James 3

Edo ((E Baibol Ẹdo) Version 1996)

← Chapter 2 Jump to: Chapter 4 →

1Etẹn mwẹ, ọ ma kei ne ima hia wa gha re emamwaemwi, rhunmwuda, wa rẹnrẹn ighẹ, ma ne emamwaemwi ọre a ra ya obọ ne ọ tọn mu sẹẹ emwa ọvbehe vbe a gha bu ohiẹn.

2Ẹghẹ hia ma hia ya ba emwi ku ru. Ọmwa ne ẹ i ba ẹmwẹ ku ta, ọmwa ne ọ gbae nọ, ọ ghi vbe sẹtin gha ye egbe hia khian ẹse.

3Te ima rro ekagha ye ẹsin unu, ne iran miẹn ehe na gha ru vbene ima ho, ẹghẹ nii, ma ghi sẹtin gha sua iran la ehe ne ima ho.

4Wa vbe ghe okọ ne khua, ghe vbene ọ digba sẹ nii, kevbe ne ẹhoho ne ọ bi ẹe khian a yan wo vbe egbe sẹ, emwi ne a ya dia okọ ye odẹ ne kherhe nii, ọre a ya dia ẹre, ọ ghi vbe gha rrie ehe ne oziguẹ ho ne ọ gha rrie.

5Erriọ ọre ẹmwẹ aranmwẹ ye, vbene ọ kanmwa sẹ nii, ọ ghi gha rhuọ orhuọ ni kọnkọn. U ghi ghe vbene ẹgbo kpọlọ hẹ ne ovbi ogiọnmwẹ erhẹn sẹtin mu erhẹn yi.

6Te aranmwẹ ye vbe erhẹn, agbọn ne ọ kulo nọ, ọ keghi rre ehe ne ọ khẹ kẹe vbe uwu egbe mwa, ọ keghi vbe gha wawa emwi dan gba egbe mwa hia, ọ ghi rhie erhẹn ne ọ ke ẹrinmwi erhẹn tobọ ẹre sẹ irẹn obọ, ya rhu erhẹn ye ehe ne ima ra ya egbe la hia, vbe ẹdẹ agbọn mwa.

7Ọmwa sẹtin rrii avbe emwi nekpa ne Osanobua yi hia fẹẹrẹ, ọ ka vbe rrii ehia nẹ avbe aramwẹ, ahianmwẹ, aranmwẹ ni họ ekẹn, kevbe avbe ehẹn.

8Sokpan a ma he miẹn ọmwa ne ọ he sẹtin rrii aranmwẹ ẹdẹ. Emwi dan nọ, ẹ i gia da yi, obi uwu dan hia ọre ọ rrọọ.

9Rọẹn ni ọre a ya kpọnmwẹ Nọyaẹnmwa kevbe Erha mwa. rọẹn ọre a vbe ya rhovbiẹ emwa ne agbọn ne iho mwa, emwa ne a yi zẹ vbe ama Osanobua.

10Ẹmwẹ ekpọnmwẹ kevbe ẹbọ ne a tie ghi gha tue ke unu ọkpa ni ladian. Etẹn mwẹ, ọ ma kei ne ọna gha sunu.

11Ẹzẹ ne ọ lẹ amẹ ne ọ rhiẹnrhiẹn kevbe ne ọ rriara ke uhunmwu ẹzẹ ọkpa ni rre i rrọọ.

12Etẹn mwẹ, erhan ohọ i sẹtin mọ ọmọ oliv, vberriọ azara i sẹtin mọ ọmọ ohọ, erriọ zẹẹ, ẹzẹ umwẹ i sẹtin lẹ amẹ ne ẹ i fian ladian.

13Orhiọnkpa rrọọ vbe uwu uwa ne ọ waan ne ọ vbe rẹn otọ ẹmwẹ ra? Wẹ ne uyinmwẹ ọnrẹn ne ọ maa rhie ẹre maa vbe ekpa iwinna esi ne ọ ya imuegbe rri otọ kevbe ẹwaẹn winna.

14Sokpan, deghẹ te uwa mwẹ oya ọmwa da ọmwa vbe ekhọe uwa, ighẹ ẹko khọ uwa, emwi vbe da uwa, ọ ma ghi kei ne uwa gha hio, ne uwa vbe gha ba ẹmwata ohoghe.

15Ẹ i re ẹrinmwi egbe ẹwaẹn vberriọ ke rre, ọ ghe agbọn na nọ, ẹ i re emwi orhiọn, ọghe esu nọ.

16Rhunmwuda, eheikehe ne oya ọmwa da ọmwa ke emwi da mwẹ ye, evba ọre a na miẹn olighi kevbe emwi dan hia.

17Sokpan ẹwaẹn ne ọ ke odukhunmwu rre, keghi re vbe okaro, ne ọ huanrẹn, ọ keghi vbe re ne ọ fu ọmwa egbe rre, ne rọkhọ kevbe ọghe ọse, ọ vuọn ne itohan, ọ keghi vbe viọ emwiorhọ iwinna esi ladian, ẹ i mwẹ ẹko ne ọkhọ ọmwa ra ẹkẹ vbe iwẹnwẹn.

18Emwi ẹmwata ọrọre emwiorhọ ne a rhọ, vbe emwiokọ ne iran ni mu igbinna, ye ọfumwegbe kọ.

← Chapter 2 Jump to: Chapter 4 →