bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Edo
/
Edo ((E Baibol Ẹdo) Version 1996)
/
1 Corinthians 9
1 Corinthians 9
Edo ((E Baibol Ẹdo) Version 1996)
← Chapter 8
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 10 →
1
Ẹ i re ọdakha egbe mwẹ mẹ ye? Ẹ i re ukọ mẹ khin? Mẹ ma miẹn Jesu ra? Ẹ i re ere ne a miẹn vbe iwinna ne I ya obọ mwẹ winna ne Nọyaẹnmwa wa khin.
2
Gie a kha ighẹ emwa ọvbehe ma ka mwẹ ye ukọ, sokpan wa ka mwẹ yọ vbe ẹmwata. Rhunmwuda uyinmwẹ ẹdẹ agbọn uwa, vbe uwu Nọyaẹnmwa, wa tobọ uwa ọrọre ama ne a ya rhie ma ighẹ ukọ ọre I khin.
3
Emwa gha kpakan mwẹ ẹmwẹ, vbene I ya zẹ ne unu mwẹ ọre ọ na khin.
4
Ẹ i re ukpo mwẹ ne a ra ne a gha rhie evbare mẹ kevbe ne a gha sa amẹ mẹ wọn, rhunmwuda iwinna ne iwi-nnaẹn?
5
Ẹ i re ukpo mwẹ nọ ra ne imẹ vbe gha ru vbene avbe ukọ nekpa ru, kevbe avbe etẹn Nọyaẹnmwa kevbe Pita, ne I gha rhie ọvbokhan mwẹ ne ọ re ọmwa ne ọ yayi lele egbe khian vbe i a ladian?
6
Ra mẹ vbe Banabas ọkpa ọre a wẹ ne ọ gha tobọ mwa khuan igho ne a ya rri evbare?
7
Wa he vbe họn ovbiyokuo ne ọ ya igho obọ ẹre ha osa ne egbe ẹre vbe ọ gbinna vbe okuo? Ra ọgbugbo ne ẹ i re vbe emwiokọ ne ugbo ẹre? Ra ọsuohuan ne ẹ i rri ewẹn ne a mi vbe ohuan irẹn?
8
Ẹ i re avbe emwi ne a miẹn ẹdẹgbegbe na ọkpa I gha ya unu kan, rhunmwuda nene Uhi vbe guan kan emwi ọkpa nii.
9
Ma miẹn ọẹn tie vbe Uhi e Mosis wẹẹ, “Ghẹ gba ẹmila ne ọ wiẹn ọka unu vbe ọ gha wiẹn ọka.” Te uwẹ wẹ Osanobua zẹ ye ẹmwẹ ẹmila ra?
10
Ra ẹ i re ma ọre ọ kha vbe ọ ta ẹmwẹ na? A rẹnrẹn ighẹ ma ọre a rhunmwuda ẹre gbẹn ọẹn. Kevbe ne o gua, kevbe ne ọ rhọ emwiokọ, te iran ru ẹe vbe idaehọ wẹ iran gha ghae vbe emwiorhọ nii vbe a gha rhọ ẹre nẹ.
11
Ma kọ emwiokọ orhiọn ye uwu uwa nẹ, okpemwi nọ ra a deghẹ ma rhọ emwi egbe vbe obọ uwa.
12
A deghẹ emwa ọvbehe rhie aro ye egbe emwi na vbe obọ uwa, wa ma rẹn ighẹ ma ọre ọ khẹ ke sẹ. Sokpan ma ma ho ne a lo ukpo na. Sokpan ma keghi ziengbe emwi hia ne a ghẹ ya mu idobọ ye ẹmwẹ Iyẹn Ne ọ maa ọghe Kristi.
13
Vbe ne a i na gbe awẹawẹ, wa rẹnrẹn wẹ, iran ni winna vbe uwu Ọgua Osa, uwu Ọgua Osa iran na viọ evbare ne iran re, kevbe wẹ iran ni gbe emwi ne a ya zọ ese vbe aka, vbe ghae vbe emwi ne a ya zọ ese nii.
14
Erriọ ọre Nọyaẹnmwa vbe ta wẹ, iran ni kpe orhu iyẹn ne ọ maa, uwu ẹre ọre iran gha na vbe gha re.
15
Sokpan, mẹ ma he lo ukpo na rhọkpa, I ma vbe gbẹn ebe na nian ne I miẹn ehe na gha lo ukpo ni ne egbe mwẹ. I wa wu ọre ọ maa sẹ. Ọmwa ne ọ gha sẹtin ya orhuọ ẹmwata mwẹ khian ifianyanegbe, ẹ i rrọọ.
16
Ẹ i re ukpo mwẹ ne I gha rhuọ, rhunmwuda ighẹ I ghi he kpe orhu iyẹn ne ọ maa, ugbẹn vbe a miẹn wẹ, te a ya gie mwẹ uhunmwu ne I gha ru ẹe. Ọ gha ba so mwẹ gbe a deghẹ I ma kpe orhu iyẹn ne ọ maa.
17
A deghẹ ekhọe obọ mwẹ ọre I ya winna, I sẹtin rhie aro yọ wẹ a gha ha mwẹ osa, sokpan ugbẹn vbe a miẹn wẹ iwinna ne ọ khẹ ke mwẹ nọ, ọnii rhie maa wẹ te I ru ẹe zẹ vbe okhuo ne a fian mẹ.
18
De emwi ne ọ ghi re ere mwẹ khekherriọ? Ọghọ ne ọ rrọ mwẹ egbe ne I na sẹtin kpe orhu Iyẹn Ne ọ maa vbe ne a i na fian ive yọ, vbe ne a i na rhie emwi ne ọ khẹ ke mwẹ mẹ vbe I kpe orhu iyẹn ne ọ maa.
19
Egbe mwẹ ọre I gue, I i re ọviẹn ọmwarhọkpa. Sokpan I ya egbe mwẹ khian ọviẹn agbọn hia ne I miẹn ehe na silo inu ne obọ mwẹ vbare hia ba egbe.
20
I gha miẹn avbe Ju, I ghi gha ru vbe Ju, ne I miẹn ehe na silo iran ba egbe. A gha rhie miẹn wẹ mẹ i rre ototọ Uhi e Mosis. I gha miẹn iran ni rrọọ, I ghi gha ru vbe ne a miẹn wẹ, ototọ ẹre mẹ ye, ne I miẹn ehe na silo iran ba egbe.
21
Erriọ vbe nọ, I gha miẹn iran ne ẹ i re Ju, I ghi gha ru vbe ọmwa ne ẹ i re Ju, ne ẹ i vbe rre ototọ Uhi avbe Ju, ne I miẹn ehe na silo iran ne ẹ i re Ju ba egbe, rhunmwuda vbe ẹmwata, ototọ uhi Kristi ọre I mẹ ye.
22
I gha miẹn iran ne iyayi ẹre ma wo vbe egbe, mẹ ghi vbe gha re ne ọ ma wo vbe egbe zẹ vbene iran ye, ne I miẹn ehe na silo iran ba egbe. Rhunmwuda ọnii, te I ghi ye egbe khian emwi hia ne emwa hia, ne I sẹtin la odẹikodẹ miẹn emwa eso fan.
23
Rhunmwuda iyẹn ne ọ maa ọre I na ru avbe emwi na hia, ne a miẹn ehe na ghae sẹ mwẹ obọ vbe afiangbe ne ọ rrọọ.
24
Wa rẹnrẹn wẹ vbe ulẹ ne a na suan, emwa ni rre ulẹ nii hia ọre ọ rhie ulẹ, sokpan, arhin ọkpa kẹkan ọre ọ miẹn igho ọmẹguae ne ọ rrọọ. Rhunmwuda ọnii, wa rhulẹ vbene igho ọmẹguae gha na sẹ uwa obọ.
25
Ọmwa ne ọ rhirhi gha mu egbe ye otọ khẹ iku isasegbe, te ọ ru emwi hia ne a wẹ ne ọ ru vbe a gha ma ẹre emwi. Rẹn ru vberriọ, ne a miẹn ehe na gbe ẹkan ye ọre obọ, ọ rhe re ẹkan ne ẹ i tọ, sokpan, ne ima winna baa, ọ ghe etẹbitẹ nọ.
26
Ọnii ọ si ẹe ne I na wa rhulẹ ghe ehe ne a wẹ ọ khin taara, ọnii ọ si ẹe ne I na ye vbe ọgbekpa ne ẹ i fi ọ hohuoa.
27
I ghi liki egbe mwẹ ne ọ gbikpan, ne ọ miẹn ehe na gun mwẹ gha vbokho vbene I ho, ne a ghẹ miẹn wẹ, ugbẹn vbe imẹ ghi tie emwa rrie ọgbọ ne a si nẹ, mẹ tobọ mwẹ khian ne a rhie fua.
← Chapter 8
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 10 →
All chapters:
1
2
3
4
5
6
7
8
9
10
11
12
13
14
15
16