2 Corinthians 12

Edo ((E Baibol Ẹdo) Version 1996)

← Chapter 11 Jump to: Chapter 13 →

1I gha wa rhuọ, a gha rhe miẹn ighẹ ẹ i mwẹ esa ne ọ khin, sokpan emwi ne I ghi ra guan kan na, keghi re umian ne I miẹn kevbe oro ne Nọyaẹnmwa we ma mwẹ.

2I rẹn ovbi yayi ọkpa ne okpia, ne a gua rhie gha rrie ẹrinmwi ne ọ yo sẹ vbe ukpo iwenẹ nọ lae (I ma rẹn deghẹ te emwi na wa sunu ra deghẹ umian ọre ọna miẹn ọẹn, Osanobua ọkpa ọre ọ rẹnrẹn.)

3Ne I dọlegbe tae, I rẹnrẹn wẹ te a wa gua okpia na rhie gha rrie Paradais (erriọ ye nọ, I ma rẹn deghẹ te emwi na sunu vberriọ ra deghẹ umian ọre ọ na miẹn ọẹn, Osanobua ọkpa ọre ọ rẹnrẹn.)

4Evba ọre ọ na họn ẹmwẹ ne a i sẹtin ta, emwi ne ọmwa ne agbọn ma kei ne ọ gha gbe unu yi.

5Rhunmwuda ọnii, I gha ye ọmwa vberriọ rhuọ, sokpan, mẹ i ra ya egbe mwẹ rhuọ sokpan a ma wẹ a vbe emwi ni rhie maa vbene I vburriẹ hẹ.

6I gha wẹ ne I rhuọ, I i khian vbe gha re akpa, rhunmwuda, ẹmwata ọre I ta, sokpan mẹ i ra rhuọ rhunmwuda, I ma ho ne ọmwarhọkpa mwamwa mwẹ ye ukpo ne ọ gberra, vbene emwi ne ọ miẹn vbe I ru, kevbe ẹmwẹ ne ọ họẹn vbe I tae, kha re.

7Sokpan, ne ọ miẹn ehe na kie mwẹ ukpẹ ọre, ne emwi ọyunnuan ne aro mwẹ sẹe na i ghẹ ya mwẹ gha tọn ifuẹn mu, ọ keghi rhie emianmwẹ ne ọ wegbe mẹ, ne ọ gha ye vbe ukọ setan, ne ọ gha kinmwi mwẹ, nọ da mwẹ obọ uhiomwẹ yi.

8Igba eha ọre I na erhunmwu ghe Nọyaẹnmwa ba ẹre, I na rinmwian ne ọ rhie ẹre hin mwẹ egbe rre.

9Ewanniẹn ne ọ rhie mẹ ọrọre wẹ, “Ẹsọhẹ mwẹ ọkpa ọrọre emwi ne ọ khẹ ke ne u gha mwẹ, rhunmwuda ẹghẹ ne uwẹ ma na wo vbe egbe, ọre ẹtin imẹ na wo vbe egbe sẹ.” Rhunmwuda ọnii, te ọyẹnmwẹ ghi sẹ mwẹ ne I gha ye a ma wo vbe egbe rhuọ, ne I miẹn ehe na gha họn ẹmwẹ ifuẹn ne ẹtin Kristi tan gue mwẹ.

10Ẹko ẹre vuọn mwẹ ighẹ ne I ma na wo vbe egbe, ne a na tie ẹbọ mẹ, ẹsọn, ukpokpo, kevbe orueghe rhunmwuda Kristi. Rhunmwuda ẹghẹ ne I ma na wo vbe egbe ọre I na mwẹ ẹtin.

11Te I ghi ru emwi vbe akpa, sokpan wa ọre ọ si ẹe yọmwẹ egbe. Wa ọre ọ te kei ne ọ gha so igie ye ẹmwẹ ne egbe mwẹ. Rhunmwuda, gie a kha I gele zẹdẹ mwẹ esa ne I ye, emwi ne avbe “Ogiete” ukọ uwa ni ya sẹmwẹ ẹ i rrọ.

12Avbe emwi ni rhie maa ighẹ ukọ ọre I khin, i ziengbe ọre a ya winnaẹn vbe uwu ẹbu uwa avbe ama ọyunnuan kevbe iwinna ọyunnuan.

13De uyinmwẹ ne ọ ma kei ne a ma yin ghe esọsi nekpa ne a yin ghe uwa yi, gberra wẹ ne I ma na ye ẹmwẹ iyobọ ne a ru ye uwa egbe? Wa lahọ, wa yabọ mwẹ ighẹ I ma ru ẹ ẹse.

14Ukpo eha ọ na khin ne I khian he do miẹn uwa aro na sẹvba, I i ra ye vbe ya ye uwa egbe. Wa tobọ uwa ọre I gualọ ighẹ ẹ i re igho uwa. A deghẹ erriọ te nọ, emọ ọre ọ ma koko erha, ẹ i re erha ọre ọ koko emọ.

15Ẹko rhiẹnrhiẹnmwẹ ọre I gha ya lo emwi ne I mwẹ hia, ya sẹ egbe imẹ tobọ mwẹ bare, ne I ya ye uwa obọ. Rhunmwuda ne I na ho ẹmwẹ uwa sẹrriọ, ọre uwa ghi na si egbe vbe aho ne uwa mwẹ ghe mwẹ ra?

16Wa hia gha miẹn nian wẹ, I ma ya enegbe mwẹ ye uwa egbe. Sokpan emwa eso gha kha wẹẹ, “Ọmwa ero ọre I khin, wẹ ẹkẹ vbe ero ọre I ya rhu uwa re.”

17De ekpa ne ọ khin vbọ? Vbe uwu emwa ne I gie bu uwa rre, de ne I la obọ ẹre rhu uwa re vbọ?

18I rinmwian Taitọs ne ọ do yo, I keghi vbe gie Ivbi yayi eso lele ẹe. Te uwa ghi wẹ Taitọs rhu uwa re ra? Ẹ i re emwi ọkpa ọre ọ rre imẹ vbe ọre ekhọe, ne ima na vbe ru emwi la odẹ ọkpa.

19Ọ gha kẹe nian, te uwa ro ighẹ te ima ho ne a gui fan egbe mwa ye otọ vbe obọ uwa. Hiehiere. Vbene Kristi ho ne ima guan ọre ima guan na, vbe odaro Osanobua, emwi hia ne I a rhirhi ru, iho mwa, te ima ru ẹe ne a ya ye uwa obọ.

20Afianma fian mwẹ wẹ, I gha sẹ evba, ẹ i re vbene I ho ne uwa gha ye I ra na do vba uwa, wa tobọ uwa ghi vbe miẹn wẹ, ẹ i re emwi ne uwa te ho ne imẹ gha khin ọre I khin. Afianma fian mwẹ wẹ, I gha do vba ẹzọ, oya ọmwa da ọmwa, ọkpankpan, arẹn ne egbe mwa ọkpa, ọtakhọ, kevbe ewẹwẹwẹ, uhiomwẹ kevbe otighi.

21Afianma fian mwẹ I gha ghi dọlegbe rre, Osanobua mwẹ gha wa sirra uwa hia fa mwẹ uan, I ghi gha viẹ egbe ba ẹmwẹ emwa ni bun ni ru orukhọ vbe ẹghẹ ne ọ gberra, ne ọma he ye ro iro fi uyinmwẹ werriẹ, vbe uyinmwẹ osọnnọ ne iran yin, alama oghẹ kevbe orriarria.

← Chapter 11 Jump to: Chapter 13 →