Hosea 5

Edo ((E Baibol Ẹdo) Version 1996)

← Chapter 4 Jump to: Chapter 6 →

1“Wa danmwehọ wa ne avbe ohẹn, wa gbe ehọ kotọ wa ne ivbi Izrẹl, wa danmwehọ wa ni re ẹgbẹe ọba! Te a te wẹ ne uwa gha bu ohiẹn ẹmwata rhunmwuda ọnii, obọ ibuohiẹn gha vba uwa! Wa khian ifi ye Mizpa, kevbe ọga ne a rhuẹre ye Oke Tabọ,

2uye ne ọ dinmwi ye ore Akesia, erriọ nọ te I ra rri uwa hia oya.

3I rẹn vbene Izrẹl ye hẹ, ẹ i sẹtin lẹre mẹ. Rẹn ma ka guobọ mwẹ ẹdẹ, emwa rẹn ma vbe sẹ ne ọ gha ga mwẹ.”

4Emwi dan ne emwa ni ru ma ghi gie iran dọlegbe bu Osanobua iran gha dee. Ẹbọ ne a gho la iran uhunmwu nẹ, iran ma ghi vbe kha ighe iran rẹn e Nọyaẹnmwa.

5Uhiomwẹ ivbi Izrẹl ya iran rrie. Orukhọ iran ọ re ọ ye iran rrua owẹ ne iran na dele. Ivbi e Juda keghi dele ba iran.

6Iran munọ ohuan kevbe ẹmila iran ne iran ya zọ ese ghe Nọyaẹnmwa, sokpan, ẹ i ruẹ ne iran. Iran i sẹtin miẹn ọẹn rhunmwuda, rẹn kpao sẹ iran rae nẹ.

7Iran ma guobọ e Nọyaẹnmwa. Ivbi iran i re ọghe ọe. Rhunmwuda ọnii nian, a gha fuẹn iran kevbe otọe iran an ban.

8Wa kpe okpe okuo vbe Gibea, wa so okokoko vbe Rama. Wa tu utumwẹ okuo vbe Bẹtẹl! Ivbi e Bẹnjamin, wa la okuo.

9Ẹdẹ irria ikhi dee. Izrẹl gha la ọrhiae rrie. Ivbi Izrẹl, ẹ i mwẹ ọna ma sunu.

10E Nọyaẹnmwa khare wẹẹ, “Ohu wa mu mwẹ rhunmwuda ivbe e Juda vẹ la Izrẹl, iran keghi ya gha fu iran otọe hẹ, rhunmwuda ọnii, mẹ gha hihiẹ irriaikhi yan iran zẹ vbe orogho amẹ.

11Iran wa wọ Izrẹl uhunmwu, otọe ne ọ te re ọghe obọ ẹre, erhọkpa i ghi gue ẹe rhunmwuda, ọ keghi wa muẹn yan uhunmwu wẹ obọ emwa ne ẹ i sẹtin ru iyobọ, ọre irẹn gha na ya gha nọ iyobọ.

12I gha gie ọkhọ rruan Izrẹl kevbe ọfuan vbe egbe ivbi e Juda.

13“Izrẹl ghi miẹn vbene obọ emianmwẹ da irẹn hẹ, e Juda ghi miẹn ẹwẹn ne egbe ẹre, Izrẹl keghi gha rrie Asiria ne ọ ya nọ iyobọ vbe obọ ọgbaisi nọkhua, sokpan, ọ ma sẹtin sinmwi iran, ra ne ọ kpe ẹwẹn iran rrie.

14I gha gu ivbi Izrẹl kevbe Juda gbinna zẹvbe oduma. Mẹ tobọ mwẹ ọ re ọ ra yanghan iran hẹkua. Ẹghẹ ne I gha na silo iran kpao, ọmwa ne ọ gha sẹtin miẹn iran fan i rrọọ.

15“I gha he emwa mwẹ yotọ a te do miẹn wẹ iran rri oya ye orukhọ iran sẹ nẹ, kevbe wẹ te iran ghi vbe gualọ mwẹ. Ogha kẹe, usẹ gha sẹ iran nẹ, iran gha gualọ mwẹ rre.”

← Chapter 4 Jump to: Chapter 6 →