1 Corinthians 2

Edo ((E Baibol Ẹdo) Version 1996)

← Chapter 1 Jump to: Chapter 3 →

1Etẹn mwẹ, ẹghẹ ne I na bu uwa gha dee do kpe orhu oro ẹmwata Osanobua ma uwa, I ma ta ẹre ọghe iguẹsẹ ra okpọta ne a fian.

2Rhunmwuda, te I mobọ wa yan ta ẹe ighẹ I gha rre ehe ne uwa ye, emwi ọvbehe i rrọ ne I gha yerre gberra ẹmwẹ Jesu, kpataki, ọghe uwu ne ọ wu vbe uhunmwu ugbugbe.

3Ọ re a na miẹn wẹẹ ẹghẹ ne I na bu uwa rre, egbe ke wọ mwẹ.

4Ikpẹ orhu mwẹ kevbe ẹmwẹ ne I ta ẹe, I ma ya ẹmwẹ umẹwaẹn ne ọ guẹ ẹmwẹ ta ẹe, vbe ẹ i re ẹmwẹ ne ọ mu ọmwa ekhọe ọghe ẹtin Orhiọn Osanobua.

5Rhunmwuda ọnii, ẹ i re ẹwaẹn ọmwa ne agbọn ọre iyayi uwa rhunmwuda ẹre mudia, vbe ẹ i re ẹtin ọghe Osanobua.

6Vbene ọ rhirhi gha ye hẹẹ, I vbe ye ẹmwẹ ne ọ dinmwi gu iran ni dido nẹ vbe ẹmwẹ emwi ni re ọghe orhiọn guan. Sokpan ẹ i re ẹwaẹn ẹmwẹ agbọn na, ra ọghe avbe ẹtin ni rre ọdakha vbe agbọn na, avbe ẹtin iran ra fafaa.

7Ẹmwẹ ẹwaẹn ne I guan keghi re ẹmwẹ oro ẹwaẹn Osanobua, ne a rhie lẹre ne emwa ne agbọn, ne Osanobua mwamwaẹn, ne ọ ya mu uyi ye ima egbe, uhin vbe a te do yi agbọn na.

8Ọkpa vbe uwu iran ni rre ọdakha vbe agbọn na, ne ọ rẹn ẹwaẹn na, ẹ i rrọọ. Akpawẹ te iran rẹn ọnrẹn, iran i ghẹ kan Nọyan uyi mu ugbugbe.

9Sokpan vbene ebe kha re: “Emwi ne ehọ ma he họn, ne aro ma he miẹn, emwi ne a ma ro ighẹ ọ gha sẹtin sunu ẹdẹ, ọre Osanobua mwamwa ye otọ khẹ iran ni họ ẹmwẹ ọnrẹn.”

10Sokpan Osanobua la ekpa Orhiọn ta oro ọghọe ma ima nẹ, Orhiọn Ne ọ huanrẹn ọre ọ gualọ otọ emwi hia, uhin ya sẹ egbe emwamwa ẹkhokho ne ọ rre Osanobua ekhọe.

11Ekhọe ọmwa ọkpa ọre ọ rẹn emwi ne ọ rre ọmwa ni ekhọe hia, erriọ vbe nọ, ekhọe Osanobua ọkpa ọre ọ rẹn emwi ne ọ rre Osanobua ekhọe hia.

12Ẹ i re ekhọe agbọn na ọre a rhie ne ima, Orhiọn ne Osanobua rhie ne ima.

13Rhunmwuda ọnii, ẹ i re ẹmwẹ ẹwaẹn ne agbọn na ma emwa ẹre ọre ima ya guan, vbe ima a gha rhan otọ ẹmwata orhiọn ma iran ni mwẹ nene Orhiọn Ne Ọ Huranrẹn.

14Sokpan ọmwa ne ẹ i mwẹ nene Orhiọn Ne Ọ Huanrẹn, ẹ i sẹtin rhan obọ miẹn ọhẹ ne ọ ke obọ Osanobua rre. Ẹmwata ẹ i rẹn emwi ne a ya ẹe kha, ẹmwẹ oya ehia khin vbe ehọ ẹre rhunmwuda orhiọn ne ọ huanrẹn ọre a ya sẹtin rẹn vbene uyi ẹre sẹ hẹ.

15Ọmwa ne ọ mwẹ Orhiọn Ne Ọ Huanrẹn, ọ re ọ sẹtin rẹn uyi ne ọ rre emwi hia egbe, sokpan ọmwa ne ọ sẹtin bu ohiẹn irẹn, ẹ i rrọọ.

16Zẹ vbene ebe kha re: “De ọmwa ne ọ rẹn emwi ne ọ rre Nọyaẹnmwa ekhọe? Gha ọ gha sẹtin bu ẹre ude?” Vbene ọ rhirhi gha ye hẹ, ekhọe Kristi ọre ima mwẹ.

← Chapter 1 Jump to: Chapter 3 →