Hosea 3

Edo ((E Baibol Ẹdo) Version 1996)

← Chapter 2 Jump to: Chapter 4 →

1E Nọyaẹnmwa keghi tama mwẹ wẹẹ, “Dọlegbe gha khian, ne u ya ho ẹmwẹ okhuo ne irẹn vbe egbakhian rẹn gba ghẹ khian nii, u ghi ho ẹmwẹ ọnrẹn zẹ vbene imẹ ye vbe ho ẹmwẹ ivbi Izrẹl ne emwa mwẹ, a gha rhe miẹn wẹ iran lẹ lele ẹbọ ọvbehe, iran keghi vbe gha ya ititi ọmọ erhan ne a kae re, zọ ese ghe amazẹ.”

2Rhunmwuda ọnii, I keghi ya hae agiẹghẹ esiliva ekesugie kevbe adanna okhuae ọka igabari ihinrọn ne I ya dẹ ọe.

3I keghi tama rẹn wẹ, ẹghẹ ne ọ taẹn o re ọ gha ya diakhẹ mwẹ vbene ẹi na gbe ebabotu ra ne ọ vbe gha ghẹ. Vbe uwu ẹghẹ ne a kha na, mẹ gha vbe diakhẹ ọre.

4Erriọ wa nọ zẹe, ivbi Izrẹl gha vbe gha rrọọ vbe ẹghẹ ne ọ taẹn vbene iran i ra na gha mwẹ ọba ra ọkaolotu vbene ese ne a zọ i ra na vbe gha rrọọ, ra orre okuta itaemwi, vbene amazẹ ra ukhurhẹ ne a ya fi iha i na rrọọ.

5Sokpan, ẹghẹ dee ne ivbi Izrẹl gha na dọlegbe bu e Nọyaẹnmwa ne Osanobua iran gha dee, iran gha vbe bu ovbi uniẹn e Devid rre zẹvbe ọba iran. Ẹghẹ nii, iran gha mu ohan e Nọyaẹnmwa, iran ghi vbe miẹn emwi ọhẹ vbe obọ ẹre.

← Chapter 2 Jump to: Chapter 4 →