bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Bhilali
/
Bhilali (भगवानेन छाचला बुल)
/
John 6
John 6
Bhilali (भगवानेन छाचला बुल)
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 7 →
1
थुड़ाक दाहड़ा हय गुया ने अळतेन, गलील सी ईसु आपसा चेला भेळुत गलील डाबरान पली धड़ जाती र्यु। ईना गलील डाबरा काजे तीबीरीयासेन मटलो डाबरो बी कहें।
2
ईसु, बेसका मांदला माणसेक वारु करतेलु। ईसुन ईनु मटा कामेन सहलाणी देखीन माणसेन एक मटुत टुळु ईसु पछळ चाल पड़्यु।
3
तत्यार ईसु बयड़ा पर चहड़ीन हेरा चेला पुठ्ये चां बठ गुयु।
4
यहुदी माणसेन फसहन तीहवार सातेत आय रवलु।
5
जत्यार ईसु बेसकु मटु माणसेन टुळा काजे हेरे भीणी आवतेला देख्यु, ती फीलीप्पुस सी कह्यु, “हीनु आखा माणसे काजे रुटा खावाड़ने वाटे कां सी मुल लावसुन?”
6
ईसु जी वात फीलीप्पुस काजे पंतारने करीन कहंलु, काहाकी ईसु काजे जी वात मालुम हतली की चु काय करने वाळु छे।
7
फीलीप्पुस ईसु काजे कह्यु, “दुय सोव दाहड़ान दाहड़कीन रुप्यान रुटा लावसु ने, ईतराक-ईतराक वाटसु तेबी हींद्रे वाटे पुरती नी हवे।”
8
ईसुन चेला मायन सीमोन पतरसेन सगु भायस अन्दीरीयास ईसु काजे कह्यु,
9
“जां एक नानलु पुर्यु छे तेरे धड़े जळ-गहुंन पांच रुटा ने दुय माछा छे, बाकुन अतरा माणसे मां काय हवसे।”
10
ईसु जपाप आप्यु, “माणसेक पंगते बठाड़ देवु।” तीना जागा पर बेसकु वारु चारु हतलु; चां माणसे बठी गुया। ने चां अदमी पांचेक हजार हतला।
11
तत्यार ईसु रुटा हातेम लेदु, ने रुटा लीन भगवान काजे कह्यु, तु बेसकु वारु, ने चु बठी रवला माणसेम चे रुटा वाटाड़ देदु। ने माछा बी तसुत वाटाड़्यु।
12
जत्यार माणसे खायलीन आफरी गुया, ती ईसु हेरा चेला सी कह्यु, “बचला रुटान कुटका भेळा कर लेवु, थुड़ाक बी रद नी हवणु चाहे।”
13
अळतेन चेला खायलीन रवला जळ-गहुंन रुटान कुटका काजे भेळा कर्या ती बारे चार्या भराय गुया।
14
माणसे ईसुन मटला कामेन सहलाणी देखीन कय पड़्या, “छाचली, चु भगवानेन अघी सी आवणे वाळी वात बताड़न्या माणुस ईनी कळी मां आवणे वाळु हतलु।”
15
ईसु ज जाण लेदु की माणसे आवीन मेसेक जबरान मां राजु बणावणे हींडे तेरेमां पछेन बयड़ा पर एखेलुत जाती रयु।
16
जत्यार सांती वेळाय हय ती ईसुन चेला गलील दरीया धड़े गुया।
17
चे ढंड्या मां बठीन दरीयान पली धड़ कफरनहुम सहर भीणी जाणे बाजी गुया। आंदारो बेसको हय गुयलो ने ईसु चां लग तींद्रे धड़े पछु नी आयु।
18
आहळीन वजे सी दरीया मां झलक बी आवणे बाजी गुय।
19
जत्यार चे पांच छव कीलुमीटर अगा जाती रवला, ती चे ईसु काजे दरीया पर ढंड्या भीणी चालीन आवतेलु देख्या ने चे बीही गुया।
20
बाकुन ईसु हेरा चेलाक कह्यु, “मेत छे, बीहु मां।”
21
अळतेन चे ईसुक ढंड्या मां बठाड़्या ने तत्यारुत च ढंड्यो तीना जागा पर गुयो, जां चे जाणे बाजी रवला।
22
दीसरे दाहड़े चु टुळु ने, एक दरीयान पली धड़ उबु हय रवलु, चे असा देख्या की जां एक काजे छुड़ीन अळी दीसरो ढंड्यो नी हतलो, ने ईसु आपसा चेला साते तीना ढंड्या पर चहड़ी नी रवलु बाकुन तेरा चेला अतरात गुयला।
23
तत्यार नानला दीसरा ढंड्या तीबीरीयास सी तीना जागा धड़े आया चे चां मालीक काजे तु बेसकु वारु छे, कय्न रुटा खादा।
24
हेरेसी जत्यार टुळु देख्यु की जां नीते ईसु हय ने नी हेरा चेला छे, ती चे ढंड्या पर चहड़ीन ईसु काजे हेरता जाय्न कफरनहुम जात रया।
25
दरीयान पली धड़े जत्यार चे ईसु काजे भेळा हया ती कह्या, “ए मास्तर तु जां कत्यार आयु?”
26
ईसु तीनुक जपाप आप्यु, “मे तुहुंक छाचलीन कहं, तुहुं मारे सी करला मटा कामेन सहलाणी देखीन तेरो मतलब समजी गुया करीन मेसेक नी हेर्या, बाकुन तुहुं रुटा खाय्न आफरी गुयला छे, करीन मेसेक हेर्या।
27
रद हवण्या खाणा वाटे मेहनत मां करु, बाकुन तीना खाणा वाटे मेहनत करु ज रद नी हवे, ने च खाणो अमर जीवन वाटे जलम टेकलो रहे, ने असो खाणो तुहुंक माणसेन पुर्यु आपसे, अटकळ राखु, भगवान बास माणसेन पुर्या पर छाप लागाड़ीन ज देखाड़लु छे की माणसेन पुर्यु अतरु माणसेक अमर जीवन आपणेन हकदार छे।”
28
माणसे ईसु सी पुछ्या, “तीना काम काजे भगवान चाहे तीना काम काजे करने वाटे हामु काय करजे?”
29
ईसु तीनु माणसेक जपाप आप्यु, “भगवानेन काम ज छे, की भगवान तीना काजे मकेल्लु छे, तीना पर तुहुं भुरसु करु।”
30
तत्यार चे माणसे ईसुक कह्या, “तु काहनी सहलाणी देखाड़े की हामु तीनाक देखीन तार पर भुरसु करजे? तु काहनो काम देखाड़े?
31
हामरा डाहा बुड़ा ते बयड़ा मां बेसका दाहड़ा लग मुसा वाटे आपलो मन्ना नावेन खाणो खादला ने तेरे बारामां चुखला सास्तुर मां लिखलो बी छे; चु तीनु काजे खाणे करीन सरग सी रुटा आप्यु।”
32
ईसु तीनुक कह्यु, “मे तुंद्रे सी छाचलीन कहं की मुसु तुहुंक चे रुटा सरग सी नी देदु बाकुन मारु बास तुहुंक खरला रुटा सरग सी आपे।”
33
काहाकी भगवानेन रुटु हयुत छे जु सरग सी उतरीन कळी माणसे काजे अमर जीवन आपे।
34
तत्यार चे माणसे ईसु सी कह्या, “ए मालीक चे रुटा हामु काजे जलम आप्या कर।”
35
ईसु तीनुक कह्यु, “अमर जीवनेन रुटु मेत छे; जु मारे धड़े आवसे ने मारे पर भुरसु करसे तीनाक कदी भुक नी लागे।
36
बाकुन मे तुहुंक कह्लु पेहेल बी कय देदलु की मेसेक देख बी लेदला छे, तेबी भुरसु नी करता। आखा चे माणसे भगवान बास मेसेक सुपलु चे आखा मारे धड़े आवसे।
37
तेबी मे हिम्मत नी हारो, भगवान बास तीनुक बी नेवाड़ीन मारा हातेम आप देय, चे आखा मारेन्चां आवसे ने मे तीनुक मारेन्चां सी कदी नी ढासाड़ो।
38
काहाकी मे मारी मरजी पुरी करने नी बाकुन मेसेक मकलन्यान भगवानेन मरजी पुरी करने करीन सरग सी धरती पर उतरीन आवलु छे।
39
ने मारा मकलने वाळान मरजी जी छे, ज काय हयु मेसेक आप्यु तेरे मां सी मे काय बी नी खुवो बाकुन तीनुक आकरी दाहड़े मर्या-सर्याम सी जीन्दा कर दीस।
40
काहाकी मारा बासेन मरजी जी छे की जु कुय मारा पुर्या काजे देखे ने तीना पर भुरसु करे। तीनाक अमर जीवन जड़से ने मे तीनाक आकरी दाहड़े मर्या-सर्याम सी पछु जीन्दा कर दीस।”
41
तेरेमां यहुदी माणसे तीना पर वाक नीकाळीन कुर-कुर करने बाजी गुया काहाकी ईसु कह्लु, “जु रुटु सरग सी उतर्यु चु मेत छे।”
42
ने चे कह्या, “काय जु युसुफेन पुर्यु ईसु नी हय काय, तेरा आयस बास काजे हामु उळख्जे? ती चु कसु कहें की मे सरग सी उतर्यु?”
43
ईसु तीनुक जपाप आप्यु, तुहुं तुहुंत कुर-कुर मां करु।
44
बाकुन जी वात समज लेवु, जत्यार लग मेसेक मकलन्यु भगवान बास तीनाक बी मनवीन मारे धड़े नी लावे तत्यार लग तीनुक मारे धड़े नी आवाये, असला माणसे काजे मे आकरी दाहड़े, मतलब नीयावेन दाहड़े मर्या-सर्याम सी पछु जीवतु करीन बठु कर दीस।
45
भगवानेन अघी सी आवणे वाळी वात बताड़ने वाळा माणसे आपसा किताप मां लिखलो छे, “चे आखा भगवानेन भीणी सी सीकाड़ला रवसे।” जे काहनाक मारा बास सी सामळ्या ने सीक्या, चे मारे धड़े आवे।
46
ज घुण समज्ता की काहनुक भगवान बास काजे देखलु छे, बाकुन जु भगवान बासेन आवजी पर तेरेन्चां सी आवलु छे, हय अतरुत भगवान बास काजे देखलु छे।
47
“मे तुंद्रे सी छाचलीन कहं, की जु काहनुक भुरसु करे, अमर जीवन तेरोत छे।
48
अमर जीवनेन रुटु मेत छे।
49
तुंद्रा आड़ा-बुड़ा बयड़ा मां मन्ना नावेन खाणो खादा, तेबी चे मर गुया।
50
बाकुन जु पल्लु रुटु छे, जु सरग सी उतरे, काहाकी काहनुक माणुस हेरेम सी खाय, ने मरे नी।
51
सरग सी उतर्लु अमर जीवन आपण्यु रुटु मेत छे, कदी काहनुक जु रुटु खासे चु जलम जीवतेलु रवसे ने जु रुटु मे ईनी कळीन माणसेन जीवन वाटे आपीस, चु रुटु मारो मास छे।”
52
अतरा मां चे यहुदी माणसे असा कह्ता जाय्न वातेम लड़ायणे बाजी गुया की, “जु माणुस आपसो मास खाणे करीन कसु दी सक्से।”
53
ईसु तीनुक कह्यु, “मे तुंद्रे सी छाचलीन कहं की, जत्यार लग तुहुं माणसेन पुर्यान मास नी खावु ने तेरो लुही नी पीयु चां लग तुहुंक जीवन नी जड़े।
54
जु मारो मास खाय ने मारो लुही पीये, अमर जीवन तेरोत छे; ने मे आकरी दाहड़े तीनाक मर्या-सर्याम सी पछा जीन्दा कर दीस।
55
काहाकी मारो मास छाचलीन खाणेन चीज छे, ने मारो लुही छाचलीन पीणेन चीज छे।
56
जु मारो मास खाया करसे ने मारो लुही पीया करसे चु मारेम वारु बणीन रवसे ने मे तेरेमां रवीस।
57
जसु जलम जीवण्यु बास मेसेक मकल्यु ने मे मारा बासेन वजे सी जीवलु रवीस, तसा की तसा जु मेसेक खासे चु मारे वजे सी जीवलु रवसे।
58
सरग सी उतेरलु रुटु मेत छे। जु रुटु तीना रुटान तसु नी हय, तीनाक आड़ा-बुड़ा खादा ने मर गुया; बाकुन काहनुक जु हीना रुटु काजे खासे चु जलम जीवलु रवसे।”
59
कफरनहुम सहर वाळा तींद्रा भक्तीन घर मां रय्न सीकाड़तु जाय्न ईसु जी आखी वात कह्यु।
60
ईसुन चेला मां सी बेसका जणा ज सामळीन कह्णे बाजी गुया, “जी ते काठी वात छे हीनीक कुण सामळाय सक्से?”
61
ईसु हेरा मन मां जी वात जाण लेदु की मारा चेला ईनी वातेन बारामां कुर-कुर कर रया। ईसु पुछ्यु, “काय ईनी वात सी तुहुंक ठुकर लाग रय काय।
62
कदी तुहुं माणसेन पुर्या काजे जां हयु पेहेल हतलु, चां उपर जातलु देखसु ती काय हवसे?
63
भगवानेन चुखली-आत्मा जीवन आपे। डील सी काय फायदु नी हय जी वात मे तुंद्रे सी कहंलु चे आत्मा छे ने जीवन बी छे।
64
बाकुन तुंद्रे मायन काहनाक असा छे, चे भुरसु नी करे।” काहाकी ईसु पेहलुत सी जाणतेलु की जे भुरसु नी करे चे कुण छे; ने कुण छे चे मेसेक धुकु देसे।
65
ईसु कह्यु, “ने मे तुहुं काजे ज कह्लु की काहना बी माणसेक भगवान बासेन मदत लेय पाखुर मारे धड़े नी आवाये।”
66
ज सामळीन ईसुन बेसका चेला ईसुन चां सी जाती रया, ने ईसुन सात छुड़ देदा।
67
तत्यार ईसु तीनु बारे चेला काजे कह्यु, “काय तुहुं बी जाणे हींडी रया?”
68
सीमोन पतरस ईसु काजे जपाप आप्यु, “ए मालीक हामु कुणी धड़े जाजे? अमर जीवन आपण्या बुले ते तारेत धड़े छे।
69
ने हामु जाण गुया ने भुरसु कर लेदा की, भगवानेन चुखलु माणुस तुत मसी छे।”
70
ईसु तीनुक जपाप आप्यु, “काय मे तुहुं बारे जणा काजे नी नेवाड़्यु? तेबी तुंद्रे मायन एक माणुस भुतड़ु छे।”
71
ईसु जी वात सीमोन ईस्करीयोतीन पुर्या यहुदीयान बारामां कह्लु, काहाकी ईसुन बारे चेला मायन एक हतलु, चु ईसु काजे धुकु देणेवाळु हतलु।
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 7 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21