2 Corinthians 3

Edo ((E Baibol Ẹdo) Version 1996)

← Chapter 2 Jump to: Chapter 4 →

1Te ẹmwẹ ima na ghi ye vbe ẹmwẹ ayunukpaegbe vbe ehọ uwa ra? Ra, zẹ vbe emwa ọvbehe, te uwa ghẹ ghi vbe gbẹn ebe ne a ya tian ọmwa ne ima ra, ra ne a gbẹn ebe ya tian ima ma uwa?

2Wa tobọ uwa ọrọre ebe ne ima gbẹn, ne a gbẹn ye ekhọe uwa, ne emwa hia rẹn ọnrẹn, ne iran vbe gha tie ẹre.

3Aro dae wẹ, Kristi tobọ ẹre ọre ọ gbẹn ebe na, ọ na rhie ẹre ne ima rhie rre. Ẹ i re ne a ye ẹmu gbẹnnẹ ye uhanhan okuta, sokpan ekhọe emwa ne agbọn ọre a ya Orhiọn Osanobua ne ọ rrọọ gbẹnnẹ ọẹn yi.

4Ma tae vbe nian, rhunmwuda ma la ekpa Kristi mu ẹtin yan Osanobua.

5Rhunmwuda emwi rhọkpa i rre uwu ima ne ima gha sẹtin la ekpa ẹre kha wẹ ma sẹe ne ọ gha winna iwinna na. Ẹtin ne a ya sẹtin ruẹe ne ima mwẹ, obọ Osanobua ọre ọ ke rre.

6Rhunmwuda, rẹn ọre ọ ru ẹe ne ima sẹtin gha ga ile nọgbọn, ne ẹ i re uhi ne a gbẹnnẹ ye otọ, sokpan, ọghe Orhiọn. Uhi ne a gbẹnnẹ ye otọ uwu ọre ọ si rre, sokpan arrọọ ọre Orhiọn rhie ne ọmwa.

7Te a gbẹnnẹ uhi na ye avbe uhanhan okuta, uyi Osanobua keghi rhie egbe maa vbe ẹghẹ ne a na rhie ẹre ne ọmwa. A gha rhe miẹn wẹ ọ do fafaa, awanwan ne ọ gha rre ugbaro e Mosis, keghi wo vbe egbe sẹrriọ wẹ ivbi Izrẹl ma sẹtin tọn aro yo. A deghẹ uhi ne a rẹnrẹn wẹ uwu ọre ọ si rre, ladian ke irẹn kevbe uyi ne ọ sẹ vberriọ,

8inu inu ọre uyi ne ọre ọghe ugamwẹ Orhiọn gha ya kpọlọ sẹẹ!

9Ugamwẹ ne a ya bu ohiẹn ghe emwa kegha mwẹ uyi, inu inu ọre ugamwẹ ne a ya bu ase ne ọmwa gha ya mwẹ uyi sẹẹ!

10Ma sẹtin kha nian wẹ, rhunmwuda ne uyi ne ọ rrọọ na, na kpọlọ sẹ ẹsẹse, uyi ne ọ te fi wainwain ẹghẹ nii la hin odẹ rre.

11Rhunmwuda, deghẹ emwi ne ọ gha rrọọ vbe ovbi ẹghẹ kherhe gha a mwẹ uyi, inu inu emwi ne ọ rrọọ ẹdẹdẹdẹ gha ya mwẹ uyi sẹẹ!

12Rhunmwuda ighẹ ma mwẹ idanmwehọ na, ma keghi din ẹsẹse.

13Ma i yevbe Mosis ne ọ gha mu ukpọn gue aro ne ivbi Izrẹl ghẹ bẹghe awanwan nii vbe ọ gha fafaa la hin evba rre.

14Vbe ẹmwata, te a rhie emwi rhu iran ekhọe, ye do sẹ ẹdẹ nẹ rẹ na, te a ye rhie ukpọn nii rhu iran ekhọe vbe iran a gha tie ehe ile nẹdẹ. Ọmwa gha ghi ya egbe ba Kristi nẹ ọkpa, ọre a ghi na rhie ukpọn nii hin rre.

15Uhin do sẹ ẹdẹ nẹ rẹ na, iran gha tie ebe Mosis, ukpọn nii ghi ye de gue iran ekhọe.

16Sokpan, a rhie ẹre hin rre zẹ vbene ebe kha re, “Mosis gha werriẹ aro ghe ehe ne Nọyaẹnmwa ye, a ghi rhie ukpọn nii hin rre.”

17Vbe ehe ne a tie re na, Orhiọn ọre a kha vbe a guan kan “Nọyaẹnmwa.” Eheikehe ne Orhiọn Nọyaẹnmwa a rhirhi gha ye, a yan egbe ọmwa rre evba.

18Ma hia fẹẹrẹ khekherriọ, ọre ọ rhie uyi Nọyaẹnmwa maa vbe aro ne a ma rhie emwi gue. Nene uyi ọkpa nii, ghi ke ehe ne Nọyaẹnmwa, ne ọre nene Orhiọn ye rre, do fi ima werriẹ khian vbene irẹn ye, vbe uyi ne ọ kpọlọ sẹ ọna ẹsẹse.

← Chapter 2 Jump to: Chapter 4 →