1 Kings 16

Edo ((E Baibol Ẹdo) Version 1996)

← Chapter 15 Jump to: Chapter 17 →

1E Nọyaẹnmwa keghi gie Jehu ne ovbi e Hanani, ọ na wẹ ne ọ ya tama Baasia wẹẹ,

2“A ma te rẹn ruẹn, sokpan, I na ya a ru ọkaolotu ọghe ivbi Izrẹl ne emwa mwẹ, u keghi ru vbene Jeroboam ru, u ru orukhọ nẹ, u na vbe silo emwa mwẹ obọ la orukhọ. Orukhọ iran ya ohu mu mwẹ nẹ nian,

3rhunmwuda ọnii, I gha rhie ruẹ fua, deba ẹgbẹe ruẹ, zẹ vbene I vbe ru e Jeroboam.

4Ovbi ẹgbẹe ruẹ ne ọ wu vbe ore ẹvbo, avbe ekita ghi rri ọe. Iran ni wulo ye oha, ugu ghi rri iran.”

5Emwi ọvbehe hia fẹẹrẹ ne Baasia ghi ru, kevbe iwinna udinmwẹ ne ọ winnaẹn, a gbẹnnẹ ọẹn ye Ebe Okha Avbe Ọba Izrẹl.

6Baasia keghi wu, a na re ẹre ye Tiza, ovbi ẹre ighẹ Ela keghi rriọba lele ẹe.

7E Jehu do ta ẹmwẹ ne Nọyaẹnmwa tae vbe ekpa ọghe Baasia rhunmwuda orukhọ ne Baasia ru ghe Nọyaẹnmwa. Ẹ i re orukhọ ne ọ ru ọkpa ọ re ọ ye ohu mu e Nọyaẹnmwa zẹ vbene Jeroboam ka vbe ru ẹe ke odaro ne irẹn, sokpan rhunmwuda, wẹ ọ gbe Jeroboam kevbe ẹgbẹe ọre hia.

8Ọ ghi rre ukpo ehan yan ugie ne Asa ne ọba e Juda rriọba. Ela ne ovbi e Baasia keghi rriọba vbe Izrẹl, ọ na khaemwisẹ la ukpo eva vbe Tiza.

9E Zimri ne ọ re ọkpa vbe uwu emwa rẹn ni gbe aro ghe obọkpa vbe a wa ikẹkẹ okuo ọba ye ihe eva keghi khuan khẹ ọre. Ẹdẹ ọkpa, ọba keghi da ayọn ne ọ gha gbe ẹe vbe Tiza vbe owa Aza ne ọ gbearoghe ẹguae.

10E Zimri keghi la uwu owa, ọ na gbe Ela rua, ọ na rriọba lele ẹe. Ọ ghi rre ukpo ihinrọn yan ugie ọre Asa ne ọba e Juda ghi rriọba, ọ re emwi na na sunu.

11E Zimri ghi wa rriọba ọwarọkpa, ọ keghi gbele ivbi ẹgbẹe Baasia hia. Etiọnrẹn ne ikpia kevbe avbe esiọre, ọ keghi gbele ehia a.

12Ẹre a na miẹn wẹ Zimri gbele ẹgbẹe Baasia hia fo zẹ vbene Nọyaẹnmwa la unu e Jehu ne akhasẹ ta ẹe.

13E Baasia kevbe Ela ne ovbi ẹre keghi ya ohu mu e Nọyaẹnmwa ne Osanobua Izrẹl rhunmwuda ẹbọ ne iran ru kevbe ne iran na vbe silo ivbi Izrẹl obọ la orukhọ.

14Emwi ọvbehe hia ne Ela ghi ru, a gbẹnnẹ ọẹn ye Ebe Okha Avbe Ọba Izrẹl.

15Ọ ghi rre ukpo ihinrọn yan ugie ne Asa ne ọba e Juda rriọba, e Zimri keghi rriọba ivbi Izrẹl vbe Tiza la ikpẹdẹ ihinrọn. Ivbi Izrẹl kegha khọn okuo vbe Gibẹtọn ne ọ rre Filistia,

16Iran ghi họn wẹ e Zimri khuan khẹ ọba ọ na gbe ẹe rua, ọwarọkpa nii vbe evba dandaandan iran keghi ma Ọmri ne ọkaokuo iran ọba Izrẹl.

17Ọmri kevbe ivbi iyokuo ẹre keghi kpao vbe Gibẹtọn rre, iran na mu okuo gha rrie Tiza.

18E Zimri ghi miẹn wẹ iran khọn ẹvbo nii miotọ nẹ, ọ keghi wa gha rrie ẹgun ne ọ ke uwu ẹguae sẹ ehia, ọ na rhu erhẹn ye ẹguae, rẹn tobọ ẹre keghi wu ye uwu aranmwẹ erhẹn nii.

19Ọna sunu rhunmwuda orukhọ ne ọ ru ghe Nọyaẹnmwa. Ọ keghi vbe ru vbene Jeroboam ne ọ ke odaro ne irẹn vbe ru, ọ ya ohu mu e Nọyaẹnmwa vbe ekpa orukhọ ne ọ ru, ọ wa vbe silo ivbi Izrẹl obọ la orukhọ.

20Emwi ọvbehe hia ne Zimri ghi ru ya sẹ egbe ne ọ na si uma isọtẹ, a gbẹnnẹ ọẹn ye Ebe Okha Avbe Ọba Izrẹl.

21Ivbi Izrẹl keghi ghae egbe ye ihe eva, eso vbọ kegha ho ne iran ma Tibni ne ovbi e Ginat ọba, eso kevbe gha rre asa ọghe Ọmri.

22Vbe okiekie, obọ iran ni rre asa ọghe Ọmri keghi ke okhunmwu, e Tibni keghi wu, Ọmri na rriọba.

23Ọ ghi rre ukpo ọkpayanọgban ne Asa ne ọba e Juda rriọba, Ọmri keghi rrioba Izrẹl. Ọ keghi ya ukpo iweva vbe ẹkete. Ukpo ehan ne okaro, ọ na gha ke Tiza khaemwisẹ.

24Vbe iyeke ọnii, ọ keghi dẹ oke Sameria ne ọ ha igho esiliva arria-isẹn ehan yi ne okpia ọkpa ne a tie ẹre Siẹma. Ọmri keghi gbe ekẹn ga ẹvbo nii, ọ na gha tie ẹre Sameria ne ọ ya ta e Siẹma ne ọ te ka yan uhunmwu oke ni.

25Ọmri keghi ru orukhọ ghe Nọyaẹnmwa sẹ iran ni karo ne ẹẹn hia.

26Ọ keghi ya Nọyaẹnmwa ne Osanobua Izrẹl mu ohu zẹ vbene Jeroboam ne ọ karo nẹ irẹn vbe ru, vbe ekpa orukhọ ne irẹn ru, ne Ọ na silo ivbi Izrẹl obọ ku orukhọ ẹbọ ne a gho.

27Emwi ọvbehe hia ne Ọmri ghi ru, iwinna udinmwẹ ọnrẹn hia, a gbẹnnẹ ehia ye Ebe Okha Avbe Ọba Izrẹl.

28Ọmri keghi wu, a na re ẹre ye Sameria, Ehab ne ovbi ẹre keghi rriọba lele ẹe.

29Ọ ghi rre ukpo evairrọvbe iyeva ne Asa ne ọba Juda rriọba, Ehab ne ovbi Ọmri keghi rriọba ivbi Izrẹl vbe Sameria la ukpo eva yan ugie.

30Ọ keghi ru orukhọ ghe Nọyaẹnmwa sẹ iran ni karo ne ẹẹn hia fẹẹrẹ.

31Egbe orukhọ ne Jeroboam ru ma ghi sẹ ne irẹn, ọ keghi vbe ru yan vbe ne ọ na ya rhie Jezibẹl ovbi Ethal ne ọba Saidọn, ọ na vbe gha gho e Bal.

32Ọ keghi gbe ọgua ne Bal vbe Sameria, ọna bọ Ogiukpo ne ẹẹn, ọ na mu ẹẹn ye uwu Ọgua Osa.

33Ọ na mu Amazẹ Asiẹrra ne ẹbọ ne okhuo yọ. Rẹn ọ re ọ ghi wa ru emwi ya ye ohu mu e Nọyaẹnmwa ne Osanobua Izrẹl sẹ avbe ọba Izrẹl hia ni ke aro ne ẹẹn.

34Ẹghẹ ọre, e Hiẹl ne ovbi e Bẹtẹl keghi dọlegbe bọ e Jẹriko. Zẹ vbene Nọyaẹnmwa la unu e Jọsua ne ovbi e Nọn ta ẹe ye otọ, Abiram ne ovbi e Hiẹl ne ọdiọn keghi wu vbe ọ gbe ẹyotọ Jẹriko, ovbi ẹre ne ọ ke otọ ighẹ Segub kevbe wu vbe ọ ghi bọ onurho ẹre.

← Chapter 15 Jump to: Chapter 17 →

Recommended Reading

Commentary 1 Kings Commentaries → Devotional 1 Kings Devotional Guide → Get This Bible Edo ((E Baibol Ẹdo) Version ) Study Bible →