चु कुण छे, चु तुसेक कह्यु की, “उबु हय जां ने तारी गुदड़ी हाकलीन जाती रव?”
13
बाकुन चु वारु हवलु, चु माणुस नी जाणतेलु की चु कुण छे, काहाकी चां जागा पर माणसेन गड़दी हवणे सी ईसु चां सी जाती रवलु।
14
अळतेन ईसु तीना वारु हवला माणुस काजे ईसु मंदीर मां भेळु हयु, ती ईसु तीनाक कह्यु, “देख तु वारु हय गुयलु छे, अळी पाप घुण करे। नीते कांखुर मायन तार पर एर सी बी अळी जादा गरा आय पड़से।”
15
चु माणुस जाय्न यहुदी माणसेक कह्यु की चु मेसेक वारु करलु चु ईसु छे।
16
ईसु आरामेन दाहड़े असो काम कर्यु, करीन यहुदी माणसे ईसु काजे दमणे बाजी गुया।
17
ईसु तीनु दमण्याक ज कह्यु, “मारु बास हय लगुन काम करने बाजी रयु ने मे बी काम करने बाजी रयु।”
18
ईनी वजे सी यहुदी ने अदुस तीनाक मार नाखणेन कुसीत करने लाग्या, काहाकी हयु आरामेन दाहड़े वाळा रीतीक अतरुत नी तुड़े, बाकुन भगवान काजे मारु बास कहीन आपसा काजे भगवान बराबर बी ठहरावतेलु।
19
ईसु तीनुक कह्यु, मे तुहुंक छाचलीन कहं भगवानेन पुर्यु आपसान मन सी काय बी नी कर सके, बाकुन चु आपसान भगवान बासेक करतेलु देखे; काहाकी ज-ज काम भगवान बास करे चत काम तेरु पुर्यु बी करे।
20
काहाकी भगवान बास ते पुर्या सी परम राखे ने ज-ज काम चु करे चो आखो तीनाक देखाड़े; ने चु हेरेसी बी मटा काम तीनाक देखाड़से ने चे काम देखीन तुहुं घाबराय जासु।
21
तुहुंक मालुम छे की भगवान मर्या सर्याक जीवता करीन बठा करे। तसुत पुर्या धड़े बी जीनुक गमे तीनुक नवलो जीवन आपणेन ने जीवता करीन बठा करनेन हक छे।
22
भगवान बास ते कुयन बी नीयाव नी करे, बाकुन माणसेन नीयाव करनेन आखो हक तेरा पुर्या काजे आप देदलु छे।
23
काहाकी आखा माणसे भगवान बासेन ईज्जत करे; तसान तसा आखा माणसे तेरा पुर्यान बी ईज्जत करनु चाहे। चु पुर्यान ईज्जत नी करे चु पुर्या काजे मकलन्या भगवान बासेन बी ईज्जत नी करे।
24
मे तुहुंक छाचलीन कहं, जु मारा बुले सामळीन मेसेक मकलन्या भगवान बास पर भुरसु करे तीनाक अमर जीवन जड़से ने नीयावेन दाहड़े तीनाक डंडेन हुकुम नी जड़े बाकुन चु मुत काजे छेकीन अमर जीवन हात कर लेदलु छे।
25
मे तुंद्रे सी छाचलीन कहं च टेम आवसे ने मरला माणसे भगवानेन पुर्यान बुल सामळसे ने जे सामळसे चे मर्या-सर्याम सी जीवता हय जासे।
26
काहाकी भगवान बास जीवनेन झीर छे, तसुत चु हेरा पुर्या काजे बी ज हक आपलु छे की तु बी जीवनेन झीर छे;
27
अतरोत नी बाकुन भगवानेन पुर्यु माणसेन पुर्यु बणीन आवलु छे, तेरेमां तीनाक माणसेन नीयाव करनेन बी हक आपलु छे।
28
मर्या-सर्याम सी जीवता हवणेन बारामां घुण घाबरायु काहाकी ची टेम आवणे बाजी रय, तीने टेमे जतरा बी मड़ायट्या मां गाड़ला छे चे आखा भगवानेन पुर्यान बुल सामळीन जीन्दा हय जासे ने मड़ायट्या मां सी नीकळीन आवसे।
29
जे भगवानेन नींगाम भलाय करला छे अमर जीवन वाटे मरलाम सी जीवता हय्न बठा हवसे, ने जे भगवानेन नींगा मां कुहराय करला छे, चे नीयावेन दाहड़े डंड भुकत्णे करीन मरलाम सी जीवता हय्न मड़ायट्याम सी नीकळसे।
30
मे मारी मरजी सी काय बी नी कर सको। तेरेत अनसारे नीयाव करो; ने मारु नीयाव छाचु छे काहाकी मे मारी मरजी सी नी बाकुन मे मकलने वाळा भगवानेन मरजी पुरी करो।
31
कदी मे मारा बारामां मे अतरुत गवा दम ती मारी गवाय छाचली नी हय।
32
एक अळी छे चु मारी गवाय देय ने मे जाणो की चु मारी गवाय देय ने तेरी गवाय छाचली छे।
33
तुहुं बपतीस्मान रीत आपण्या युहन्ना धड़े पुछणे करीन माणसे काजे मकल्या, ने तत्यार चु मारा बारामां छाचली गवाय देदु।
34
बाकुन मे मारा बारामां माणसेन गवाय नी चाहतु; जी वात तेरेमां कव की तुहुं पाप सी छुटकारु जड़े।
35
युहन्नु ते एक धपतेला दिवान तसलु हतलु, ने तुहुंक ईतरीक वार लग तीना दिवान वीजाळा मां खुस रहणु वारु लाग्यो।
36
बाकुन युहन्नु मारे बारामां जी गवा देदलु, तीनी गवाय सी मटी गवा मारे धड़े छे, काहाकी ज काम करने भगवान बास मेसेक मकेल्लु छे, चेत काम मे करने बाजी रयु ने चेत काम मारे बारामां जी गवा दी रया की मारु भगवान बास मेसेक मकेल्लु छे।
37
ने भगवान बास जु मेसेक मकेल्लु छे, चु मारी गवा देदलु छे। तुहुं कदी बी तेरो वचन नी सामळ्या ने तेरु सीकु नी देख्या।
38
ने हेरा बुल काजे मन मां बठाड़ीन नी राखे, काहाकी तीनाक हयु मकल्यु तेरे पर तुहुं भुरसु नी करु।
39
तुहुं चुखली-सास्तुर मां चाळवीन भन्ने हामु काजे अमर जीवन जड़से, असु वीच्यार करीन तुहुं चुखली-सास्तुर काजे चाळवीन भण्या बाकुन जीत चुखली-सास्तुर मारा बारामां असी गवा देदी आय रय की जु आवणेवाळु छे, हयुत अमर जीवन आपण्यु छे!
40
तेबी तुहुं जीवन हात करने करीन मारे धड़े आवणे नी हींडता।
41
मेसेक माणसे धड़े सी ईज्जत नी चाहती। मेसेक ईज्जत आपण्यु ते मारुत भगवान बास छे।
42
बाकुन मेसेक मालम छे की तुंद्रे माहें भगवानेन परम नी हय।
43
मे मारा भगवानेन नाव सी आवलु छे, तेबी तुहुं मेसेक मानीन मार पर भुरसु नी करता; कदी काहनुक दीसरु आपसान नावे आवे ती तुहुं तीनाक मानीन तेर पर भुरसु कर लेसु।
44
तुहुं ते आंबा-सांबा ईज्जत ने आव-भाव हात करने हींड रया, बाकुन तुहुंक एकुत भगवान सी ईज्जत ने आव-भाव जड़से ने तुहुं नी चाहता, ती तुहुं मारे पर कसा काय भुरसु करसु?
45
असा घुण समजु की मे भगवान अगळ तुहुं काजे गुनाळा ठहरावीस, तुंद्रे पर गुनु लागाड़ने वाळु ते मुसा छे, तेरे पर तुहुं भुरसु राख र्या।
46
काहाकी कदी तुहुं मुसा पर भुरसु करता ती मारु बी भुरसु करता काहाकी चु मारा बारामां लिखलु।
47
बाकुन कदी तुहुं मुसान लिखली वात पर लग भुरसु नी करु, ती मारी वात पर कसा भुरसु करसु?
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 6 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21